წელს, გაზაფხულზე ოზურგეთის მუნიციპალიტეტის დაბა ნარუჯის სკოლის მოსწავლემ, თიკო აბაშიძემ გადაწყვიტა, რომ ნარუჯის ბიბლიოთეკა ახალი წიგნებით და საჭირო ინვენტარით გაემდიდრებინა.
თიკო აქტიური სამოქალაქო აქტივისტი და ოზურგეთის ლიდერთა სკოლის მოსწავლეა.
თიკო აბაშიძე: მაშინ, როცა გავაანალიზე დაბის და ახალგაზრდების საჭიროებები, დავიწყე ფეისბუქის საშუალებით წიგნების და ბიბლიოთეკისთვის საჭირო ინვენტარების შეგროვება. ეს ყველაფერი იმ ფაქტმაც განაპირობა, რომ ძალიან მიყვარს ლიტერატურა, ბიბლიოთეკები და შემეცნებითი სახის შეხვედრები ან პროექტები. მოგეხსენებათ, რომ რეგიონებში და მითუმეტეს, დაბებში ძალიან მწვავე და აქტუალური საკითხია მსგავსი სივრცეების ნაკლებობა. ბევრ ადგილას არ არის ახალგაზრდული თავშეყრის ადგილი, სადაც მოსწავლეებს და ახალგაზრდებს შეეძლებათ დროის სწორად და ნაყოფიერად გატარება, სიახლეების და ცოდნის მიღება. როცა იდეა დამებადა, რომ დაბაში რაღაც ახალი უნდა შემექმნა, ერთი წამითაც არ მიფიქრია, რომ უკან დავიხევდი ან რამე არ გამომივიდოდა, პირიქით, მჯეროდა ჩემი შესაძლებლობების და იმ დღესვე დავიწყე ამ საკითხზე მუშაობა. თავიდან ვუკავშირდებოდი მხოლოდ წიგნების გამომცემლობებს, ჩემი საყვარელი “სულაკაურის“ გამომცემლობიდან დავიწყე, რომელმაც, რა თქმა უნდა, წიგნები გამომიგზავნა. შემდეგ იყვნენ სხვებიც, ძალიან მალე მიკავშირდებოდნენ მხარდამჭერები და მიგზავნიდნენ წიგნებს.
წიგნების შემდეგ მივხვდი, რომ გამომცემლობების გარდა, მჭირდებოდა კიდევ სხვა, ამჯერად დიდი კომპანიები; ჩემს შემთხვევაში ესენი აღმოჩნდნენ “სოკარი” და “თეგეტა ჰოლდინგი”, რომლებმაც წიგნები და წიგნების ვაუჩერები გადმომცეს. ყოველი ნაბიჯის შემდეგ სულ უფრო იზრდებოდა ჩემი მხარდამჭერთა სია და სულ უფრო წინ მივიწევდი. შემდეგ დავუკავშირდი გიორგი კეკელიძეს, ძმებ არველაძეებს, თემურ ჭყონიას და ა.შ. (ნამდვილად ბევრია მხარდამჭერთა რაოდენობა). ბიბლიოთეკა ამ ეტაპზე გადის ძალიან სერიოზულ და მნიშვნელოვან პროცესს, რაც იმას გულისხმობს, რომ ბოლო ეტაპს ვუახლოვდები და სადაცაა გავხსნი. ცოტა ხნის წინ „ქართული ოცნების ოზურგეთის ახალგაზრდული ორგანიზაციის” წევრები გვსტუმრობდნენ. ბიბლიოთეკას წიგნები და საკანცელარიო ნივთები გადმოსცეს საჩუქრად.
თიკო აბაშიძე ფიქრობს, ბიბლიოთეკის გახსნა დეკემბერში შეძლებს.
_ ბიბლიოთეკის გახსნა დამოკიდებულია რესურსების სრულად მობილიზებასა და უზრუნველყოფაზე. ამ ეტაპზე დამრჩა რესურსების რაღაც ნაწილი შესაგროვებელი, თუმცა, ვფიქრობ, ეს ყველაფერი არაუგვიანეს, დეკემბრის დასაწყისამდე უნდა მორჩეს. დაბა ნარუჯიდან ყველაზე მეტად თუ ვინმე მიდგას გვერდით და მიჭერს მხარს, ეს გახლავთ სივრცის ბიბლიოთეკარი, გვანცა გაბისიანი, რომელიც ძალიან კარგი ადამიანია და სულ მზად არის ჩემს დასახმარებლად. ასევე, აქტიური მოსწავლეები, რომლებიც ძალიან დიდი ინტერესით და ყურადღებით ელიან სივრცის გახსნას და შემდეგ ამ სივრცით სარგებლობას.
რთულია ამ ადამიანებზე მოკლე ფრაზებით საუბარი, მაგრამ ვიმედოვნებ, რომ უფრო ფართოდაც გავშლი ამ თემას. მინდა, ვახსენო ის ადამიანებიც, რომლებიც მამხნევებენ და ძალას მმატებენ, რომ უფრო მეტი შევძლო და გავაკეთო, რაც ძალიან საჭირო და აუცილებელია ამ ეტაპისთვის. სიმართლე გითხრათ, საერთოდ არ მეგონა, თუ ჩემი საქმე და იდეა ასეთ შედეგზე გავიდოდა და უამრავ ადამიანს გამაცნობდა, ვინც მხარი დაუჭირა ჩემს ინიციატივას. თავიდან ჩუმად ვაკეთებდი ყველაფერს, არ მინდოდა ხალხს სცოდნოდა. შემდეგ, ჩემი მეგობრის დაჟინებული თხოვნით, გადავწყვიტე, გამეჟღერებინა, რადგან ასე უფრო შედეგის მომტანი იქნებოდა. აი, აქედან დაიწყო ყველაფერი. თავიდან მარტივი მეგონა და ისიც მეგონა, რომ მალე მოვრჩებოდი ამ ყველაფერს, მაგრამ დღითიდღე უფრო ვიზრდებოდი ბიბლიოთეკასთან ერთად და მით უფრო დიდ დროს ვანდომებდი ყველა დეტალს და სამუშაოს. დღეს კი, ამდენი ხნის შემდეგ, ვერ ვიჯერებ, რომ ეს ყველაფერი გამოვიარე, მაგრამ კიდევ ერთხელ ვიტყვი, საკუთარი თავის რწმენა ყველაფერს ნიშნავს. საკუთარი თვითდაჯერებულობა რომ არა, ალბათ, ამდენს ვერ გავაკეთებდი.
ვისაც სურვილი აქვს, წვლილი შეიტანოს კეთილ საქმეში, შეუძლია თიკო აბაშიძეს მიწეროს ფეისბუქმისამართზე _ https://www.facebook.com/abashidze.tiko.3
ავტორი
