ოზურგეთის მუნიციპალიტეტის სოფელ შემოქმედის ეთნოგრაფიულ სივრცეში ,,კალანდა 2024“ აღნიშნეს. საზეიმო ღონისძიებაზე კალანდასთვის დამახასიათებელი უძველესი ტრადიციები იყო წარმოდგენილი, როგორიცაა აგუნას გადმოძახილი, მეკვლის ფეხადობა, ცხემლის ჭრა, ჩიჩილაკის დამზადება, გურული ღვეზლის ცხობის რიტუალი და მუცლის სალოცავი. ამასთან, ადგილზე გაიმართა ქორეოგრაფიული და ფოლკლორული ანსამბლების კონცერტი, თეატრალური პერფორმანსები და მოეწყო ადგილობრივი ნაწარმის გამოფენა-გაყიდვა. ღონისძიებას დაესწრნენ ადგილობრივი ხელისუფლების წარმომადგენლები, მოწვეული სტუმრები და რიგითი მოქალაქეები.
შემოქმედში იმყოფებოდნენ და კალანდის ტრადიციებს გაეცნენ პოლონეთის, უნგრეთის, ჩეხეთის, ბულგარეთის, ლიეტუვის, ესტონეთის ელჩები და გერმანიის ელჩის მოადგილე. წლევანდელ კალანდას აღსანიშნავ ღონისძიებას ცენტარალური ხელისუფლების წევრები არ დასწრებიან.
გიორგი ურუშაძე, გურიის მხარეში სახელმწიფო რწმუნებული: პირველ რიგში მინდა კალანდა მივულოცო სრულიად საქართველოს. ამ დღესასწაულს გურულები განსაკუთრებულად აღვნიშნავთ და დღესაც სოფელ შემოქმედში აღინიშნა ყველა იმ ძველი ტრადიციის გახსენებით და დაცვით, რომლითაც კალანდას აღნიშნავდნენ ჩვენი წინაპრეები.
განსაკუთრებით მინდა მივულოცო იმ ადამიანებს, რომლებიც ჩვენი ქვეყნის საზღვრებს გარეთ არიან. ჩვენ ემიგრანტებს ვუსურვებ სამშობლოში მალე დაბრუნებას.
ავთანდილ თალაკვაძე, ოზურგეთის მუნიციპალიტეტის მერი: სოფელ შემოქმედიდან მინდა მივულოცო ჩემს ძვირფას გურულებს, მთელ საქართველოს, ჩვენს ემიგრანტებს კალანდა. ვუსურვებ მშვიდობას და წარმატებულ წელს. ოზურგეთი ყოველწლიურად დღესასწაულებს გამორჩეულად ეგებება და წლევანდელი წელიც არ არის გამონაკლისი.
ღონისძიება გალაკონცერტითა და ფოიერვერკით დასრულდა.
ავტორი
