ჯანდაცვის მინისტრის მოადგილის თამარ გაბუნიას განცხადებით, უწყებას არასდროს უთქვამს უარი მედიკამენტ „ვოსორიტიდის“ ქვეყანაში შემოტანაზე, რომელსაც აქონდროპლაზიის სინდრომის მქონე ბავშვების მშობლები მოითხოვენ. როგორც გაბუნიამ მთავრობის სხდომის დასრულების შემდეგ ბრიფინგზე განმარტა, საჭიროა რისკების გადაზღვევის გზებზე მსჯელობა, რაც შესაძლებელია ქვეყანაში ინოვაციური მედიკამენტის დანერგვას უკავშირდებოდეს.
„ეს მედიკამენტი ჯერჯერობით არცერთ სტანდარტულ მკურნალობაში შეტანილი არ არის. როდესაც საქმე გვაქვს არასტანდარტულ მკურნალობასთან, საჭიროა მეტი სიფრთხილე, მეტი დრო და გარკვეული ეტაპების გავლა. ჩვენ არასდროს გვითქვამს, რომ უარს ვამბობდით ამ მედიკამენტის ქვეყანაში შემოტანაზე. მწარმოებელთან მოლაპარაკებები მიმდინარეობს. სამინისტრომ კონსულტაციები დაიწყო ჯანმრთელობის მსოფლიო ორგანიზაციასთან, ევროპის იშვიათი დაავადებების ასოციაციასთან, მწარმოებელთან გასული წლის ბოლოს. თუ ამ მედიკამენტის ქვეყანაში შემოტანის ინტერესი არ გვქონდა, მაშინ რა მიზნებს ემსახურებოდა ეს კონსულტაციები, რაც დღესაც გრძელდება?! ამ ტიპის ფორმატში ძალიან რთულია კონსტრუქციული გადაწყვეტილების მიღება. თუ ეს ყველაფერი ბავშვის ინტერესს ემსახურება, მაშინ მთავარია, რომ ეს ყველაფერი გადავიდეს ისევ კონსტრუქციულ, სამეცნიერო რეჟიმში და ვიმსჯელოთ რისკებზე. იმ რისკების გადაზღვევის გზებზე, რაც შესაძლებელია ქვეყანაში ინოვაციური მედიკამენტის დანერგვას უკავშირდებოდეს“,-განაცხადა გაბუნიამ.
მისი განმარტებით, სერვისები, რომელიც აქონდროპლაზიით დაავადებულ ბავშვებს ესაჭიროებათ, იქნება ეს რეაბილიტაცია, ფსიქოთერაპია, სოციალური სერვისი თუ სხვა ტიპის დახმარება, სრულად იქნება დაფარული სახელმწიფოს მიერ.
„ჯანდაცვის სამინისტრო დიდი ხანია ამ მიმართულებით მუშაობს როგორც საერთაშორისო ორგანიზაციებთან, ასევე მშობლების ჯგუფებთან. სამინისტროს პოზიცია არის შემდეგი-გაგრძელდება მუშაობა იმ მიმართულებით, რომ ჩვენ მაქსიმალურად უსაფრთხოდ მოვახერხოთ მედიკამენტის ქვეყანაში დანერგვა. მანამდე, გადაწყვეტილება იქნა მიღებული, რასაც მთავრობამ მხარი დაუჭირა. აქონდროპლაზიით დაავადებული ბავშვების საჭიროებები, რომელიც მათ აქვთ და რაზედაც ეს წამალი პირდაპირ ზეგავლენას ვერ ახდენს, აუცილებლად უნდა იყოს გათვალისწინებული და ის სერვისები, რომელიც მათ სჭირდებათ, იქნება ეს რეაბილიტაცია, ფსიქოთერაპია, სოციალური სერვისი თუ სხვა ტიპის დახმარება, სრულად იქნება დაფარული სახელმწიფოს მიერ, როგორც ჩვენს ქვეყანაში, ასევე საზღვარგარეთ, რადგან მთელი რიგი მეთოდები, რაც მსოფლიოს წამყვან ქვეყნებში აპრობირებულია, შესაძლოა, ჩვენს ქვეყანაში ჯერ აქონდროპლაზიის მიმართულებით დანერგილი არ იყოს. „ვოსორიტიდთან“ დაკავშირებით ჩვენ კონსულტაციები გვქონდა და გვაქვს ჯანმრთელობის მსოფლიო ორგანიზაციასთან, ევროპის იშვიათი დაავადებების ასოციაციასთან და თავად მწარმოებელთან. პროცესი გრძელდება იშვიათი დაავადებების საბჭოს ფორმატში და ასევე, შექმნილია ექსპერტების ჯგუფი, რომელიც მუშაობს კონკრეტული პროტოკოლის შემუშავებაზე“,-განაცხადა გაბუნიამ.
