გუშინ, ცნობილი გახდა რომ ესპანური „ტენერიფესა“ და საქართველოს ეროვნული გუნდის ცენტრალური თავდამსხმელი გიორგი შერმადინი ესპანეთის 2022/23 წლების სეზონის ჩემპიონატის საუკეთესო მოთამაშე გახდა.
საინტერესოა, რომ ამ აღიარების შესახებ კალათბურთელმა თვითმფრინავში გაიგო, კუთვნილი პრიზი კი მისმა თანაგუნდელმა მარსელინიო უერტასმა გადასცა.
გიორგი შერმადინმა ეს ტიტული მეორედ მოიპოვა. ქართველი მოთამაშე სეზონის MVP პირველად 2020/2021 წლების სეზონში გახდა.
გუშინ, ყოფილმა სპორტულმა დირექტორმა და საფეხბურთო აგენტმა ენრიკო ფედელემ „ნაპოლის“ შესახებ ისაუბრა.
„როგორც ჩანს, სპალეტიმ წასვლა გადაწყვიტა. „ნაპოლიში“ ლუის ენრიკეს ან ანტონიო კონტეს სიამოვნებით ვიხილავდი. ვფიქრობ, ისინი ყველა პრობლემის მოგვარებას შეძლებდნენ. მართალია, ლუჩანომ დიდებული სამუშაო გასწია, თუმცა, ვფიქრობ, მწვრთნელი ორი წლის შემდეგ აუცილებლად უნდა შეიცვალოს, წინააღმდეგ შემთხვევაში, გუნდი კრიზისში აღმოჩნდება“, – განაცხადა ენრიკო ფედელემ.
ცნობილმა იტალიელმა ჟურნალისტმა ჯანკარლო დოტომ კი „ნაპოლის“ პრეზიდენტ აურელიო დე ლაურენტისისა და ამავე გუნდის მთავარ მწვრთნელ ლუჩანო სპალეტის შესახებ ისაუბრა.
„არ მინდა მიკერძოებული ვიყო, თუმცა არიან ადამიანები, რომლებიც ერთმანეთს ვერასდროს გაუგებენ. მათი კონფლიქტის შესახებ ჭორები გასულ სეზონშიც არსებობდა, მაშინ, როდესაც „ნაპოლის“ საქმეები არც ისე კარგად მისდიოდა.
აქამდე მათი შუამავალი ჯუნტოლი იყო. თუმცა ნეაპოლურ გუნდშიმისი მომავალი დიდი კითხვის ნიშნის ქვეშაა.
ვინ გაწვრთნის „ნაპოლის“? დე ლაურენტისს რაფა ბენიტესთან შესანიშნავი ურთიერთობა აქვს. ასევე არ გამოვრიცხავ ანტონიო კონტეს ვარიანტს. ვფიქრობ, ყველაზე რეალური სწორედ ეს ორი კანდიდატია“, – ასეთია ჯანკარლო დოტოს მოსაზრება.
გუშინვე, ვეტერანმა იტალიელმა ფეხბურთელმა ანტონიო კასანომ „ნაპოლის“ შესახებ კიდევ ერთხელ ილაპარაკა.
„დე ლაურენტისი კინემატოგრაფიის საკითხებში ფენომენალურია, თუმცა ფეხბურთის შესახებ არაფერი იცის. სპალეტიმ შესანიშნავი სამუშაო გაატარა და „ნაპოლის“ სკუდეტო მოაგებინა. მას შემდეგ კი დე ლაურენტისი მხოლოდ საკუთარ თავზე საუბრობს.
ის ყოველთვის ცდილობს ყურადღება საკუთარ თავზე ლაპარაკით მიიქციოს. უკეთესი იქნებოდა, თუ პირდაპირ იტყოდა, რომ სპალეტი რჩება და არსად წასვლას არ აპირებს. დარწმუნებული ვარ, ეს ასეც მოხდება“.
ფეხბურთის თაყვანისმცემლებს აინტერესებთ სად ითამაშებს მომავალ სეზონში არგენტინელი მსოფლიოს ჩემპიონი ლიონელ მესი. მესის „პარი სენ ჟერმენთან“ ხელშეკრულება მიმდინარე წლის ზაფხულში ეწურება. 35 წლის არგენტინელის დაბრუნებით „ბარსელონაა“ დაინტერესებული. არის საუბარი საუდის არაბეთიდან ფინანსურად მომხიბვლელ წინადადებაზე. მანამდე იწერებოდა მესის MLS-ის „ინტერ მაიმიში“ გადაბარგების შესაძლებლობაზეც.
გუშინ გავრცელებული ინფორმაციით, ფრანგული გუნდი მზადაა, მესის ახალი, 1+1 სქემით კონტრაქტი შესთავაზოს, რომელშიც ხელფასად წელიწადში 100 მილიონი ევრო იქნება გათვალისწინებული. „პსჟ“-ს კატარელ მეპატრონეებს არ სურთ არგენტინელი მოთამაშის საუდის არაბეთში გადაბარგება დაუშვან.
ასევე საინტერესოა მომავალ სეზონში ვინ გაწვრთნის „პსჟ“-ს. გუშინ გამოცემამ „L’Equipe“ გაავრცელა ცნობა, რომ „რომას“ ამჟამინდელი მთავარი მწვრთნელი ჟოზე მოურინიო თანახმაა, სამუშაოდ „პარი სენ-ჟერმენში“ გადაბარგდეს, თუკი ასეთი წინადადებით პარიზული კლუბიდან ოფიციალურად მიმართავენ.
იტალიურ მედიაში ამავდროულად ვრცელდება ინფორმაცია, რომ მოურინიოსა და „რომას“ ხელმძღვანელობას შორის ბოლო დროს ურთიერთობა დაძაბულია.
ჟოზე მოურინიო „რომას“ 2021 წლის ზაფხულიდან წვრთნის და კლუბთან ხელშეკრულება 2024 წლამდე აკავშირებს.
„განსაკუთღებული“ ფეხბურთის ისტორიაში ერთ-ერთ ყველაზე ტიტულოვანი სპეციალისტია. მისი ხელმძღვანელობით „პორტუმ“ და მილანის „ინტერმა“ ჩემპიონთა ლიგაში გაიმარჯვეს. ამას გარდა, პორტუგალიელმა „პორტუს“ 2003 წელს უეფას თასი მოაგებინა, 2017-ში „მანჩესტერ იუნაიტედს“ – ევროპალიგა, ხოლო 2022-ში „რომას“ – კონფერენსლიგა.
ავტორი
