დღეს ზუგდიდის საკრებულოში განიხილებოდა 2025 წლის ბიუჯეტი, რომელიც როგორც “ნაციონალური მოძრაობის” წევრები ამბობენ, არ ასახავს ზუგდიდელების ინტერესს და არის მხოლოდ სახელფასო ფონდი. ბიუჯეტის მიღებას “ქართული ოცნების” წევრების გარდა, მხარი დაუჭირა ოპოზიციურმა პარტიებმაც – “გახარია საქართველოსთვის” და პარტია “ახალმა”.
“ნაციონალური მოძრაობის” ზუგდიდის საკრებულოს წევრებმა ამ თემასთან დაკავშირებით ბრიფინგი გამართეს და აღნიშნეს, რომ ამ ბიუჯეტის 51% გაზრდილი ხელფასებია იმ ტიტუშკებისთვის, რომლებიც წინასაარჩევნოდ თავ-პირს ამტვრევდნენ ზუგდიდში ადამიანებს და მონაწილეობდნენ არჩევნების გაყალბებაში.
“დღეს ზუგდიდის საკრებულომ 2025 წლის ბიუჯეტი მიიღო. იმ ფონზე, როდესაც საქართველოში მთავრობა დაკავებულია ადამიანებზე ძალადობით. მთავრობა, რომელიც არჩევნებზე დაკავებული იყო მოსყიდვებით, შანტაჟით, ამ ყველაფრის ფონზე დღეს საკრებულოში პარტია “ახალმა” და პარტიამ “გახარია საქართველოსთვის” მიიღეს გადაწყვეტილება ერთობლივად მიეღოთ 2025 წლის ბიუჯეტი, რომელიც არ ასახავს ზუგდიდელების ინტერესს, რომელიც მორგებულია მხოლოდ ხელფასებზე. 59 მილიონი ლარიდან, 40 მილიონი არის სახელფასო, ეს არ არის ბიუჯეტი, ეს არის სახელფასო ფონდი და ამ ყველაფრის მიუხედავად ამ ორმა პარტიამ “ოცნებას” დაუმტკიცა ბიუჯეტი. ჩვენ, “ნაციონალური მოძრაობა” არ ვიყავით წარმოდგენილი საკრებულოში და რა თქმა უნდა, მხარიც არ დავუჭირეთ ამ ბიუჯეტს, რადგან ეს ბიუჯეტი არის სახელფასო ფონდი და არ ასახავს ზუგდიდელების ინტერესს,”– განაცხადა დავით ფიფიამ.
“იმ პირობებში, როდესაც საქართველოს ახალგაზრდებს თავპირს უმტვრევს არალეგიტიმური ხელისუფლება, როდესაც 500-მდე ახალგაზრდა პოლიტიკური მოტივით უკანონოდ არის დაპატიმრებული, დაუშვებელია და უდიდესი პოლიტიკური შეცდომა იყო ოპოზიციური პარტიების – “გახარია საქართველოსთვის” და “ახალი” კოალიცია ცვლილებისთვის მხარის დაჭერა 2025 წლის ბიუჯეტის მიღებაზე. ეს გადაწყვეტილება მხოლოდ ღალატად შეიძლება ჩაითვალოს იმ ახალგაზრდების მიმართ, რომლებიც ყოველდღე ქუჩაში სიცოცხლის ფასად იბრძვიან სამართლიანობისთვის და თავისუფლებისათვის. თქვენი დღევანდელი ქმედება შავ ლაქად დარჩება თქვენს პოლიტიკურ კარიერაში,” – განაცხადა მანუჩარ ფიფიამ.
განცხადებების ტექსტს “ერთიანი ნაციონალური მოძრაობის” პრესსამსახური ავრცელებს.
