ლანჩხუთის საპატიო მოქალაქე, ჯანდაცვის სამინისტროს სამედიცინო საქმიანობის სახელმწიფო რეგულირების სააგენტოს ყოფილი უფროსი გია თვალავაძე სრულად გამართლდა – ინფორმაციას ამის თაობაზე სოციალურ ქსელში მისი ადვოკატი ტარიელ კაკაბაძე ავრცელებს.
„7 წლიანი ნერვიულობა, დარდი, იმედგაცრუება და ბევრი გულის ტკივილი ღმერთმა სიხარულით დაგვიმთავრა,” – წერს სოციალურ ქსელში გია თვალავაძის შვილი, თამთა თვალავაძე.
„მადლობას გიხდით თითოეულ გულშემატკივარს, რომლებსაც ამ წლების მანძილზე არ ვავიწყდებოდით და ჩემი ოჯახის გვერდით იყვნენ. განსაკუთრებით მამაჩემის საუკეთესო მეგობრებს, რომელთაც ფიზიკურად ვერ ჩამოვთვლი…მადლობა გურიას და გურულებს!”-წერს თამთა თვალავაძე.
თვალავაძე სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა, ფსიქოტროპული საშუალებების უკანონო ბრუნვის საქმეზე, სამსახურებრივი უფლებამოსილების ბოროტად გამოყენების გამო 2018 წლის სექტემბერში დააკავეს.
მას ბრალად ედებოდა სამსახურებრივი უფლებამოსილების ბოროტად გამოყენება. ბრალდების მიხედვით გია თვალავაძე შუამავლების მეშვეობით კორუფციულ გარიგებაში იყო ფსიქოტროპული მედიკამენტებით მოვაჭრე აფთიაქების მეპატრონეებთან და მფარველობას უწევდა არალიცენზირებული, კონტრაბანდული გზით შემოტანილი ფსიქოტროპული მედიკამენტების რეალიზაციაში. ამის სანაცვლოდ თვალავაძე თითოეული აფთიაქის მეპატრონისგან შუამავლების მეშვეობით ყოველთვიურად ქრთამის სახით 8.000-დან 10.000 ლარამდე თანხას იღებდა.
გია თვალავაძე წარდგენილ ბრალდებაში თავს დამნაშავედ არ ცნობდა. თვალავაძის უდანაშაულობის ჯეროდათ მის მშობლიურ ლანჩხუთშიც, სადაც მაშინ მისი მხარდამჭერი აქციებიც გაიმართა. ლანჩხუთლები მიიჩნევდნენ, რომ პატიოსანი და კეთილშობილი ადამიანი პოლიტიკურ ინტრიგების მსხვერპლი იყო. გია თვალავაძის მიმართ სოლიდარული იყო ჯანდაცვის მაშინდელმა მინისტრმა დავით სერგეენკოც და ამბობდა, რომ ჯეროდა მისი სიმართლის.
ცნობისთვის, გია თვალავაძე 2003-2004 წლებში ლანჩხუთის, მიხეილ ჩაჩავას სახელობის სამედიცინო ცენტრის გენერალური დირექტორი იყო.
2001-2003 წლებში – ლანჩხუთის შრომის, ჯანმრთელობისა და სოციალური დაცვის განყოფილების უფროსი.
1998-2001 წლებში – ლანჩხუთის საზოგადოებრივი ჯანდაცვის რაიონული ცენტრის დირექტორი.
