დღეს, იტალიის „სერია A“-ს მე-4 ტურში ხვიჩა კვარაცხელიას „ნაპოლი“ „ჯენოას“ ესტუმრება. იტალიური სპორტული მედიის მტკიცებით, ნეაპოლური გუნდის მთავარი მწვრთნელი რუდი გარსია შემადგენლობაში ორ ცვლილებას განახორციელებს.
„ნაპოლის“ ძირითად შემადგენლობაში მატიას ოლივერას ნაცვლად მარიო რუის ვიხილავთ. დიდი ალბათობით, ფრანკ-ზამბო ანგისა ძირითად თერთმეტეულში ადგილს ვერ მოხვდება, კამერუნელ ნახევარმცველს ტრავმა აწუხებს.
„ნაპოლისა“ და „ჯენოას“ მატჩი თბილისის დროით 22:45 საათზე გაიმართება.
ხვიჩა კვარაცხელიას კი 19 მარტიდან უგოლო სერია აქვს. გამოცემა „Tuttosport“ ამ უიღბლო სერიას გამოეხმაურა და დაწერა, რომ კვარა ძალიან გაბრაზებულია.
„16 სექტემბერი იქნება 181-ე დღე, რაც ხვიჩა კვარაცხელიას „ნაპოლიში“ გოლი არ გაუტანია, ხოლო ეროვნულ ნაკრებში ბოლოს თავი გასული წლის 26 სექტემბერს გამოიჩინა. ეს უჩვეულო ფაქტია, რადგან ყოველთვის რეგულარულად მონაწილეობდა საგოლე ფაზებში, განსაკუთრებით საქართველოს ნაკრებში, სადაც 5 მატჩია არ გაუტანია, მაშინ, როდესაც მანამდე 6 თამაშში 5 გოლი და 3 საგოლე პასი ჰქონდა.
გარსია გაბრაზებულ კვარას იღებს, არა მხოლოდ იმიტომ, რომ თავის დონეზე ვერ თამაშობს, არამედ იმიტომაც, რომ ბოლო ორ მატჩში საქართველოს ნაკრებმა მხოლოდ 2 გოლი გაიტანა და 9 გაუშვა, ხოლო კვარას კარისკენ მხოლოდ 2 და კარში 1 დარტყმა ჰქონდა, საგოლე პასიც არ გაუკეთებია“, _ დაწერა გამოცემამ.
გამოცემამ „Sportmediaset“ „ნაპოლის“ დანიელი ახალწვეულის, იესპერ ლინდსტრომის შესახებ დაწერა და ხვიჩა კვარაცხელიაც ახსენა:
„იესპერ ლინდსტრომი იყო „ნაპოლის“ ყველაზე ხმაურიანი ტრანსფერი გასულ ზაფხულს: ევროპის ერთ-ერთი უნიჭიერესი ახალგაზრდა და უზარმაზარი პოტენციალის მქონე ფეხბურთელი. გადაიხადეს 30 მილიონი ევრო და ფიზიოლოგიური ადაპტაციის პერიოდი გაიარა, მაგრამ მზადაა თავისი თვისებები გამოავლინოს. პოლიტანოს ტრავმითა და ლოზანოს წასვლით, მარჯვენა ფლანგი მისი საბრძოლო ველი იქნება, რითაც ის კვარაცხელიასაც გაათავისუფლებს ორმაგი მეურვეობისგან, რადგან მეტოქეებს ყურადღების მიქცევა მასზეც მოუწევთ“.
გუშინ, „ჯენოას“ მცველმა სტეფანო საბელიმ განაცხადა, რომ „ნაპოლისთან“ მატჩში მათ ნებისმიერი ფეხბურთელის წინააღმდეგ დიდი ყურადღება დასჭირდებათ, რადგან „ნაპოლის“ მხოლოდ ხვიჩა კვარაცხელია და ვიქტორ ოსიმენი არ ჰყავს.
„ბედნიერები უნდა ვიყოთ ასეთ ცნობილ გუნდებთან თამაშით. ეს არის ჯილდო, რომელიც შარშან მოვიპოვეთ. კვარაცხელიას და ოსიმენს დავუპირისპირდებით, მაგრამ ასევე მთელ „ნაპოლის“, რადგან მათ ჰყავთ 15-20 ფეხბურთელი, რომლებსაც ნებისმიერ მომენტში შეუძლიათ განსხვავების შექმნა“,_ განაცხადა სტეფანო საბელიმ.
ცნობილი გახდა, რომ ნეაპოლური კლუბი 2024 წლის იანვარში წამყვანი ფეხბურთელების, ვიქტორ ოსიმენისა და ანდრე-ფრანკ ზამბო ანგისას გარეშე დარჩება. ამის მიზეზი აფრიკის თასია.
2024 წლის აფრიკის თასი 13 იანვარს დაიწყება და 11 თებერვალს დასრულდება. შესაბამისად, ამ პერიოდში აფრიკელი ფეხბურთელები ნეაპოლელებს ვერ დაეხმარებიან.
კონკრეტული თარიღები, როდესაც ისინი გუნდს გამოაკლდებიან უცნობია, რადგან ეს იმაზე იქნება დამოკიდებული, რამდენად შორს გავლენ ტურნირზე ნიგერიისა და კამერუნის ნაკრებები.
ოსიმენი და ანგისა „ნაპოლისთვის“ პრაქტიკულად შეუცვლელი მოთამაშეები არიან, მაგრამ რუდი გარსიას აქვს ალტერნატიული ვარიანტები – ოსიმენის ნაცვლად ჯოვანი სიმეონე და ჯაკომო რასპადორი, ხოლო ანგისას ნაცვლად ელიფ ელმასი და იენს კაიუსტე.
ავტორი
