“2017 წელს მოკლეს ჩემი შვილი… რომ არ ყოფილიყვნენ არასამთავრობო ორგანიზაცია და ტელევიზიები,
ხელისუფლება და მისი ე.წ. ტროლები გაგვთელავდნენ,” – ამის შესახებ თბილისში, ხორავას ქუჩაზე მოკლული დათუნა სარალიძის მამა, ზაზა სარალიძე Facebook-ის პირად გვერდზე წერს და რუსულ კანონს ეხმაურება.
“სამწუხაროდ ე.წ.”რუსულ კანონზე”, არ შეიძლება ერთი სიტყვით ლაპარაკი (გამჭვირვალობა არ გინდათ?) გვინდა, როგორ არ გვინდა,ყველაფერში გამჭვირვალობა გვინდა,დაწყებული ხელისუფლების მაღალჩინოსნების შემოსავლებიდან დამლაგებლამდე დამთავრებული. ყველა თეთრი უნდა იცოდეს მოქალაქემ სად მიდის მისი ჯიბიდან ამოღებული ფული(იმიტომ რომ ბიუჯეტიდან იღებენ შემოსავალს,რომელსაც ჩვენ გლეხები ვავსებთ). არავინ გამოხტეს ახლა და დეიწყოს ბაიათები,მანახე სადანა არის კორუფციაო, მაგას თუ ვერ ხედავთ სალაპარაკოც აღარაფერია.
2017 წლის 1 დეკემბერს მოკლეს ჩემი შვილი რასაც დაუყოვნებლივ მოყვა ცილისმწამებლური ნარატივი და მოკლული შვილის გაშავება და ჩვენი ოჯახის ამოთხრა-ამოძირკვა, ჯერ ერთი მხარე ესროდა ტალახს(ე.წ. ქოცბანდა და შემდეგ ე.წ. ნაცბანდა. ყველას არ ვგულისხმობ რა თქმა უნდა). რომ არ ყოფილიყო არასამთავრობო ორგანიზაცია “ადამიანის უფლებათა ცენტრი”და მისი კეთილსინდისიერი გუნდი,რომ არ ყოფილიყო ქალბატონი ნესტან ლონდარიძე,რომელმაც გადადო გვერდზე პირადი ცხოვრება და ჩემს განადგურებულ ოჯახს ფეხზე წამოდგომაში და ცხოვრების ფერხულში დაბრუნებაში დაეხმარა (ამის სანაცვლოდ არა ერთი დარტყმა მიიღო მისმა ოჯახმა ხელისუფლებიდან. სიტყვებიც კი ზედმეტია ნესტანის და მისი თანამშრომლების მიმართ მადლობის გამოსახატად).
ერთი თეთრიც კი არ გადამიხდია არც მე და არც ჩემებს რა მომსახურებაც მათ გამიწიეს და მიწევენ(ძალიან კარგად იცით ყველამ რა ჯდება ფინანსურად ეს მომსახურება) ანალოგიური სიტყვები შემიძლია ვისაუბრო ტელევიზიებზე რომლებმაც არ დაიზარეს და ჩვენი ტკივილი დაანახეს ქვეყანას,თუ როგორ გვთელავდა ე.წ. ხელისუფლების ტროლები და თავად ხელისუფლება,რომელი ხელისუფლებაც ანალოგიურ საქმეებზე დაყრდნობით მოგვევლინა.
არავინ იცნობს ამათ ორმაგ სტანდარტს როგორც ჩემი ოჯახი. ამ კანონის მიღებით ნელ-ნელა დასრულდება არასამთავრობო ორგანიზაციები და თავისუფალი მედიასაშუალებები,რაც მოხდა რუსეთში და ფაქტი სახეზე გვაქვს.
ყველას უჩნდება კითხვა,რატომ დასრულდება?კეთილი საქმის კეთებას ვინ უშლის??? ამის პასუხი კი ყველაზე ნათელია კანონის ჩანაწერში……
დანარჩენი მოგვიანებით,” – წერს სარალიძე.
