ჩოხატაურის მუნიციპალიტეტის, კურორტ ბახმაროში და ოზურგეთის მუნიციპალიტეტის სოფელ უკანავაში (მთისპირის თემი) ბახვი ჰესის ორგანიზებით მედიატური მოეწყო _ აქ ეს კომპანია ორი ჰესის (ბახვი-2 და ბახვი-1) მშენებლობას გეგმავს.
ამ ეტაპზე, კომპანიას ბახვი 2-ის მშენებლობისთვის ყველა სახის დოკუმენტაცია და საბუთები აქვს მოპოვებული. რაც შეეხება ბახვი-1-ს, პროექტს მიღებული აქვს გარემოსდაცვითი ნებართვა და ამჟამად კომპანია სამშენებლო ნებართვის მოპოვების პროცესშია.
პირველი გაჩერება ბახმაროში, მზის ჩასვლის გორასთან შედგა. მანძილი ბახმაროდან სათავე ნაგებობამდე სამი კილომეტრია, ხოლო სიმაღლეთა სხვაობა 120-400 მეტრია. აქედან კარგად ჩანს, თუ როგორ მოხდება ბაისურას და ბახვისწყლის შეერთების ადგილთან სათავო ნაგებობის განთავსება.
სოციალურ ქსელში, ადამიანთა ჯგუფები ხშირად ამახვილებენ ყურადღებას, რომ აქ ჰესის მშენებლობა ბახმაროს კლიმატს შეცვლის და მას უნიკალურობას დაუკარგავს. ამის შემდეგ კი, მათი თქმით, კურორტი მიმზიდველი აღარ იქნება.
მსგავსი ინფორმაცია ჯერ კიდევ 2012 წელს გავრცელდა, როდესაც უკანავაში ბახვი 3-ის მშენებლობა დაიწყო („ბახვი ჰესის“ კომპანიას ამ მშენებლობასთან შეხება არ აქვს) _ მაშინაც „ბახვი 3“-ის მშენებელი კომპანია აქ რამდენიმე ჰესის აშენებას აპირებდა.
კავკასიის განახლებადი ენერგიის ჰოლდინგის, გარემოს დაცვისა და სოციალური მმართველობის მენეჯერი, ნანა ბერძენიშვილი ჟურნალისტებს გვიხსნის, რომ ბახვი 1-ის შენობა-ნაგებობა არის ძალიან პატარა და ის ვერანაირ ზეგავლენას ვერ მოახდენს გარემოზე. მისივე თქმით, ბახმაროში ნისლის წარმოქმნაზე პასუხისმგებელია შავი ზღვა _ სწორედ შავი ზღვიდან აორთქლებული წყალი ხვდება მთის ცივ ჰავას და წარმოიქმნება ნისლი. ამ პროცესს კი ეს მცირე ჰესი კი ხელს ვერანაირად ვერ შეუშლის.
ნანა ბერძენიშვილი: „რაც არის ძალიან მნიშვნელოვანი, ყველაზე ხშირად ისმოდა პროექტთან მიმართებაში ის, რომ სათავო ნაგებობა დაამახიჯებდა მზის ჩასავალი გორის ვიზუალურ მხარეს. ნაგებობა არის ძალიან პატარა, შენობა მოსახვევში აშენდება. შეგუბება, დაახლოებით ისეთი იქნება, როგორიც არის ბახვი -3-ჰესზე.
ჩვენთან, ჩოხატაურში და ოზურგეთში, არის თევზსაჭერი რამდენიმე მეურნეობა. იმათი შეგუბებები საკმაოდ დიდია და ამ მოცულობისშეგუბებას რომ შეეძლოს კლიმატის შეცვლა, უკვე შეცვლილი იქნებოდა“, _თქვა ნანა ბერძენიშვილმა.
ბახმაროს შემდეგ, სოფელ უკანავაში გავემგზავრეთ. ამ ეტაპზე მიმდინარეობს გზის გაჭრის და ბახვი 2-ისთვის საჭირო შენობა-ნაგებობების სამშენებლო პროცესი. ადგილზე მიტანილია 490 ცალი, 13 მ სიგრძის მილი, რომელთა დიამეტრი სხვადასხვაა. ეს მილები გამოყენებული იქნება მდინარის ნაკადის გასატარებლად.
ჩვენს კითხვაზე, მდინარე ბახვისწყლის სათავიდან ნაკადის რა ნაწილი დარჩება ისევ კალაპოტში, რომ თევზებს აუცილებელი ჰაბიტატი იყოს შენარჩუნებული და ასევე, ფლორის და ფაუნის საზიანო ცვლილება არ მოხდეს, ბახვი ჰესის დირექტორმა გიორგი აბრამიშვილმა განმარტა, რომ კალაპოტში დარჩება იმ რაოდენობის წყალი რაც გზშ-თი არის დამტკიცებული და სრულებით საკმარისია იმისთვის რომ შესაბამისი გარემო შენარჩუნდეს.
სოციალურ ქსელში ზოგიერთი მომხმარებლის მიერ გავრცელებული ინფორმაციით, ამ ადგილებში, სადაც ჰესის მშენებლობაა დაწყებული, 60 ჰექტარ ფართობზე მოიჭრა ხეები და ტყე, ფაქტობრივად, განადგურებულია. ამ ინფორმაციას არ ადასტურებენ და სრულ სიცრუეს უწოდებენ ბახვი ჰესის წარმომადგენლები.
პროექტის წარმომადგენლები ჩვენთან საუბრის დროს აღნიშნავდნენ რომ, „პროექტის გახორციელების პროცესში გარდაუვალია რიგ მონაკვეთებზე ხეების მოჭრა, თუმცა, გარემოს დაცვითი ღონისძიების უმაღლესი სტანდარტების შესაბამისად, კომპანია იღებს ვალდებულებას, რომ ზემოქმედების ქვეშ მოქცეულ ყოველი 1 ჰექტარი ტყის საპირწონედ, მოხდება ტყის განაშენიანება 2 ჰექტარ ფართობზე, ანუ ორმაგად! ესე იგი შესაბამისად, პროექტების ზემოქმედების ქვეშ მოქცეული ტყის საფარის საპირწონედ განაშენიანდება, მინიმუმ, 2-ჯერ მეტი“.
ნანა ბერძენიშვილი: “ხეების მოჭრა მხოლოდ პროექტის კორიდორში ხდება, იქ, სადაც უნდა გატარდეს ტექნიკა ან სადაც უნდა ჩაიდოს მილი. ყველა დაგეგმილი საქმიანობა ხდება გაცემული ნებართვების ფარგლებში“
ინფორმაციისთვის, ოზურგეთის მუნიციპალიტეტის საერთო ფართობი 68 166 ჰექტარია, საიდანაც, 22 164 ჰექტარი ტყის ფონდს უჭირავს. ბახვი 2 ჰესის საპროექტო ტერიტორია კი 20 ჰექტარს შეადგენს, რაც მთლიანი ტყის საფარის 0.09%-ია. რაც შეეხება ჩოხატაურის მუნიციპალიტეტს, იქ პროექტის მხოლოდ 5% განთავსდება. ჩოხატაურის მუნიციპალიტეტი 82338 ჰექტარია, საიდანაც ტყის ფართობი 54260 ჰექტარია, ბახვი 1 ჰესის ტერიტორიის ფართობი კი 0278 ჰექტარია.
ავტორი
