გუშინ, „ნაპოლის“ მთავარმა მწვრთნელმა რუდი გარსიამ იტალიურ მედიას ინტერვიუ მისცა და რასაკვირველია ხვიჩა კვარაცხელიაზეც ისაუბრა:
„კვარაცხელია? ბურთით ის უბრალოდ გენიოსია და რასაც ამ დროს აკეთებს, ამის ცქერა ჩემთვის დიდი სიამოვნებაა. მაგრამ ეს არის ფეხბურთელი, რომელსაც კიდევ შეუძლია მომატება“, – განაცხადა ფრანგმა სპეციალისტმა.
რამდენიმე დღის წინ, ინგლისის პრემიერლიგის პირველ ტურში „ბარნლისთან“ მიღებული ტრავმის გამო „მანჩესტერ სიტის“ ბელგიელი ლეგიონერი კევინ დე ბრუინი 3-4 თვეს გამოტოვებს.
პეპ გვარდიოლას გუნდი სასწრაფოდ დე ბრუინის შემცვლელის ყიდვის საჭიროების წინაშე დგას.
გუშინ, ბრიტანულმა გამოცემამ „Goal“ მანჩესტერულ გუნდს ხვიჩა კვარაცხელიას შეძენა ურჩია და ამისი მიზეზებიც განმარტა.
„ერთი წლის წინ მისი სახელი ალბათ ძალიან ცოტა გულშემატკივარმა იცოდა, თუმცა დღესდღეობით ქართველი მსოფლიოში ერთ-ერთი ყველაზე მოთხოვნადი მოთამაშეა, მას შემდეგ, რაც ნაპოლის“ „სერია A“-ს ტიტულის მოგებაში დაეხმარა.
კვარაცხელიამ, რომელსაც „კვარადონას“ უწოდებენ, გასულ სეზონში იტალიის ჩემპიონატში 12 გოლი გაიტანა და 10 საგოლე პასი შეასრულა. 22 წლის ფეხბურთელს დრიბლინგის შესრულების წარმოუდგენელი ნიჭი აქვს. უნდა აღინიშნოს, რომ პრესინგის თამაშიც მისი ერთ-ერთი ძლიერი მხარეა.
„სიტის“ გულშემატკივრებს ქართველი ფეხბურთელების მიმართ უდიდესი სიყვარული გააჩნიათ, რაც ამ გუნდისათვის არც ისე კარგ პერიოდში გიორგი ქინქლაძის ბრწყინვალე თამაშმა განაპირობა. ეჭვგარეშეა, ქართული ფეხბურთის ჯერჯერობით ბოლო ვარსკვლავს ქალაქ მანჩესტერში გაშლილი ხელებით მიესალმებიან.
დე ბრუინის ტრავმა კლუბმა არა პრობლემად, არამედ შესაძლებლობად უნდა მიიჩნიოს, დიდი ალბათობით, ბელგიელის შეცვლა 2-3 წელიწადში საჭირო მაინც გახდება. მიუხედავად ფოდენის მიმართ პატივისცემისა, ინგლისელი კევინის სრულყოფილ შემცვლელად ვერ მოიაზრება.
ამ მიზეზების გამო „მანჩესტერ სიტიმ“ ყველაფერი უნდა გააკეთოს ხვიჩა კვარაცხელიას შესაძენად. ქართველის ტრანსფერის სავარაუდო თანხა 90 მილიონ ფუნტამდე აღწევს, თუმცა 22 წლის ასაკში მან უკვე დააფიქსირა ის შედეგები, რაც პეპ გვარდიოლას გუნდს ამჟამად ჰაერივით სჭირდება“, – დაწერა გამოცემამ.
საქართველოს ნაკრებისა და ფრანგული „მეცის“ თავდამსხმელი გიორგი მიქაუტაძე კი ინგლისის პრემიემიერლიგის კლუბში გადასვლასთან ახლოსაა. ქართველი თავდამსხმელის გადაბირებით ლონდონის „ვესტ ჰემი“ დაინტერესდა.
მიქაუტაძის მოსალოდნელი ტრანსფერის შესახებ გამოცემამ „Le10Sport“ დაწერა:
„გასულ უქმეებზე, 2023-2024 წლების სეზონის პირველ ტურში თამაშის შემდეგ, გიორგი მიქაუტაძეს აშკარად აქვს მომავალი. საქართველოს ნაკრების 22 წლის ფეხბურთელი ალმასია, რომლის შენარჩუნებაც „მეცს“ სურს. მისი მწვრთნელი ლასლო ბოლონი კი არ ერიდება სახალხოდ მისადმი სიყვარულის გამჟღავნებას: „ის ჩემს შვილს მაგონებს…“. თუმცა, „მეცის“ ტალანტის მიმართ მოთხოვნა დიდია.
მიქაუტაძე ამ დროისთვის „ლიგა 1“-ის ერთ-ერთი ყველაზე პოპულარული ტალანტია. უცხოური კლუბებისგან ორი, ძალიან კარგი შეთავაზების შემდეგ, „მეცი“ 20 მილიონ ევროს ჯიუტად ითხოვს – ეს ის თანხაა, რომელიც ჯერჯერობით ვერცერთმა ფრანგულმა კლუბმა გაიმეტა. და ჩვენი ინფორმაციით, სულ ახლახან საქმეში „ვესტ ჰემი“ ჩაერთო“.
„ცრვენა ზვეზდას“ მცველი ირაკლი აზაროვი, დიდი ალბათობით, კარიერას „შახტარში“ გააგრძელებს.
აზაროვი კიევში გაფრინდება, სადაც დონეცკური კლუბის წარმომადგენლებს პირადი კონტრაქტის საბოლოო დეტალებზე გაესაუბრება, ტრანსფერის სავარაუდო თანხად კი 3 მილიონი ევრო სახელდება.
საინტერესოა, რომ „შახტარის“ ღირსებას კიდევ ერთი ქართველი, – გიორგი გოჩოლეიშვილი იცავს.
ავტორი
