დიმიტრი (დიმა) კვერღელიძე სწორედ იმ ასაკში წავიდა წუთისოფლიდან, როცა განათლებით, გამოცდილებით, მოტივაციით, ადამიანური დამოკიდებულებების ხარისხით, გამორჩეული პროფესიული კომპეტენციით, სრულყოფილების ზენიტში იყო.
ცხოვრების გზა, რომელიც მან გაიარა არ იყო ია-ვარდით მოფენილი. ნიჭიერმა, გამრჯე და მიზანდასახულმა ახალგაზრდამ, სკოლის ასაკიდანვე სწავლა განსაკუთრებით შეიყვარა. თბილისის სახელმწიფო უნივერსიტეტის დამთავრების შემდეგ კი, ინჟინერ-ეკონომისტის კვალიფიკაციით, საკუთარ კარიერაში საფეხურეობრივად დაიწყო წინსვლა. ზედმეტი და აჩქარებ ული ნაბიჯი არასდროს გადაუდგამს. მისი საქმიანობა, როგორც საჯარო, ისე კერძო სამსახურში, მუდამ პასუხისმგებლობისა და განათლების მაღალ სტანდარტს ექვემდებარებოდა . საქართველოს საგადასახადო დეპარტამენტის სტრუქტურაში, პასუხსაგებ თანამდებობებზე, მრავალი წელი იმუშავა. განსაკუთრებით საპასუხისმგებლო კი მისთვის, რასაც ხშირად აღნიშნავდა, იყო საჯარო სამსახურში მუშაობა.
2012 წელს ის ოზურგეთის საკრებულოს წევრი გახდა. შემდეგ კი იყო საკრებულოს თავმჯდომარის მოადგილე.
დიმიტრი კვერღელიძემ საზოგადოების პატივისცემა და სიყვარული სწორედ ამ თანამდებობაზე მოსვლის შემდეგ განსაკუთრებით მოიპოვა. ის მაქსიმალურად ცდილობდა, წესისა და კანონის დაცვით მიდგომოდა ნებისმიერ საკითხს, რაც საკრებულოს მუშაობას და ზოგადად, სახალხო საქმეს ეხებოდა. ნებისმიერი გადაწყვეტილების მიღებისას, ცდილობდა ყოფილიყო კომპეტენტური, სამართლიანი და რაც მთავარია, სულ მოწადინებული იყო, გადაწყვეტილება მხოლოდ კოლეგებთან შეთანხმებით მიეღო. თან ისეთი, რაც საზოგადოების ნებისმიერი წევრის კეთილდღეობაზე იქნებოდა გათვლილი.
მის მიერ ინიცირებულ არაერთ საკითხთა შორის, განსაკუთრებით გამორჩეული და ატაცებული იქნა, ნიჭიერი ახალგაზრდების თანადგომა, რაც დღემდე დიდი წარმატებით ხორციელდება. ეს იყო ერთიანი ეროვნული გამოცდების მიხედვით, ასპროცენტიანი გრანტის მფლობელი ახალგაზრდებისთვის, მშობლიური მუნიციპალიტეტისგან ჯილდოდ სამი ათასი ლარის, ხოლო აღმზრდელი სკოლისგან ათასი ლარის ჯილდოდ გადაცემა. ჯერ კიდევ 2013 წელს, ეს გადაწყვეტილება მან, საგანმანათლებლო რესურსცენტრში, სკოლების დირექტორებს გააცნო. ერთსულოვანი მხარდაჭერის შემდეგ, ეს პროექტი დღემდე მოქმედებს და ერთი უწარმატებულესია, რომელმაც საზოგადოების დიდი მხარდაჭერა მოიპოვა.
დიმიტრი კვერღელიძე განსაკუთრებული კომუნიკაბელურობით გამოირჩეოდა. ზრდილი, აწონილი სიტყვა-პასუხით არასდროს შედიოდა მოქალაქეებთან კონფლიქტურ ურთიერთობაში და მუდამ ხალხის მხარდასაჭერად იყო მზად…
საუკეთესო და სამაგალითო იყო, როგორც მამა და მეუღლე.
ძალზე რთულია, ძნელია, ჩვენო დიმა, ვისაუბროთ ყველა იმ ღირსეულ ნაბიჯზე, რაც გადაგიდგამს ცხოვრებაში, როგორც საჯარო მოხელეს და როგორც მოყვას ადამიანს…კიდევ უფრო ძნელია, რომ დღეს შენზე წარსულ დროში ვსაუბრობთ… თუმცა, წუთისოფელმა სხვა გზა არ დაგვიტოვა…
ნათელში ბრწყინავდეს შენი ლამაზი სული, სიცოცხლეზე გულდაწყვეტილო, მშობლიურ ოზურგეთსა და სამშობლოზე უსაზღვროდ შეყვარებულო ვაჟკაცო!
მუდამ მოგიგონებთ და გვემახსოვრები ისე, როგორც ღირსხარ, ჩვენო დაუვიწყარო მეგობარო!
მეგობრები
26.06.2023
