“ჩვენ ამას, რა თქმა უნდა, არ მოვითმენთ” – თავდაცვის მინისტრი

საქართველოს თავდაცვის მინისტრმა ჯუანშერ ბურჭულაძემ მთავრობის სხდომის შემდეგ გამართულ ბრიფინგზე განაცხადება გააკეთა  „ტვ პირველის“ ეთერში გასულ ინფორმაციასთან დაკავშირებით, რომლის მიხედვითაც ქართულ ჯარს უხარისხო საკვები და ფორმები მიეწოდება.

თავდაცვის მინისტრმა გავრცელებულ ინფორმაციას ჯარის დისკრედიტაციისკენ მიზანმიმართული ქმედება უწოდა და აღნიშნა, რომ   შექმნილია 4 სხვადასხვა ქვედანაყოფი, რომელიც ხარისხის კონტროლს ეწევა.

„მინდა განცხადება გავაკეთო რეპორტაჟზე, რომელიც გავიდა თავდაცვის ძალების, თავდაცვის სამინისტროს წინააღმდეგ და ავხსნა ეს რატომ ემსახურება ფარულად თუ ღიად ჯარის დისკრედიტაციას. ჩვენ გვქონდა შემთხვევები, როდესაც ჩემი ოჯახის წევრებს ეხებოდნენ, ასევე, რა თქმა უნდა, სიცრუით შემოფარგლული ინფორმაციით, თუმცა ჩემი თმენის ვალდებულებით და სხვა საჯარო მოხელის ვალდებულებებით, მე ამას არ ვუპასუხე შეგნებულად, თუმცა ჩვენ არასდროს არ დავტოვებთ რეაგირების გარეშე, როდესაც საქმე ეხება ჩვენს ჯარს. ინფორმაცია, რომ თურმე ჯარში შედის უხარისხო კვება, არის აბსოლუტურად აცდენილი რეალობას და არის ეს ჯარის დისკრედიტაციის მცდელობა. თქვენ წარმოიდგინეთ, რომ ჩვენ 4 სხვადასხვა მექანიზმი შევქმენით ხარისხის კონტროლის, ზუსტად იმიტომ, რომ ჩვენმა ჯარმა მიიღოს საუკეთესო პროდუქტი. ასევე რადიკალურად არსებითად გავაუმჯობესეთ საკვები პროდუქტის ხარისხი, რაც ხაზგასმით და სრული პასუხისმგებლობით ვაცხადებ, არასდროს დაახლოებული ხარისხის პროდუქტი არ ყოფილა ჩვენს ჯარში. შედის ქართული გაუყინავი ხორცი, შედის ისეთი მომწოდებლის მიერ მოწოდებული ყველი, რომელიც აწვდიდა ყველაზე ძვირფას სუპერმარკეტს საქართველოში. ეს არის რეალობა. ჯარში დღეს შემოდინება გვაქვს ისეთ ნიშნულზე, რაც არ ყოფილა ბევრი წლის განმავლობაში. ეს არის კონკრეტული პასუხი დისკრედიტაციაზე, რასაც ეწევიან ჩვენი ოპოზიციური არხები. ჩვენ ამას, რა თქმა უნდა, არ მოვითმენთ და ყოველთვის ვეცდებით ვამხილოთ ადამიანები, რომლებიც ეწევიან სახელმწიფოს დისკრედიტაციას“,- განაცხადა ბურჭულაძემ.