ერთი საათის წინ, ამ ქალმა, პარლამენტარმა ნინო წილოსანმა, დადო აი ეს ვიდეო, გვეპატიჟება ბაკურიანში ამოდითო, _ ამის შესახებ ცოდნის კაფეს თანადამფუძნებელი ქეთი მოლაშვილი სოციალურ ქსელში წერს.
არ დაგვავიწყდეს, ამ თვიდან, მისი ყოველთვიური ხელფასი, 11 600 ლარია.
ახლა გითხრათ: 2 კვირის წინ, კარდაკარ დავდიოდი წნორში, ქიზიყში, მომიწია ძალიან ბევრ ოჯახში შესვლა, ხანდაზმული ადამიანების 80% შიმშილობს.
ვნახე პაპა, რომელმაც მომიბოდიშა, მთელი დღეა საწოლში ვწევარ რომ ცოტა გაზის ფული დავზოგო და ბოდიშს გიხდი საწოლი რომ მისალაგებელიაო;
ვნახე ბებო, უამრავი მარტოხელა ხანდაზმული ბებო, რომელიც სიცივეში დამხვდა;
ერთმა მითხრა, დღეს მზის თვალია და საღამოს შევანთებ, ახლა რა მიჭირსო და იჯდა ბებო სახლში ქურთუკით;
ვნახე ხანდაზმული ცოლ-ქმარი, რომელიც შემწვარ ბარკლებზე მეპატიჟებოდა, გახარებული იყო, სტუმარი მოგვიხვედი და სახლში ხორცი დაგახვედრეთო, პენსიას რომ ვიღებთ, ერთი მარტო იმ დღეს გვაქვს ხორცი, მეტი ვეღარო და ხორცი იყო ქათმის გაყინული ბარკლები;
ვნახე უკიდურესი გაჭირვება, უკიდურესი, 12 წევრიან ოჯახში, 4 საწოლი რომ დგას და რემონტის კვალიც რომ წაშლილია;
ვნახე ჩაწოლილი ხალხი, თავის დროზე რომ ვერ იმკურნალეს და ახლა სიკვდილს რომ ებრძვიან;
ვნახე უგზო-უკვლო გაჭირვება, მარტოხელა ხანდაზმულების გაჭირვება, ისეთი სიდუხჭირე, ჩემი ტანსაცმლით მისვლის რომ შემრცხვა და მეორე დღეს, ყველაზე გაცვეთილი სამოსი რომ ჩავიცვი, სოციალური უთანასწორობა არ ვაგრძნობინო ხალხს მეთი. ჩემი მეორადი ტანსაცმელების შემრცხვა.
ახლა შევდივარ ტიკტოკზე და მხვდება ამ ქალის ვიდეო, რომელმაც ხელფასი 7 000 ლარით გაიზარდა და პარალელურად ამ უკიდურეს სიდუხჭირეში მყოფ ხალხს, 35 ლარით რომ გაუზარდა ამავე ქალმა ხელფასი და უკაცრავად მაგრამ გული მერევა ამ სიყალბეზე!
გული მერევა ყველაფერ იმაზე, თავზე რომ დაგვაჯდნენ ეს მილიონერები და ამ ჩვენს საწყალ ხალხს რომ აჯერებენ, რომ ასე სიღარიბეში ცხოვრებას ვიმსახურებთ და რომ თავს ზემოთ ძალა არაა!
გული მერევა იმაზე, რომ მარტოხელა ხანდაზმულები სხედან სახლში, ორ-ორი და სამ-სამი დიპლომით, მთელი ცხოვრება სამუშაო სტაჟით, თან მაღალ თანამდებობაზე და ეტირებათ, ეტირებათ რომ ასეთ გაუბედურებულ დღეში არიან და ვერაფერს გამხდარან, იმიტომ რომ ძალა აღარ შესწევთ და ამ დროს ეს ქალი, თავის North Face-ბით, წერს ვიდეოს და მასხრად გვიგდებს!
ბოდიში ნინო, მაგრამ ევროპაში, ალპებში თუ ახვალ, ნახავ რომ უამრავი ხანდაზმული წყვილი სეირნობს, მაშინ როცა ჩვენი ხანდაზმულები შიმშილს ებრძვიან ყოველდღიურად, შენ ამ ხალხს, 35 ლარი რომ მოუმატე, ამ ხანდაზმულებს ეპატიჟები?! _ წერს ქეთი მოლაშვილი.
