ბათუმის საქალაქო სასამართლოში, სადაც „ნეტგაზეთის“ დამფუძნებლის, მზია ამაღლობელის სისხლის სამართლის საქმეზე დასკვნითი პროცესი უნდა დაიწყოს, საქართველოს მეხუთე პრეზიდენტი, სალომე ზურაბიშვილი მივიდა,_ იუწყება ipn.
როგორც მან ჟურნალისტებს განუცხადა, მზია ამაღლობელი საქართველოს სიმბოლოა.
„მოლოდინი მაქვს როგორც ყოველთვის და ბოლომდე, რომ სამართალი იზეიმებს, თუმცა ამის საფუძველი არავის მოუცია ჩვენთვის. მთავარი არის ის, რაც ყველამ უნდა ვიცოდეთ, თუ დღეს დადგა განაჩენი, ეს იქნება განაჩენი არა მზიასი, არამედ ეს იქნება განაჩენი ყველა იმ ადამიანის, რომელიც მონაწილეობს უსამართლობაში, მონაწილეობდა პირველივე დღიდან და პასუხისმგებელი იქნება მთელი ქვეყნის და ისტორიის წინაშე, რაც დღეს გადაწყდება.
ეს ცხადია, რომ მედიის მიმართ მიზანმიმართული ქმედებაა, მაგრამ ამავე დროს ეს არის ქვეყნის მიმართ. ის, რაც ხდება დღეს, მზია არის სიმბოლო საქართველოსი“, – განაცხადა სალომე ზურაბიშვილმა.
ასევე, სასამართლოში მისვლამდე, მეხუთე პრეზიდენტმა მზია ამაღლობელთან დაკავშირებულ საქმეზე სოციალურ ქსელშიც დაწერა.
„დღეს ჩვენ ვართ მზია! მისი თავისუფლება ჩვენი თავისუფლებაა!“- აღნიშნავს სალომე ზურაბიშვილი.
დღეს ბათუმის საქალაქო სასამართლოში, გამოცემა “ბათუმელებისა” და “ნეტგაზეთის” დამფუძნებლის მზია ამაღლობელის სისხლის სამართლის საქმეზე დასკვნითი პროცესი გაიმართება. პროცესზე, ადვოკატები სასამართლოს დასკვნითი სიტყვით მიმართავენ. შესაძლოა, მოსამართლე ნინო სახელაშვილმა მზია ამაღლობელის საქმეზე გადაწყვეტილება დღესვე გამოაცხადოს.
პარალელურად, ბათუმის საქალაქო სასამართლოსთან მზია ამაღლობელის მხარდამჭერები იკრიბებიან და საპროტესტო აქციას მართავენ.
მზია ამაღლობელს გამოძიება სისხლის სამართლის კოდექსის 353-ე მუხლს ედავება, რაც პოლიციელზე თავდასხმას გულისხმობს და 4-დან 7 წლამდე თავისუფლების აღკვეთას ითვალისწინებს. მზია ამაღლობელი, ბათუმში, 11 იანვარს პოლიციის მთავარ სამმართველოსთან აქციის დროს თავდაპირველად ადმინისტრაციული წესით დააკავეს, დაახლოებით ორ საათში გამოუშვეს. გათავისუფლებიდან რამდენიმე წუთში კი, ის სამმართველოსთან კვლავ დააკავეს. მზია ამაღლობელმა ბათუმის პოლიციის უფროსს, ირაკლი დგებუაძეს სილა გააწნა, რასაც პოლიციელზე თავდასხმის კვალიფიკაცია მიეცა.
