“ეს განცხადებები არ შეესაბამება სიმართლეს” _ ნარკოლოგი ჯანდაცვის მინისტრს ღია წერილს უგზავნის

მოგმართავთ, როგორც კერძო ჩანაცვლებითი თერაპიის პროგრამის ხელმძღვანელი, რათა საზოგადოებას მივაწოდო სრული და ობიექტური ინფორმაცია იმ უსაფუძვლო და ცრუ ბრალდებებსა თუ ბრალდების შემცველ განცხადებებზე, რომლებიც გაჟღერდა კერძო კლინიკების მისამართით, მათი საქმიანობის შესახებ.

მოგახსენებთ, რომ ეს განცხადებები არ შეესაბამება სიმართლეს და შეურაცმყოფელია იმ პროფესიონალი გუნდისა, რომელიც წლების განმავლობაში ემსახურება პაციენტებს მაღალი ხარისხის სერვისით.

1. რეგულირების საკითხი:

ჩვენი პროგრამა ფუნქციონირებს 2016 წლიდან. ამ პერიოდის განმავლობაში მხოლოდ 2023 წელს შემოვიდა რეგულირების სააგენტო შემოწმებაზე, და ისიც მხოლოდ ტექნიკური რეგლამენტის ნაწილში. ამ ხნის განმავლობაში არცერთხელ არ შემოწმებულა მედიკამენტების შენახვის, გაცემის ან ხარჯვის პროცედურები. შესაბამისად, არასწორია განცხადება, თითქოს რაიმეს ვმალავთ.

2. ინფორმაციის მიწოდება დაავადებათა კონტროლის ეროვნულ ცენტრთან (NCDC):

ყველა ახალი ბენეფიციარის მონაცემი რეგულარულად აისახება დაავადებათა კონტროლის ცენტრის ბაზაში, და ყოველწლიურად ვაწვდით მონაცემებს ჩატარებული ვიზიტების, დოზების და პაციენტების რაოდენობის შესახებ.

3. ინფორმაციის მიწოდება სამინისტროსადმი:

შესაბამისი მონაცემების გაუგზავნელობის ბრალდება ასევე არ შეესაბამება სიმართლეს. სამინისტრომ თავად ვერ უზრუნველყო ერთიანი ელექტრონული ბაზის შექმნა, მიუხედავად მრავალჯერადი მცდელობისა ჩვენი მხრიდან. ბაზა დღემდე არ ამოქმედებულა, რაც არ არის კლინიკების ბრალი.

4. ანალგეტიკების ხარჯვის შესახებ:

ჩვენ ყოველ კვარტალში ვაწვდით სამინისტროს დეტალურ მონაცემებს – რამდენი მედიკამენტი დაიხარჯა, რა მარაგები გვაქვს, და რა შესყიდვები განვახორციელეთ. ინფორმაცია მწყობრია და გამჭვირვალე.

5. დანაშაულის შემთხვევებზე განცხადებები:

არ შეესაბამება სიმართლეს, რომ ჩვენს პროგრამაში დაფიქსირდა რაიმე სახის დანაშაულებრივი ფაქტი. არცერთხელ, არსად არ დაფიქსირებულა ჩვენი მხრიდან რაიმე სახის კანონდარღვევა, განსხვავებით სახელმწიფო პროგრამებისგან, სადაც მართლაც გამოვლინდა მეთადონის არალეგალურ ბრუნვაში მოხვედრის არაერთი ფაქტი.

6. ინფორმაციის დამალვაზე ბრალდება:

ჩვენ არასდროს დაგვიმალავს რაიმე ინფორმაცია ჯანდაცვის სამინისტროსთვის, გარდა პაციენტების პერსონალური მონაცემებისა, რაც კანონით დაცულია. ყველა სხვა ინფორმაცია სამინისტროს სრულად აქვს მოწოდებული.

7. სამსახურიდან გათავისუფლებული თანამშრომლები:

250-ზე მეტი ადამიანი, ვინც წლების განმავლობაში პირნათლად ემსახურებოდა ამ პროგრამას, ამ გადაწყვეტილებების შედეგად დარჩება უმუშევარი. ეს არ არის მხოლოდ კლინიკების პრობლემა — ეს სოციალური პრობლემაა.

8. სერვისის ხარისხი და შესაბამისობა:

ჩვენს პაციენტებს ვთავაზობთ მაღალი ხარისხის, სახელმწიფო სტანდარტებთან და ტექნიკურ რეგლამენტთან შესაბამის სერვისს. ეს დასტურდება სამინისტროსვე მხრიდან გაცემული შეფასებებითა და დოკუმენტებით.

9. მედიკამენტების შემოტანის პროცესში დარღვევები:

ჩამანაცვლებელი მედიკამენტის ქვეყანაში შემოტანა არ ხორციელდებოდა ჩთ სერვისის განმახორციელებელი კერძო კომპანიების მიერ. მედიკამენტი შემოქონდა თქვენ დაქვემდებქრებაში მყოფი სამინისტროს მიერ გაცემული ნებართვის საფუძველზე, შესაბამის იმპორტიორ ორგანიზაციას. გარდა ამისა, სრულიად გაურკვეველია უკანასკნელ პერიოდში რა პრივილეგიებით სარგებლობდა ახალი იმპორტიორი ორგანიზაციები.

10. პროფესიული პატივის დაცვა:

ჩვენ ვერ მივიღებთ განცხადებებს ჩვენი უპასუხისმგებლობისდა ან არაკეთილსინდისიერების შესახებ. ასეთი განცხადებები საჭიროა იყოს გამყარებული ფაქტებით. წინააღმდეგ შემთხვევაში, ისინი აზიანებენ როგორც პროფესიულ რეპუტაციას, ისე პაციენტების მიმართ ნდობას.

11. ჩანაცვლებითი თერაპიის დანიშნულება:

გვსურს მკაფიოდ განვაცხადოთ: ჩანაცვლებითი თერაპია არ ემსახურება პაციენტების “განკურნებას”, როგორც ეს არაერთხელ არასწორად იქნა განმარტებული, ეს არის ზიანის შემცირების მძლავრი ინსტრუმენტი — იგი ამცირებს ზედოზირების, ინფექციების გავრცელების, კრიმინალისა და სოციალური მარგინალიზაციის რისკებს. ხოლო რეაბილიტაცია და მკურნალობა — სხვა ეტაპებია, რაც საჭიროებს სხვა მიდგომებს და ბიუჯეტურ დაფინანსებას.

⸻

მოვუწოდებთ ჯანდაცვის სამინისტროს:

ისარგებლოს ფაქტებით, ობიექტურად შეაფასოს პროგრამების საქმიანობა და თანამშრომლობის გზით მოვაგვაროთ არსებული პრობლემები — ჯანდაცვაში ჩართულთა, პაციენტების და მთლიანად საზოგადოებრივი ინტერესების სასარგებლოდ.

მოგიწოდებთ ნებისმიერ დროს, ნებისმიერ ეთერში გავმართოთ დებატები, რათა საზოგადოება იყოს სწორად ინფორმირებული ოპიოიდებით ჩანაცვლებითი თერაპიის არსის შესახებ და არგუმენტირებულად, ფაქტებზე დაყრდნობით მივაწოდოთ საზოგადოებას ინფორმაცია რა არის ჩანაცვლებითი თერაპიის პროგრამების დახურვის რეალური მიზეზი.