კერძო სამხედრო კომპანია ვაგნერის ხელმძღვანელი, ევგენი პრიგოჟინის თქმით, როსტოვში აკონტროლებენ ყველა სამხედრო ობიექტს, მათ შორის აეროდრომს და სამხრეთ სამხედრო ოლქის შტაბს. მისივე თქმით, ჩამოაგდეს 3 ვერტმფრენები.
ასევე ავგნერის დამფუძნებელმა განაცხადა, რომ აკონტროლებენ რუსულ სამხედრო ობიექტებს ქალაქ ვორონეჟში.
“როსტოვში ვიმყოფებით. დილის 7:30 საათია. როსტოვის სამხედრო ობიექტები, მათ შორის აეროდრომი ჩვენი კონტროლის ქვეშაა… აქ ჩამოსვლის შემდეგ კიდევ ერთხელ დავადასტურეთ, რომ დიდი რაოდენობით ტერიტორია დაკარგულია, დაღუპული სამხედროები 3-4-ჯერ მეტნი არიან ვიდრე დოკუმენტებში ხვდება, ტელევიზორში კი დოკუმენტებში მოხვედრილ რაოდენობაზე 10-ჯერ ნაკლებზე ლაპარაკობენ. ზოგიერთ დღეს სანიტარული დანაკარგები 1000 ადამიანს აღწევს. მათ შორის არიან დაღუპულები, უგზო-უკვლოდ დაკარგულები, დაჭრილები და ისინი, ვინც უარს ამბობენ ბრძოლაზე არა იმიტომ, რომ ლაჩრები არიან, არამედ იმიტომ, რომ სხვა გამოსავალი არ აქვთ – საბრძოლო მასალა არ არის, ხელმძღვანელობა არ არის. გენერალური შტაბის უფროსი როგორც კი ჩვენი შენობასთან მოახლოების შესახებ გაიგო, აქედან გაიქცა.
ვორონეჟში სამხედრო ობიექტები გადაყვანილია ვაგნერის PMC-ის კონტროლის ქვეშ. ჯარი გადადის ხალხის მხარეს” – ამბობს პრიგოჟინი.
მისივე თქმით, სამხედრო ობიექტებზე კონტროლის დამყარების მიუხედავად, რუსეთის არმიის სამხედროებს სამუშაოს შესრულებაში და უკრაინის ფრონტზე ომის წარმოებაში ხელი არ ეშლებათ.
“ვაგნერის” დამფუძნებელთან ევგენი პრიგინჟინთან დაკავშირებული ტელეგრამ არხები ავრცელებენ ვიდეოს, რომლის მიხედვითაც, ვაგნერის დამფუძნებელი “აწარმოებს მოლაპარაკებებს” თავდაცვის მინისტრის მოადგილეს იუნუს-ბეკ ევკუროვთან და გენერალური შტაბის მთავარი დირექტორატის უფროსის მოადგილე ვლადიმერ ალექსეევთან.
პრიგოჟინი ევკუროვს აცნობა, რომ “ვაგნერელებმა” მესამე ვერტმფრენი ჩამოაგდეს და “გაგზავნის შემთხვევაში ყველაფერს ჩამოაგდებენ”. ევკუროვი ამ სიტყვებზე ხვნეშის. ამის შემდეგ თავდაცვის მინისტრის მოადგილე ძნელად გასარკვევ ფრაზას წარმოთქვამს, წინადადება მთავრდება სიტყვებით – “მოდით ვიფიქროთ რა ვქნათ”.
საპასუხოდ პრიგოჟინი ამბობს, რომ ადგილზე გენშტაბის უფროსის და სერგეი შოიგუს ნახვა უნდა.
“სანამ ისინი აქ იქნებიან, ჩვენ ვბლოკავთ ქალაქ როსტოვს და მივდივართ მოსკოვში”, – ამბობს პრიგოჟინი.
მანამდე ვორონეჟის ოლქის გუბერნატორმა განაცხადა, რომ “სამხედრო ტექნიკის კოლონა მოძრაობს M-4 Don ფედერალური გზატკეცილის გასწვრივ”. M-4 არის გზატკეცილი, რომელიც აკავშირებს ვორონეჟსა და დონის როსტოვს.
რუსეთში 23 ივნისს დაწყებული სამხედრო არეულობის შემდეგ ვაგნერელებმა ალყაში მოაქციეს ქალაქ დონის როსტოვში მდებარე სამხრეთის სამხედრო ოკრუგის შტაბის, შინაგან საქმეთა სამინისტროს, ფედერაციული უსაფრთხოების სამსახურის (ФСБ), როსტოვის ადმინისტრაციისა და პოლიციის ერთ-ერთი განყოფილების შენობები. მედიაში გავრცელებულ კადრებში ჩანს ჯავშანტექნიკა და მებრძოლები, რომლებიც შენობებს მიზანში იღებენ. როსტოვის გუბერნატორი, ვასილი გოლუბიოვი მოქალაქეებს ქალაქის ცენტრში გარეთ გასვლისგან თავის შეკავებას მოუწოდებს.
23 ივნისს პრიგოჟინმა თქვა, რომ ვაგნერის ბანაკებზე რუსეთის თავდაცვის სამინისტრომ სარაკეტო იერიში მიიტანა და საპასუხო მოქმედებებისთვის ემზადებოდნენ. ამის შემდეგ, მან განაცხადა, რომ საზღვარი გადაკვეთეს და როსტოვში შედიოდნენ. ის ასევე ირწმუნებოდა, რომ თავდაცვის სამინისტრომ თვითმფრინავებით ვაგნერის კოლონებზე დარტყმის ბრძანება გასცეს, რაზეც პილოტებმა უარი თქვეს.
“ხელს ვუშლით საკუთარი ტრა*ი გადაარჩინონ დამნაშავეებმა, რომლებმაც 100 000-მდე რუსი ჯარისკაცი გაანადგურეს, [ვალერი] გერასიმოვსა და [სერგეი] შოიგუს”. – თქვა ევგენი პრიგოჟინმა.
პრიგოჟინის თქმით, თავდაცვის მინისტრი სერგეი შოიგუ სპეციალურად ჩავიდა როსტოვში, რათა კსკ ვაგნერის განადგურების ოპერაცია ჩაეტარებინა. მისივე მტკიცებით, მინისტრი ქალაქიდან გაიქცა. პრიგოჟინის თქმით, მისი მოქმედებები არა სამხედრო გადატრიალება, არამედ “სამართლიანობის მარშია”.
პრიგოჟინი ყველაფრის განადგურებით იმუქრება. ამ დრომდე, მისი მტკიცებით, 2 ვერტმფრენი ჩამოაგდეს, მათ შორის ერთ-ერთი მოსკოვის ტრასაზე.
ავტორი
