“ის რაც ამ დღეებში ხდება ქვეყანაში ეწინააღმდეგება დემოკრატიულ პრინციპებს”,_ ამის შესახებ “გურია ნიუსთან” საუბრისას „ერთიანი ნაციონალური მოძრაობის“ ოზურგეთის რაიონული ორგანიზაციის თავმჯდომარე დავით მჟავანაძემ განაცხადა.
“ქართული ოცნება“ ოფიციალურად გადავიდა რუსულ მმართველობაზე. ასე დაიწყეს რუსეთში, ბელარუსში, ასევე ისეთ ქვეყნებში სადაც დემოკრატია არ არის. გუშინ დააკავეს სამოქალაქო აქტივისტი, როდესაც მას საბავშვო ბაღში მიჰყავდა შვილი. მსგავსი ფაქტები არაერთი ყოფილა რუსეთში და ბელარუსში.
ამ წუთებში ვიმყოფები თბილისის საქალაქო სასამართლოში. აქ არის უამრავი ადამიანი, რომლებმაც გადაიტანეს უმძიმესი დღეები. „ქართული ოცნების“ და რუსული ხელისუფლების ამოცანა წესრიგის დამყარება არ არის და ესენი გადავიდნენ დიქტატურაზე. ამ ყველაფერზე პასუხისმგებლობა ეკისრება ბიძინა ივანიშვილს, „ქართული ოცნებას“ და მათ ხელისუფლებას.
როგორც ზემოთ გითხარით, სამოქალაქო სასამართლოში აქციაზე დაკავებული მოქალაქეების პროცესები იმართება. უმეტეს შემთხვევაში აჯარიმებენ მათ ან ადმინისტრაციულ პატიმრობას უსჯიან. ჩემთვის როგორც არის ცნობილი მათ საქმეებში არ არის მტკიცებულებები და არის მხოლოდ პოლიციელების ჩვენებები. ასეთ, მდგომარეობაში არის ახლა ქვეყანა. მთავარი კი ის არის, რომ ჩვენ აუცილებლად გავხვდებით ევროკავშირის წევრი ქვეყანა და ამათი ქმედებებით არ უნდა შევშინდეთ,“ – გვითხრა დავით მჟავანაძემ.
ინფორმაციისთვის, დღეს, შუადღისას პოლიციის თანამშრომლები პოლიტიკური პარტიების „გირჩის“, „დროას“, „ახალის“ და „ერთიანი ნაციონალური მოძრაობის“ ოფისებში შევიდნენ. ასევე ისინი რამდენიმე სამოქალაქო აქტივისტის სახლის გასაჩხრეკადაც იმყოფებოდნენ.
დავით მჟავანაძე ამბობს, რომ შინაგან საქმეთა სამინისტრომ კარგად იცის, რომ არაფერი არ იმალება კანონსაწინააღმდეგო პოლიტიკური პარტიების ოფისში, მაგრამ მსგავსი ქმედებებით ქვეყანაში ამყარებენ დიქტატურას.
