ძალადობა არის ნებისმიერი ქმედება, რომელიც აკნინებს ან დაზიანებით ემუქრება ადამიანის ფსიქიკურ და ფიზიკურ კეთილდღეობას, საფრთხეს უქმნის მის ჯანმრთელობას და განვითარებას. ძალადობას აქვს რამდენიმე ფორმა _ ფიზიკური ძალადობა, ემოციური (ფსიქოლოგიური) ძალადობა, სექსუალური ძალადობა, უგულებელყოფა. ძალადობის მსხვერპლები უმეტესად ქალები და ბავშვები ხდებიან.
რამდენიმე დღის წინ ჩოხატაურის მუნიციპალიტეტში ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების უწყებათშორისი კომისიის, ქალთა საინფორმაციო ცენტრისა და გაეროს ქალთა ორგანიზაციის თანამშრომლობით, პროექტის _ “იყავი მის ადგილზე” ფარგლებში, სხვადასხვა სამიზნე ჯგუფისთვის ტრენინგები გაიმართა.
ტრენინგები ითვალისწინებდა ადგილობრივი მოსახლეობის ცნობიერების ამაღლების ხელშეწყობას ძალადობის მსხვერპლთა დაცვისა და სწრაფი რეაგირების პროცესში.
რა კეთდება ჩოხატაურში ძალადობის მსხვერპლთა დასაცავად _ ამ საკითხის და არა მარტო ამის შესახებ “გურია ნიუსი” მერის თანაშემწეს, გენდერული საკითხებისადმი პასუხისმგებელი პირს ჩოხატაურის მერიაში და გენდერული თანასწორობის საბჭოს წევრს, მაია პაიჭაძეს ესაუბრა.
_ რა მნიშვნელობა აქვს მოსახლეობის ცნობიერების ამაღლებას და რამდენად არიან დღეს ჩოხატაურში მცხოვრებლები გათვითცნობიერებულები საკითხში, რასაც ძალადობა და მსხვერპლის დაცვა ჰქვია?
_ ჩოხატაურის მუნიციპალიტეტის მერიაში შეიქმნა ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების უწყებათაშორისი კომისია, რომელიც თანამშრომლობს საქართველოს მთავრობის გენდერული თანასწორობის, ქალთა მიმართ ძალადობისა და ოჯახში ძალადობის საკითხებზე მომუშავე უწყებათაშორის კომისიასთან და ჩოხატაურის მუნიციპალიტეტის გენდერული თანასწორობის საკითხებზე მომუშავე საბჭოსთან.
ქალთა მიმართ და ოჯახში ძალადობა გლობალური გამოწვევაა. მოსახლეობის ცნობიერების ამაღლებას უდიდესი მნიშვნელობა აქვს, უფრო მეტიც, ეს საუკეთესო პრევენციული ღონისძიებაა. ვფიქრობ, ჩვენი მუნიციპალიტეტის არც თუ უმნიშვნელო რაოდენობაა ინფორმირებული. რა თქმა უნდა, ბევრი სამუშაოა ჩასატარებელი და შესაბამისად, პროცესებიც აქტიურად მიმდინარეობს. ის, რომ გაიზარდა ძალადობის შემთხვევებზე ქალთა მიმართვიანობა, ეს არა შემთხვევების რაოდენობის ზრდით, არამედ ქალთა ინფორმირებულობის ამაღლებით აიხსნება, რაც კიდევ ერთხელ ადასტურებს არსებულ გამოწვევებზე თავდაუზოგავი შრომის აუცილებლობას.
_ რა კეთდება მუნიციპალიტეტის მასშტაბით ძალადობის მსხვერპლთა დასაცავად?
_ ჩოხატაურის მუნიციპალიტეტის ბიუჯეტში ძალადობის მსხვერპლი პირებისთვის გათვალისწინებულია ფულადი დახმარება: თუ ბენეფიციარი წარმოადგენს შესაბამისი ორგანოს მიერ გაცემულ შემაკავებელ ორდერს ან სასამართლოს გადაწყვეტილებას, რაც დაადასტურებს, რომ ის მსხვერპლია, მუნიციპალიტეტისგან შეძლებს ისარგებლოს ძალადობის მსხვერპლთათვის განკუთვნილი დახმარებით, საჭიროების შემთხვევაში, შესაძლოა, საცხოვრებელი ფართის დროებით უზრუნველყოფით.
ჩოხატაურის მერიაში, სოციალური და ჯანდაცვის სამსახურის ბავშვის უფლებების დაცვისა და მხარდაჭერის განყოფილება უზრუნველყოფს პრევენციული ღონისძიებების გატარებას, მოწყვლადი კატეგორიის ბავშვიანი ოჯახების მხარდაჭერას (სოციალურად დაუცველები, შშმ ბავშვები, მრავალშვილიანი ოჯახები).
ორი წლის წინ შეიქმნა კრიზისული ოჯახების დახმარების პროგრამა, რომელიც გაიცემა სოციალური მუშაკის მიერ ოჯახის მდგომარეობის შესწავლის შემდეგ. გვაქვს აქტიური თანამშრომლობა არასამთავრობო ორგანიზაცია “სოხუმთან”. საჭიროებისამებრ ხდება მათი სერვისების ბენეფიციარებისთვის შეთავაზება (სარეაბილიტაციო ცენტრი ბავშვიანი დედებისთვის; ფსიქოლოგის დახმარება. მერიის შესაბამის სამსახურს აქტიური თანამშრომლობა აქვს ადამიანით ვაჭრობის, ტრეფიკინგით დაზარალებულთა დახმარების სააგენტოს სოციალურ მუშაკთან. რეგიონში მოქმედებს “კრიზისული ცენტრი”.
_ რას გულისხმობს სწრაფი რეაგირება?
_ სწრაფი რეაგირება, უპირველესად, უსაფრთხოებას გულისხმობს _ რომ არ შეექმნას საფრთხე ადამიანის სიცოცხლესა და ჯანმრთელობას. საჭიროების შემთხვევაში, თანამშრომლობა შესაბამის ორგანოებთან.
_ თქვენი შეფასებით, რამდენად ეფექტური მექანიზმი აქვს სახელმწიფოს ძალადობის მსხვერპლთა დასაცავად და მოძალადეთა შესაკავებლად?
_ ოჯახში ძალადობის წინააღმდეგ ბრძოლა ჩვენი სახელმწიფოს, ჩვენი ხელისუფლების ერთ-ერთი პრიორიტეტული საკითხია. მოქმედებს ცხელი ხაზი, ქალთა და ოჯახში ძალადობის შემთხვევაში რეაგირების არსებული მექანიზმები, მათ შორის, დამცავი და შემაკავებელი ორდერები, ძალადობის მსხვერპლთა თავშესაფრები და კრიზისული ცენტრები.
ავტორი
