ჩოხატაურის, მუნიციპალიტეტის მერიასთან გაიმართა სოფელ სურების მოსახლების მიერ დაორგანიზებული აქცია, სადაც შეკრებილი, საზოგადოების წარმომადგენლები აპროტესტებდნენ სოფელ სურებში ჰესის მშენებლობას.
_ აქცია იყო ჰესებთან დაკავშირებით. გვქონდა ინფორმაცია, რომ უნდა ამოსულიყვნენ და უნდა ესაუბრათ ჰესების შესახებ და აპირებენ ჯერ ერთი ჰესი ითხოვეს და უნდოდათ, მერე ორი ჰესის აშენება მოინდომეს და ამდენი მოსახლე ვინც ნახეთ ყველა უარზეა. არ სურთ ამ ჰესების აშენება, იმიტომ, რომ იმდენად შლადია ეს ჩვენი მიწა და ეს ჩვენი ხეობა, რომ ასეთ მშენებლობას, ასეთ ტექნიკის ამოყვანას ვერც გაუძლებს და არც გვინდა. მერე ერთადერთი ჩვენი სიმდიდრე ასე ვთქვათ სურებლებისა არის ხეობა, სიმწვანე, ეს ტყე და სუფსა, რომელშიც არის „სამეფო კალმახი“. მოგეხსენებათ ის შეტანილია წითელ წიგნში და არ გვინდა, რომ ეს ყველაფერი, ეს სილამაზე , ეს ჩვენი სიმდიდრე დაირღვეს. ამიტომ დავაფიქსირეთ ჩვენი აზრი იქაც, ბატონ დავითთანაც”, _ გვითხრა აქციის ერთ-ერთმა მონაწილემ მარინა ბარამიძემ.
შეკრებილებს შეხვდა მერი დავით შარაშიძე, რომელმაც არსებული ინფორმაცია კატეგორიულად უარყო.
_ მე, დღევანდელ დღეს ვერ დავარქმევდი აქციას. სოფლის მოსახლეობა იყო ჩამოსული, რადგან გავრცელდა არასწორი ინფორმაცია, ჭორი და შესაბამისად გავარკვიეთ, რა არის სიმართლე. ხელისუფლება ყოველთვის დგას საზოგადოების გვერდით, რაც არის საზოგადოების დაკვეთა ვასრულებთ ჩვენ იმას, თითეული ნაბიჯი, თითეული ახალი პროექტი, თითეული გაკეთებული საქმე იქნება ჩვენს საზოგადოებასთან და ჩვენს ხალხთან შეთანხმებული. სურებში ჰესი არ აშენდება”,_ თქვა „გურია ნიუსთან“ საუბრისას მერმა დავით შარაშიძემ.
