ევროპარლამენტმა საქართველოში განვითარებული მოვლენები განიხილა და რეზოლუცია მიიღო.
“ხუთშაბათს მიღებულ რეზოლუციაში პარლამენტი უარს ამბობს 2024 წლის 26 ოქტომბრის გაყალბებული საპარლამენტო არჩევნების შემდეგ მმართველი პარტია „ქართული ოცნების“ თვითგამოცხადებული ხელისუფლების, მათ შორის ახლადდანიშნული პრეზიდენტის მიხეილ ყაველაშვილის აღიარებაზე და მოუწოდებს საერთაშორისო საზოგადოებას შეუერთდეს საქართველოს მმართველი ელიტის ბოიკოტს. ევროპარლამენტარები აგრძელებენ სალომე ზურაბიშვილს საქართველოს ლეგიტიმურ პრეზიდენტად აღიარებას და მოუწოდებენ ევროპის საბჭოს პრეზიდენტს ანტონიო კოსტას, მოიწვიოს იგი ქვეყნის წარმომადგენლად ევროპის საბჭოსა და ევროპის პოლიტიკური გაერთიანების მომავალ შეხვედრებზე.
სადავო არჩევნების შემდეგ, რომელმაც საქართველო პოლიტიკურ და კონსტიტუციურ კრიზისში ჩააგდო, ქვეყანა მოწმე გახდა მშვიდობიანი მასობრივი ანტისამთავრობო საპროტესტო აქციების, რასაც მოჰყვა ძალადობრივი და რეპრესიული დარბევა პოლიციისა და სამართალდამცავი ორგანოების მხრიდან. შედეგად, ევროპარლამენტარებს სურთ, რომ საბჭომ და ევროკავშირის წევრმა ქვეყნებმა დააწესონ პერსონალური სანქციები საქართველოში იმ ოფიციალურ პირებსა და პოლიტიკურ ლიდერებზე, რომლებიც პასუხისმგებელნი არიან დემოკრატიულ უკანდახევაზე, არჩევნების გაყალბებაზე, ადამიანის უფლებების დარღვევასა და პოლიტიკური ოპონენტების და აქტივისტების დევნაზე. მათ შორის არიან გამოჩენილი ოლიგარქი ბიძინა ივანიშვილი, პრემიერ-მინისტრი ირაკლი კობახიძე, პარლამენტის თავმჯდომარე შალვა პაპუაშვილი, ასევე პოლიტიკურად მოტივირებული განაჩენის გამომტანი მოსამართლეები და დეზინფორმაციის გამავრცელებელი მედიის წარმომადგენლები.
საჭიროა ახალი არჩევნები
რეზოლუციაში ასევე ნათქვამია, რომ ერთადერთი გამოსავალი საქართველოში არსებული კრიზისიდან არის ახალი საპარლამენტო არჩევნების ჩატარება, რომელიც, ევროპარლამენტის წევრების თქმით, უნდა ჩატარდეს მომდევნო რამდენიმე თვეში, ჩატარდეს გაუმჯობესებულ საარჩევნო გარემოში, დამოუკიდებელი და მიუკერძოებელი საარჩევნო ადმინისტრაციის ზედამხედველობით და საერთაშორისო დამკვირვებლების მონიტორინგით. ღრმა მწუხარებით მმართველი “ქართული ოცნების” მიერ ევროინტეგრაციისა და ნატოში გაწევრიანების გზაზე უარის თქმის გამო, პარლამენტი იმეორებს ურყევ მხარდაჭერას ქართველი ხალხის ლეგიტიმური ევროპული მისწრაფებების მიმართ.
ტექსტი მიიღეს 400 ხმით მომხრე, 63 წინააღმდეგ, 81-MA თავი შეიკავა.
საქართველოს ევროკავშირის კანდიდატის სტატუსი 2023 წლის დეკემბერში მიენიჭა. თუმცა, ქვეყნის ბოლო საპარლამენტო არჩევნები ევროპარლამენტმა არ ჩათვალა არც თავისუფლად და არც სამართლიანად, ევროპარლამენტარებმა მოითხოვეს არჩევნების ხელახალი ჩატარება მომდევნო წელს”,_ ვკითხულობთ ევროპარლამენტის გვერდზე.
