ანასტასია, მარიამი და ნია სოფელ გუთურის საჯარო სკოლის მოსწავლები არიან და არამარტო სოფელში, ჩოხატაურის მუნიციპალიტეტში აქტიურობით გამოირჩევიან. მათი მონაწილეობით ბევრი საინტერესო პროექტი გახორციელდა სოფლის სკოლაში და არაერთ კონკურსშიც გაიმარჯვეს.
მარიამი და ანასტატია ახალგაზრდული ცენტრის ოთახში
ანასტასიას და მარიამს თავის მეგობრებთან ერთად სოფელში არსებულ ახალგაზრდული ცენტრის ოთახში შევხვდით.
2024 წლის თებერვალში ორივე მათგანი კონკურსის _ „ჩაერთე მართვაში“ გამარჯვებულები გახდნენ და ახლა მათი მთავარი ამოცანა სოფლის ახალგაზრდული ცენტრის ოთახის კეთილმოწყობაა, რომ სოფელში მცხოვრებმა ბავშვებმა თავი შეიყარონ და დაგეგმონ თემის მცხოვრებლებისთვის საინტერესო ღონისძიებები.
ანასტასია გაბრიჭიძე, პროექტის „ჩაერთე მართვაში“ ერთ-ერთი მონაწილე: ამ ეტაპზე, ვგეგმავთ, ორგანიზება გავუწიოთ ერთობლივი ღონისძიების ჩატარებას სოფლის უფროსი და ახალი თაობის მონაწილეობით. სოფლის ცენტრში მდებარე ჩვენი ოთახის ეზო გვაძლევს საშუალებას, რომ აქ სხვადასხვა აქტივობები ჩატარდეს.
მარიამ ოსეფაიშვილი, პროექტის „ჩაერთე მართვაში“ ერთ-ერთი მონაწილე: ეს სივრცე მნიშვნელოვანია ჩვენთვის, სკოლის შემდეგ აქ რაღაც დროით შეკრება ბევრის მომცემია ჩვენთვის და ჩვენი თანატოლებისთვის. თემის განვითარებისთვის არაერთი პროექტის გახორციელება მოვახერხეთ, მაგრამ ეს საკმარისი არ არის.
ახალგარდული ცენტრის ოთახის ერთი მხარე ბავშვებმა შეღებეს
ანასტასია გაბრიჭიძე: გუთურის საჯარო სკოლის მოსწავლეები არაერთ ღონისიებაში მონაწილეობენ და ეს ადასტურებს, რომ ჩვენს სოფელში აქტიური თაობა მოდის. ჩვენ შეგვიძლია, უფროს თაობასთან ერთად, ბევრი საინტერესო საქმე გავაკეთოთ.
ასევე, გვინდა გავააქტიუროთ ის ბავშვები, რომლებიც ინერტულები არიან _ ყველანაირად ვცდილობთ, სოფელში რაც შეიძლება ბევრი აქტიური ბავშვი იყოს.
მარიამ ოსეფაიშვილი: დიდი სტიმული იყო, როდესაც გავიგეთ, რომ ადგილობრივი მთავრობის ხელშეწყობით ერთი ოთახი გამოგვიყვეს სოფლის ადმინისტრაციულ შენობაში. ახლა ჩვენი ჯერია, რომ ამ ზაფხულს საინტერესო და მრავალფეროვანი ღონისძიებების ჩატარება მოვახერხოთ. ყოველ ზაფხულს დამსვენებლები ჩამოდიან და ამ დროისთვის გვინდა ჩვენი ცენტრის მიერ დაგეგმილი ღონისძიებების გახორციელება. ჩვენი ცენტრის ეზოში შეიძლება შემეცნებითი, გასართობი ღონისძიებების მოწყობა, ფილმების ჩვენება.
ადმინისტრაციული შენობა, სადაც არის განთავსებული ახალგაზრდული ცენტრის ოთახი
„გურია ნიუსი“ ნია ჩანტლაძეს დაუკავშირდა. მისი თქმით,, ამ პროექტში ჩართულობა მას და მის მეგობრებს მისცემს სტიმულს სოფელ გუთურში მცხოვრებლებისთვის საინტერესო პროექტების განახორციელონ.
ნია ჩანტლაძე: “ჩართე მართვაში” კამპანიამ შემძინა ახალი მეგობრები და კონტაქტები, თვითმმართველობის ფუნქციონირების ღრმა ცოდნა. მასწავლა, როგორ ვიყო უფრო აქტიური მოქალაქე და ჩავერთო საზოგადოებრივ საკითხებში, რაც მნიშვნელოვნად ზრდის ჩემს საზოგადოებრივ აქტივობას.
ახლა მნიშვნელოვანია მუნიციპალტეტმა გამოყოს თანხა სივრცის კეთილმოსაწყობად, საჭირო ინვენტარის შესაძენად. რაზეც კლუბის წევრები არ დაიშურებენ ძალღონეს თავისი დასახული გეგმების განსახორციელებლად.
გუთურში მცხოვრები ახალგაზრდებისთვის „ჩაერთე მართვაში“ ჩართვა მეტ მოტივაციას აძლევს, რომ სოფელში დაგეგმილი აქტივობები გააკეთონ.
დეტალურად „ჩაერთე მართვაში“ შესახებ ეწვიეთ ვებგვერდს _ chaertemartvashi.ge/ka/home
კლუბი „ჩაერთე მართვაში“ ჩოხატაურში შეიქმნა სამოქალაქო საზოგადოების ინსტიტუტის მიერ USAID-ის ადგილობრივი თვითმმართველობის პროგრამის ფარგლებში. მსგავსი კლუბები შეიქმნა ასევე ბათუმში, მარნეულში და დმანისის მუნიციპალიტეტში. კლუბის ძირითადი მიზანია მოსახლეობის ინფორმირება ჩართულობის მექანიზმების შესახებ, მათი მონაწილეობის ხელშეწყობა ადგილობრივი გადაწყვეტილების მიღების პროცესში და თემში სასიკეთო ცვლილებების პროვოცირება.
