ოზურგეთის ცენტრალურ ბიბლიოთეკაში, პედაგოგთა პროფკავშირის რაიონული ორგანიზაციის ინიციატივით, მრავალშვილიან მასწავლებლებს საზეიმო შეხვედრა მოუწყეს და გაზაფხული მოწიწებითა და სიყვარულით მიულოცეს.
ღონისძიება ოზურგეთის საგანმანათლებლო რესურსცენტრის უფროსმა , ლელა იმედაშვილმა გახსნა.
_პედაგოგთა პროფკავშირის თავმჯდომარეს, ქალბატონ როზა გოგუაძეს თქვენ არასოდეს ავიწყდებით. დიახ, მას არასოდეს ავიწყდებით და სწორედ ამიტომ უნდა მოინდომოს ყველამ, რომ ასეთ ღონისძიებას როგორმე არ დააკლდეს. . . განსაკუთრებით მსურს, მოგილოცოთ თქვენ , მრავალშვილიან მასწავლებლებს ეს გაზაფხული, სიყვარულით გეცხოვროთ ამ ქვეყანაზე და სანაქებოდ გეკეთებინოთ თქვენი საქმე, _ თქვა მან.
„დავწვრილშვილდი, დავიწიე/დაიზარდნენ, ავიწიე…“ _ საკუთარი ორიგინალური ხელწერა მოიშველია და ისე მიესალმა კოლეგებს ბახვის საჯარო სკოლის დირექტორი, ქართული ენის მასწავლებელი, პოეტი მზია ვაშალომიძე.
_ღმერთმა თქვენს თვალზე ცრემლი ნურასოდეს ანახვოს ვინმეს. როცა ქალი დედა ხდება, ეს ყველაზე დიდი სამკაულია მისთვის. თქვენ ხართ ოთხგზის თუ ხუთგზის დედები. მე ვერ გაგეჯიბრეთ, ერთი მყავს, კეთილი შურით მშურს თქვენი, რომ ზღვა ბედნიერების პატრონი ხართ. ქალი ხელის გულზეა სატარებელი, დედა კი ორმაგად უნდა ვატაროთ ხელის გულზე. დედობის ბედნიერება ნუ მოგიშალოთ უფალმა, _ სიყვარული გულწრფელად გამოხატა ნარუჯის სკოლის პედაგოგმა , ნაზიბროლა მემანიშვილმა.
ერთმანეთს დიდი სიყვარულით, მოწიწებით და პატივისცემით მიეფერა ყველა: პირველი სკოლიდან გულიკო ბილიხოძე, მეორე საბავშვო ბაღიდან ქეთი ვასაძე, ასკანის საჯარო სკოლიდან თამარ ბერძენიშვილი ,მეორე საჯარო სკოლიდან მარინა ტაბიძე, პირველი საჯარო სკოლიდან მანანა გობრონიძე და სხვები.
ყველამ ერთხმად ხაზი გაუსვა იმას, რომ ეს არის უდიდესი დაფასება და ყურადღება პედაგოგებისადმი.
ახალგაზრდა პედაგოგთა ჯგუფმა: ნინო ლომჯარიას, ნათია კვერღელიძის, ლელა კალანდაძის და ლელა ყაზაიშვილის შემადგენლობით არაერთი საგაზაფხულო და თემატური სიმღერა შეასრულა. ხოლო და-ძმა ივანე და ნინა ჭანტურიებმა თხინვალის საჯარო სკოლიდან რამდენიმე მუსიკალური კომპოზიცია, საკუთარი ინტერპრეტაციით წარუდგინა მასწავლებლებს და დიდი მოწონებაც დაიმსახურეს.
პედაგოგთა პროფკავშირის რაიონული ორგანიზაციის თავმჯდომარემ, ქალბატონმა როზა გოგუაძემ საგანგებოდ მიულოცა თითოეულ პედაგოგს გაზაფხული, აღუთქვა მუდამ გვერდით ყოფნა, თანადგომა, შემდეგ კი ლელა იმედაშვილთან ერთად, მათ სამახსოვრო საჩუქრები გადასცა.
_ეს არის არაჩვეულებრივი დღე. მართლაც თბილი და სიყვარულით სავსე ღონისძიება შედგა, რაც ყველას დიდხანს გვემახსოვრება, _ თქვა მეორე საჯარო სკოლის მასწავლებელმა მარინა ტაბიძემ.
ავტორი
