რომელ საათზე უნდა მივიდე საგამოცდო ცენტრში?
ყველა აპლიკანტი ვალდებულია საგამოცდო ცენტრში გამოცხადდეს საგამოცდო ბარათზე მითითებულ დროსა და ადგილას, რადგან დაგვიანების შემთხვევაში ისინი გამოცდაზე აღარ დაიშვებიან და გამოეთიშებიან საგამოცდო პროცესს.
რა არის გამოცდაზე დაშვების მთავარი პირობა?
გამოცდებზე დაშვების აუცილებელი პირობაა პირადობის დამადასტურებელ დოკუმენტთან ერთად საგამოცდო ბარათის წარდგენა რეგისტრაციის დროს.
რეგისტრაცია იწყება ბარათზე მითითებულ დროს და გრძელდება 1 საათის განმავლობაში.
რა ხდება იმ შემთხვევაში, თუ პირადობის მოწმობა დამრჩა?
პირადობის დამადასტურებელი დოკუმენტის დარჩენის შემთხვევაში, თქვენ დაიშვებით გამოცდაზე, თუმცა თქვენი ნაშრომი გასწორდება მხოლოდ იმ შემთხვევაში, თუ წარადგენთ პირადობის მოწმობას გამოცდის შემდეგ საგამოცდო ცენტრში კონკრეტულად თქვენთვის განსაზღვრულ ვადებში.
რისი შეტანა შემიძლია გამოცდაზე?
სურვილის შემთხვევაში, გამოსაცდელს შეუძლია თან იქონიოს: წყალი პლასტმასის ბოთლით; საწერი კალამი შესაბამისი პარამეტრებით (გელიანი (ე. წ. ტუშის), შავი ფერის, 0,5-0,7 მმ. ბურთულიანი წვერით).
გამოცდაზე არ შეიძლება მობილური ტელეფონისა და ნებისმიერი ელექტრონული ხელსაწყოს, მათ შორის, გამორთულ მდგომარეობაში შეტანა. ზედმეტი ნივთების დატოვება შესაძლებელი იქნება ნივთების შესანახ სივრცეში.
გამოცდაზე დროის გაკონტროლება თუ შემიძლია?
ყველა სექტორში დაგხვდებათ საათი, შესაბამისად, გამოსაცდელებს ექნებათ საშუალება აკონტროლონ დრო. ასევე, გამოცდის დასრულებამდე 10 წუთით ადრე დამკვირვებელი შეგახსენებთ, რომ დროულად დაასრულოთ ტესტზე მუშაობა.
რა წესები უნდა დავიცვათ ტესტირების პროცესში?
გახსოვდეთ, არ შეიძლება:
პასუხების ფურცლის გაკეცვა, შტრიხკოდის გაფერადება, დაზიანება და ა. შ.;
გამოცდის მიმდინარეობისას აბიტურიენტების ერთმანეთთან გადალაპარაკება;
დახმარების მცდელობა ან სხვა პირისაგან დახმარების მიღება;
დახმარების აღმოჩენის/მიღების ან საუბრის შემთხვევაში აბიტურიენტი მიიღებს გაფრთხილებას (გაითვალისწინეთ, რომ განმეორებითი გაფრთხილების შემთხვევაში აბიტურიენტი იხსნება გამოცდიდან).
აბიტურიენტი გაფრთხილების გარეშე იხსნება გამოცდიდან:
ლექსიკონის, დამხმარე მასალის, ე. წ. „შპარგალკის“, მობილური ტელეფონის, ე. წ. ტაბლეტის, საათის, კალკულატორის ან სხვა ელექტრონული ხელსაწყოს აღმოჩენისას (თუნდაც ელექტრონული ხელსაწყო გამორთული იყოს);
წესრიგის დარღვევის ან საგამოცდო პროცესში მონაწილე პირის შეურაცხყოფის ან სხვა მსგავს შემთხვევაში;
ალკოჰოლის, ნარკოტიკული ან ფსიქოტროპული ნივთიერებების ზემოქმედების ქვეშ ყოფნის შემთხვევაში.
ჩამოთვლილის გარდა, ნებისმიერი სხვა წესის დარღვევისას აბიტურიენტი იღებს გაფრთხილებას. მეორე გაფრთხილების მიღების შემთხვევაში დამკვირვებელი ვალდებულია გამოცდიდან მოხსნას აბიტურიენტი.
თუ შეიძლება გამოვცვალო პასუხების ფურცელი, ან მოვითხოვო შავი ფურცლების დამატება?
თქვენი მოთხოვნის შემთხვევაში, პასუხების ფურცელს შეგიცვლიან ახლით. შეცვლას ექვემდებარება, აგრეთვე, ხარვეზიანი პასუხების ფურცელი. თქვენ ასევე მოგაწვდიან ფურცელს შავი სამუშაოსთვის – საჭიროების შემთხვევაში კი შეგიძლიათ მოითხოვოთ დამატება. გაითვალისწინეთ, რომ სწორდება მხოლოდ პასუხების ფურცელი, თუმცა ტესტირების დასრულებისთანავე თქვენ აბარებთ მეთვალყურეს ყველა ფურცელს, რომელზეც იმუშავეთ, მათ შორის ფურცლებს შავი სამუშაოსთვის და გადაცემის პროცესს ადასტურებთ ხელმოწერით შესაბამის უწყისში.
რა შემთხვევაში არ სწორდება ნაშრომი?
ნაშრომი არ სწორდება, თუ:
პასუხების ფურცელი ან შტრიხკოდი დაზიანებულია; აბიტურიენტი საგამოცდო დროის ამოწურვისთანავე არ შეწყვეტს მუშაობას და არ ჩააბარებს პასუხების ფურცელს; პასუხების ფურცელს დააწერს სახელს, გვარს ან პიროვნების იდენტიფიცირების შესაძლებლობის შემცველ რაიმე სხვა ინფორმაციას, ან რაიმე სახის ისეთ გრაფიკულ გამოსახულებას, რომელიც დაკავშირებული არ არის ტესტურ დავალებასთან. გამოცდაზე პირადობის დამადასტურებელი დოკუმენტის გარეშე გამოცხადების შემთხვევაში, როცა აბიტურიენტი არ წარუდგენს ცენტრს მას შესაბამის ვადებში.
რა შემთხვევაში შეუძლია აბიტურიენტს მოითხოვოს დამატებითი ტესტირების ჩატარება?
ტესტირებაზე გამოუცხადებელ აბიტურიენტს უფლება აქვს მოითხოვოს დამატებითი ტესტირების ჩატარება, თუ მან საგამოცდო ბარათში მითითებულ დროს ვერ შეძლო გამოცდაზე გამოცხადება:
ა) ჯანმრთელობის მდგომარეობის გამო გამოცდის დროს სტაციონარულ სამედიცინო დაწესებულებაში არანაკლებ ერთი დღე-ღამით ყოფნის გამო;
ბ) ოჯახის წევრის (მეუღლე, დედა, მამა, და-ძმა, შვილი) გარდაცვალების გამო;
გ) დაუძლეველი ძალის გამო.
აბიტურიენტმა სტაციონარულ დაწესებულებაში ყოფნის ან ოჯახის წევრის გარდაცვალებისა და ნათესაობის დამადასტურებელი დოკუმენტი უნდა წარმოადგინოს ცენტრში შესაბამისი საგამოცდო სესიის დასრულებიდან 3 სამუშაო დღის ვადაში.
თუ აბიტურიენტმა დაუძლეველი ძალის გამო ვერ შეძლო საგამოცდო ბარათში მითითებულ დროს გამოცდაზე გამოცხადება, იგი ვალდებულია შესაბამისი საგამოცდო სესიის დასრულებიდან 3 სამუშაო დღის ვადაში ცენტრში წარმოადგინოს დასაბუთებული განცხადება და, არსებობის შემთხვევაში, განცხადებაში აღნიშნული გარემოებების დამადასტურებელი დოკუმენტაცია.გაითვალისწინეთ! ეს პირობები ვრცელდება მხოლოდ აბიტურიენტებზე და სტუდენტთა საგრანტო კონკურსის მონაწილეებზე.
