“გაზაფხულზე, მარტის ბოლოდან ივნისის ბოლომდე წყალდიდობების სეზონია. გარდა ამისა, სიფრთხილეა საჭირო, როცა მთაში თოვლი დნობას აქტიურად დაიწყებს, რადგან ასეთ დროს მდინარეში წყლის დონე ძალიან მატულობს. ამიტომ აუცილებელია, ადამიანები განსაკუთრებით მოერიდნონ მდინარის ჭალას და კალაპოტებს”,_ ამის შესახებ “გურია ნიუსს” ჰიდროლოგმა ნიკა წითელაშვილმა განუცხადა.
ჰიდროლოგი აღნიშნავს, რომ წყალდიდობებთან დაკავშირებული საფრთხეების მიმართ გამონაკლისი მხოლოდ გურია არ არის და მსგავს საფრთხეებს მთელი ქვეყნის მასშტაბით ვხვდებით.
“ზოგადად, გურია არ არის გამონაკლისი წყალდიდობებთან დაკავშირებული საფრთხეების მიმართ, მთაგორიანი ქვეყანაა საქართველო და მსგავსი საფრთხეები, პრობლემები, მთელი ქვეყნის მასშტაბით არის. ზოგადად, რელიეფი და მთაგორიანი გარემო განაპირობებს წყლის გადაადგილების სიჩქარეს A წერტილიდან B წერტილამდე, და რაც უფრო ნაკლებია დრო, მით უფრო ნაკლები დრო რჩება რეაგირებისთვის,“_ გვეუბნება ჰიდროლოგი.
ინფორმაციისთვის, წყალდიდობები და წყალმოვარდნები საქართველოს თითქმის ყველა მდინარისთვისაა დამახასიათებელი. განსაკუთრებით საშიშია და მაღალი რისკით გამოირჩევა საქართველოს შემდეგი მდინარეები: ენგური, რიონი, ჭოროხი, ყვირილა, ლიახვი, არაგვი, ალაზანის მარცხენა სანაპირო, აგრეთვე მდინარე მტკვრის მიმდებარე ტერიტორიები.
წყალდიდობა – ეს არის პროცესი, რომლის დროსაც გარკვეული კლიმატური პირობების გავლენით, კერძოდ თავსხმა და გადაუღებელი წვიმებით, ხდება მდინარის დონის მატება. აღსანიშნავია მნიშნელოვანი მომენტი, წყალდიდობის დროს, მუდმივი მონიტორინგის პირობებში, შესაძლებელია მოსახლეობა თავიდანვე იყოს გაფრთხილებული მოსალოდნელი წყლის დონის მატების შესახებ. წყალდიდობის ერთგვარი „დადებითობა“ იმაშია, რომ მისი გავრცელება გაშლილ სივრცეზე ხდება, სადაც გარკვეული სამუშოების ჩატარების შედეგად (ჯებირების გამაგრება, სანაპირო ზოლის ამოვსება სხვადასხვა ფიზიკური საშუალებით, კალაპოტის გაფართოება და ა. შ.) შესაძლებელია მოსალოდნელი კატასტროფის თავიდან აცილება.
წყალმოვარდნა ორი სახისაა: ერთი, როცა გამოწვეულია თავსხმა წვიმების შედეგად და მეორე, როდესაც ხდება მდინარის ხეობის გარკვეული მონაკვეთის გადაკეტვა და ჩახერგვა სხვადასხვა ფაქტორით, შემდეგ კი ამ დაგუბების გარღვევით. ორივე შემთხვევაში შედეგი უარყოფითია, რადგან წყლის დონის (პიკების) გავრცელება სწრაფად ხდება.
ცნობისთვის, 2023 წლის 8 სექტემბერს გურიაში ძლიერი წვიმის შედეგად გამოწვეულმა მეწყერმა და წყალდიდობამ სამი ადამიანის სიცოცხლე შეიწირა. ორი არასრულწლოვანის ცხედარი – სოფელ ჯუმათში, ერთი ზრდასრული ადამიანის ცხედარი კი სოფელ სილაურში იპოვეს. 35 ოჯახზე გაიცა რეკომენდაცია გეოლოგიურად მდგრად ადგილზე გადაყვანის შესახებ.
