საქართველოს სტატისტიკის ეროვნული სამსახურის (საქსტატი) მიერ 9 სექტემბერს გამოქვეყნებული წინასწარი მონაცემებით, 2024 წლის II კვარტალში პირდაპირი უცხოური ინვესტიციები წინა წლის ანალოგიური პერიოდის დაზუსტებულ მონაცემებთან შედარებით 10.3%-ით გაიზარდა და 574.3 მლნ აშშ დოლარი შეადგინა, _ იუწყება civil.ge.
2024 წლის II კვარტალში სააქციო კაპიტალმა 101.0 მლნ. აშშ დოლარი შეადგინა, რაც მთლიანი პირდაპირი უცხოური ინვესტიციების 17.6%-ია. რეინვესტიციამ _ 451.3 მლნ. აშშ დოლარი და მისი წილი 78.6%-ით განისაზღვრა.
ქვეყანაში განხორციელებული ინვესტიციების კუთხით სიის სათავეშია გაერთიანებული სამეფო 266.7 მლნ აშშ დოლარით, რაც მთლიანი პირდაპირი უცხოური ინვესტიციების 46.4%-ს შეადგენს; შემდეგ მოდიან: იაპონია _ 59.2 მლნ აშშ დოლარით (10.3%); მალტა _ 37.9 მლნ აშშ დოლარით (6.6%); აზერბაიჯანი _ 23.7 მლნ აშშ დოლარით (4.1%) და ჩეხეთი _ 20.9 მლნ აშშ დოლარით (3.6%). სამი უმსხვილესი ინვესტორი ქვეყნების წილი ინვესტიციების მთლიანი მოცულობის 63.3%-ს შეადგენს.
2024 წლის II კვარტალში ყველაზე მეტი პირდაპირი უცხოური ინვესტიცია საფინანსო და სადაზღვევო საქმიანობების სექტორში განხორციელდა და 300.1 მლნ აშშ დოლარი შეადგინა (52.3%). შემდეგ მოდიან: ვაჭრობის სექტორი _ 79.2 მლნ აშშ დოლარით (13.8%); დამამუშავებელი მრეწველობის სექტორი _ 55.5 მლნ აშშ დოლარით (9.7%); უძრავი ქონება _ 47.2 მლნ აშშ დოლარით (8.2%) და ენერგეტიკის სექტორი _ 28.6 მლნ აშშ დოლარით (5.0%).
