გუშინ ცნობილი გახდა, რომ 1 ივლისიდან უქმდება ნატოსა და ევროკავშირის შესახებ საინფორმაციო ცენტრი, რომელიც 2005 წელს დაფუძნდა და ფუნქციონირებდა საქართველოში. ნატოსა და ევროკავშირის შესახებ საინფორმაციო ცენტრის წარმომადგენელი გურიის რეგიონში, ირაკლი პაპავა “გურია ნიუსთან” საუბრის დროს ამბობს:
“როგორც ცნობილია, 1 ივლისიდან ფუნქციონირებას შეწყვეტს საქართველოს საგარეო საქმეთა სამინისტროს სსიპ საინფორმაციო ცენტრი ნატოსა და ევროკავშირის შესახებ. ანუ მოხდება ლიკვიდაცია უწყებისა, რომელიც 2005 წლიდან არსებობს და რომლის მთავარი მისია საქართველოს ევროპული და ევრო-ანტლანტიკური ინტეგრაციის პროცესებში ჩვენი ქვეყნის მოსახლეობის ჩართვა და მათი გაცნობიერებული მხარდაჭერის მოპოვებაა, სამიზნე აუდიტორიასთან ამომწურავი, ობიექტური ინფორმაციისა მიტანისა და ეფექტიანი, მიზანმიმართული კომუნიკაციის გზით. გაიჟღერა იმ ინფორმაციამაც, რომ საინფორმაციო ცენტრის ფუნქციებს საგარეო საქმეთა სამინისტროს ცენტრალური აპარატის ევროინტეგრაციის დეპარტამენტი გადაიბარებს და განახორციელებს. და ეს ყველაფერი ხდება საქართველოს კონსტიტუციაში 78-ე მუხლის ჩანაწერის არსბობის პირობებში, რომელიც პირდაპირ ავალდებულებს კონსტიტუციურ ორგანოებს, რომ, თავიანთი უფლებამოსილების ფარგლებში, ყველა ზომა მიიღონ ევროპის კავშირსა და ჩრდილოატლანტიკური ხელშეკრულების ორგანიზაციაში საქართველოს სრული ინტეგრაციის უზრუნველსაყოფად! საინფორმაციო ცენტრის ლიკვიდაცია შეიძლება უკან გადადგმული ნაბიჯად შეფასდეს ჩვენი ქვეყნის ევროპული და ევროატლანტიკური ინტეგრაციისკენ მიმავალ გზაზე. იმ ტიპის საქმიანობა, რასაც „ცენტრი“ ეწევა (მოსახლეობასთან სტრატეგიული კომუნიკაცია ნატოსა და ევროკავშირში ინტეგრაციის საკითხებზე, ანტიდასავლურ პროპაგანდასა და დეზინფორმაციასთან, ასევე, მათგან მომდინარე საფრთხეებთან ბრძოლა), – ეს უფრო ინფრასტრუქრურულად გამართული და რეგიონული წარმომადგენლობებით აღჭურვილი სსიპ-ის (რომელიც უშუალოდ რეგიონებში, ადგილობრივი სპეციფიკის გათვალისწინებით, წარმართავს ამ საქმიანობას) ფორმატია და არა საგარეო საქმეთა სამინისტროს ცენტრალური აპარატის ერთი კონკრეტული (ევროინტეგრაციის) დეპარტამენტის ქვესტრუქტურის ფორმატი, რომელსაც ამ მიმართულებით სადღაც 4-5 ადამიანი ეყოლება დასაქმებული. – ამბობს ირაკლი პაპავა.
ირაკლი პაპავა ასევე აღნიშნავს: “დაბოლოს, ერთი რამ მინდა განსაკუთრებით აღვნიშნო: პირადად, მე საინფორმაციო ცენტრში 2021 წლის ივნისიდან ხელშეკრულებით დასაქმებული თანამშრომელი ვარ. ამ ხნის მანძილზე გურიის მასშტაბით ნატოსა და ევროკავშირის, ანტიდასავლური პროპაგანდისა და მისგან მომდინარე საფრთხეების თემატიკაზე 200-მდე შეხვედრა თუ სხვა ტიპის ღონისძიება მაქვს ჩატარებული სხვადასხვა სამიზნე აუდიტორიასთან (მოსწავლეები, პედაგოგები, საჯარო მოხელეები, სამოქალაქო სექტორი, მედია, ახალგაზრდები და სხვ.). მუდამ გახსნილი და მზად ვიყავი ნებისმიერ სექტორთან თუ უწყებასთან თანამშრომლობისა და პარტნიორობისათვის. გასული წლის 28 ნოემბერს, რა თქმა უნდა, შევუერთდი საქართველოს საგარეო საქმეთა სამინისტროს თანამშრომელთა ნაწილის განცხადებას, რადგან მჯეროდა და დღესაც მწამს, რომ ქვეყნის განვითარებისთვის საჭირო საქმეს ვაკეთებდი და ჩემი წილი წვლილი შემქონდა საქართველოს დასავლური ინტეგრაციის წინსვლის საქმეში და რომ, ოფიციოზის ასეთი მძიმე გადაწყვეტილების მიუხედავად, წინ დიდი გზაა, – გზა ევროპისა და ნატოსკენ, რომელიც ჩვენი გასავლელია და ჩვენ ამ გზას აუცილებლად ბოლომდე გავივლით. იმიტომ, რომ: ჩვენ ვირჩევთ დასავლეთს! ჩვენ ვირჩევთ ევროპას! ძალა ევროპაშია! წინ ევროპისკენ! შინ ევროპისკენ!”
ავტორი
