მოსამართლე ნინო სახელაშვილს, რომელმაც „ბათუმელების“ თანადამფუძნებელი და დირექტორი მზია ამაღლობელს პატიმრობა შეუფარდა, სისხლის სამართლის კვალიფიკაცია არ აქვს.
„2022 წლიდან არის ბათუმის საქალაქო სასამართლოს სამოქალაქო საქმეთა კოლეგიის მოსამართლე… 2019 წელს ჩააბარა მოსამართლეობის საკვალიფიკაციო გამოცდა სამოქალაქო და ადმინისტრაციული სამართლის სპეციალიზაციაში,“ – ვკითხულობთ იუსტიციის უმაღლესი საბჭოს ოფიციალურ ინტერნეტგვერდზე.
„ეს ცალსახად ნიშნავს, რომ შუამდგომლობა განიხილა არაკანონიერმა შემადგენლობამ,“ – მიიჩნევს მზია ამაღლობლის ინტერესების დამცველი პაატა დიასამიძე. ამ პრობლემის შესახებ უკვე წერია სააპელაციო საჩივარში, რომელიც ჯერ ქუთაისის სააპელაციო სასამართლოს არ განუხილავს. სააპელაციო სასამართლოს დღეს, 16 იანვარს, მიმართა სახალხო დამცველმაც.
პაატა დიასამიძის აზრით, საქმის უკანონო შემადგენლობის მიერ განხილვა შეიძლება განვიხილოთ, როგორც ევროკონვეციით განსაზღვრული სამართლიანი სასამართლოს უფლების დარღვევის ჭრილში.
„ეს არის საერთაშორისო სტანდარტების დარღვევა. კვალიფიკაცია რომ მნიშვნელოვანია, ადასტურებს ის, რომ ცალ-ცალკე ტარდება გამოცდა, მაშინ ზოგად გამოცდას ჩააბარებს ყველა. იგივე მოთხოვნა არსებობს ადვოკატებზეც. ვიცით, რომ სამოქალაქო საქმეების ადვოკატი სისხლის ადვოკატი ვერ იქნება. კვალიფიკაცია ნიშნავს იმას, რომ შესაბამისი გამოცდა გაქვს ჩაბარებული,“ – განმარტავს იურისტი პაატა დიასამიძე.
ბათუმის საქალაქო სასამართლოს ადმინისტრაციაშიც დაგვიდასტურეს, რომ მოსამართლე ნინო სახელაშვილს საკვალიფიკაციო გამოცდა სამოქალაქო და ადმინისტრაციული სამართლის სპეციალიზაციით აქვს ჩაბარებული.
„მართალია, ქალბატონ ნინოს მოსამართლის საკვალიფიკაციო გამოცდა ჩაბარებული აქვს სამოქალაქო და ადმინისტრაციული სამართლის სპეციალიზაციით, მაგრამ იუსტიციის უმაღლეს სკოლაში სწავლებას გადიან სამივე დარგში, როგორც სამოქალაქო-ადმინისტრაციულ, ასევე სისხლის სამართალში. ამასთან, ქალბატონი ნინო იუსტიციის უმაღლესი საბჭოს განკარგულებით მოსამართლის უფლებამოსილებას ახორციელებს სისხლის სამართლის საქმეთა კოლეგიაში,“ – მოგვწერეს ბათუმის საქალაქო სასამართლოდან.
საია-ს იურისტი, ჯუბა ქათამაძე კი, რომელიც ასევე მზია ამაღლობლის ინტერესებს იცავს, ამბობს, რომ პრობლემაა ის სამართლებრივი ნორმაც, რომელიც ამ კონკრეტულ საკითხს არეგულირებს:
„დამაჯერებლობისა და კომპეტენტურობის ნაწილში კარგი იქნებოდა, საქმე განეხილა მოსამართლეს, რომელსაც აქვს სისხლის სამართლის კვალიფიკაცია… კანონით ჰქონდა ამის უფლება, თუმცა ეს შეგვიძლია დავინახოთ პრობლემად კომპეტენტურობის ნაწილში, თანაც, როცა ასეთ გახმაურებულ საქმეს განიხილავს სასამართლო,“ – გვითხრა ჯუბა ქათამაძემ.
მზია ამაღლობლის სააპელაციო საჩივარში იურისტები ყურადღებას ამახვილებენ ევროსასამართლოს ერთ-ერთ გადაწყვეტილებაზე – ცანდის [Zand] საქმეში კომისიამ განაცხადა, რომ „… მე-6(1) მუხლში მოცემული ცნება „კანონის საფუძველზე შექმნილი სასამართლო“ გულისხმობს სასამართლოების სრულ ორგანიზაციულ მოწყობას, მათ შორის, არა მხოლოდ გარკვეული კატეგორიის სასამართლოების იურისდიქციაში შემავალ საკითხებს, არამედ ცალკეული სასამართლოების შექმნასა და მათი იურისდიქციის განსაზღვრას”.
„ამავე ცნებაში, სავარაუდოდ, შედის სასამართლოს კომპეტენციის, არა მხოლოდ ratione loci, არამედ აგრეთვე ratione materiae, შემადგენლობისა და საქმისწარმოების წესის განსაზღვრა,“ – აღნიშნულია სააპელაციო საჩივარში.
საინტერესოა ისიც, რომ ბათუმის საქალაქო სასამართლოს ინტერნეტგვერდზე გამოქვეყნებული ინფორმაციის მიხედვით, მოსამართლე ნინო სახელაშვილს ბიზნეს-ინჟინერინგის მაგისტრატურა აქვს გავლილი.
ნინო სახელაშვილმა 2010 წელს დაამთავრა ტექნიკური უნივერსიტეტის ჰუმანიტარულ-სოციალური ფაკულტეტი, 2012 წელს კი, მან ბიზნეს-ინჟინერგის მაგისტრატურა დაასრულა. 2011 წელს ნინო სახელაშვილმა ჩააბარა ადვოკატის საკვალიფიკაციო გამოცდა სამოქალაქო სამართლის სპეციალიზაციით, 2019 წელს ჩააბარა მოსამართლეების საკვალიფიკაციო გამოცდა სამოქალაქო და ადმინისტრაციული სამართლის სპეციალიზაციაში.
ნინო სახელაშვილი 2012-2014 წლებში იყო თბილისის საქალაქო სასამართლოს მომსახურების ცენტრის წამყვანი სპეციალისტი, 2014-2016 წლებში იყო თბილისის საქალაქო სასამართლოს მოსამართლის სხდომის მდივანი, 2016-2018 წლებში – თბილისის საქალაქო სასამართლოს მოსამართლის თანაშემწე. 2018-2020 წლებში ნინო სახელაშვილი იყო თბილისის საქალაქო სასამართლოს ადმინისტრაციულ საქმეთა კოლეგიის სამდივნოს მთავარი კონსულტანტი – მოსამართლის თანაშემწე. 2020 წელს იყო თბილისის სააპელაციო სასამართლოს მთავარი კონსულტანტი.
- რა ხდება?
„ბათუმელების“ და „ნეტგაზეთის“ დამფუძნებელი და მედიამენეჯერი მზია ამაღლობელი 11-12 იანვრის საღამოს ორჯერ დააკავეს.
პირველად ის დააკავეს საპროტესტო შინაარსის პლაკატის გაკვრის გამო, რომელზეც ეწერა – „იფიცება საქართველო 15 იანვარს, 15:00 საათზე“. მანამდე ამ პლაკატის გაკვრის გამო დააკავეს მზია ამაღლობელის მეგობარი, ციალა ქათამიძე. მზია ამაღლობელი აქციაზე სწორედ ამ ფაქტის შემდეგ მივიდა.
მზია ამაღლობელი პლაკატის გაკვრის გამო აჭარის პოლიციის უფროსმა, გრიგოლ ბესელიამ დააკავა. ის დაახლოებით 1 საათის განმავლობაში ჰყავდათ აჭარის პოლიციის დეპარტამენტში, შემდეგ კი სხვა დაკავებულ ქალ აქტივისტებთან ერთად გაათავისუფლეს.
„ყველა გამოვიდეს გარეთ, ეს სიგიჟე უნდა დასრულდეს. გამოდით ყველგან, ყველგან დაწერეთ, მოუწოდეთ საზოგადოებას,“ – თქვა მზია ამაღლობელმა მას შემდეგ, რაც პოლიციის სამმართველო დატოვა. როგორც მან თქვა, მის წინააღმდეგ საქმე ადმინისტრაციული წესით იყო დაწყებული.
გათავისუფლების შემდეგ აჭარის პოლიციის დეპარტამენტის შენობიდან გამოსულ მზია ამაღლობელს მისი ახლობლები დახვდნენ, რომლებიც სამმართველოსთან მას შემდეგ მივიდნენ, რაც შეიტყვეს, რომ „ბათუმელების“ და „ნეტგაზეთის“ დამფუძნებელი პოლიციამ დააკავა. მზია ამაღლობელი მის საგულშემატკივროდ მისულ ადამიანებს ესაუბრებოდა, რა დროსაც პოლიციამ დაკავების ახალი ტალღა დაიწყო.
უწყვეტ, ლაივ კადრებში ჩანს, რომ პოლიციამ უმიზეზოდ დააკავა ჯერ ერთი პირი, შემდეგ კი – მეორე. ორივე დაკავებული მზია ამაღლობელის ახლობლები იყვნენ.
პოლიციის მხრიდან პროვოკაციული ქმედებების გამო აქციის მონაწილეებსა და პოლიციას შორის დაპირისპირება და ჭყლეტა დაიწყო, სწორედ ამ დროს დააკავეს მზია ამაღლობელი.
მზია ამაღლობელთან 3 საათის განმავლობაში არ უშვებდნენ ადვოკატს, მიუხედავად იმისა, რომ განხორციელდა რამდენიმე ზარი გენერალურ ინსპექციაში. ამ პერიოდში მზია ამაღლობელი მოინახულა სახალხო დამცველის წარმომადგენელმა აჭარაში, რომელსაც მზია ამაღლობელმა უთხრა, რომ დაკავების შემდგომ ადგილი ჰქონდა მის მიმართ არასათანადო მოპყრობას.
აჭარის პოლიციის დეპარტამენტის ბათუმის სამმართველოს უფროსმა, ირაკლი დგებუაძემ დაკავების შემდეგ მზია ამაღლობელს სახეში შეაფურთხა.
„პროკურატურა, თავის შუამდგომლობაში მიუთითებდა ხელახალი დანაშაულის ჩადენის საფრთხეზე და მთავარ არგუმენტად მოყვანილი ჰქონდა ის ფაქტი, რომ ბრალდებული რამდენიმე საათის გათავისუფლებული იყო ადმინისტრაციული დაკავებიდან, სასამართლომ კი, ეს არგუმენტი გაიზიარა. აღსანიშნავია, რომ ფაქტი, რის საფუძველზეც მზია ამაღლობელი ადმინისტრაციული წესით იყო დაკავებული, არ არის სასამართლოს მიერ შეფასებული. სასამართლოს არ განუხილავს მზია ამაღლობელის დაკავების კანონიერება ან მის მიერ ადმინისტრაციული სამართალდარღვევის ჩადენა. ამ პირობებში, სახალხო დამცველმა მიიჩნია, რომ ხსენებული გარემოება არ წარმოადგენს იმგვარ არგუმენტს, რომელიც პატიმრობის გამოყენების წინააღმდეგ არსებულ ყველა სხვა არგუმენტს დაძლევდა,“ – წერს სახალხო დამცველი ქუთაისის სააპელაციო სასამართლოს „სასამართლოს მეგობრის“ მოსაზრებაში.
წყარო: ბათუმელები
