ოზურგეთის მუნიციპალიტეტის, სოფელ თხინვალის ცენტრში მისვლამდე, გზის პირას ერთსართულიან, დანგრეულ სახლს ყველა შეამჩნევს. ჩვენც ასე, არჩევნების დღის გადასაღებად თხინვალში მისულებმა დავინახეთ ამ “შენობის” წინ მჯდარი ხანდაზმული ქალბატონი.
საუბარი უჭირდა და აქედან გამომდინარე, მეზობლების დახმარებით, ასევე, მისი შვილისგან – ანდრო ანტონიანთან შევეცადეთ გაგვეგო მისი ამბავი.
ანდრო ანტონიანის სახლი ორი წელზე მეტია ავარიულ მდგომარეობაშია; წელს კი, დიდთოვლობის გამო, მთლიანად ჩამოინგრა სახურავი და კედლებიც დაინგრა.
„ორი წლის წინ, სახლის კედელი გარეთ გადმოიწია და დაიბზარა. მას შემდეგ სახლში ცხოვრება საშიში იყო. ხელისუფლების პროგრამაში მოვხვდი, 30 000 ლარი გამომიყვეს, მაგრამ მე უნდა მომეძებნა სახლი და შემდეგ მოხდებოდა ამ თანხის დარიცხვა. 30 000 ლარად სახლს დღევანდელ დროში სად ვიყიდი?! აქედან გამომდინარე, ვარ მოლოდინის რეჟიმში და იქნებ რამე გამოსავალი ვიპოვო…. ამ თანხის გადმოცემა არ შეიძლება, როგორც მითხრეს, თორემ, მე თითონ შევძლებდი ჩემი პრობლემის მოგვარებას“ – გვეუბნება ანდრო ანტონიანი.
ანდრო ანტონიანი ამჟამად, დედასთან ერთად, დანგრეული სახლის უკანა მხარეს, პატარა ქოხში ცხოვრობს.
„ძველ პრობლემას წელს ახალი დაემატა – დიდთოვლობის დროს ავარიულ სახლში ვიყავით და სასწაულებრივ გადავურჩით სიკვდილს.
ძმასთან ვიყავი, ის სხვა ადგილას ცხოვრობს. ცოტა ხნით გადავედი ტელეფონის დასამუხტად. დაახლეობით პირველი საათისთვის დავუბრუნდი სახლში. დედაჩემს მაგ დროს ეძინა, უცებ სახურავმა დაიწყო ტკაცუნი, მივარდი დედაჩემთან და ფეხშიშველი გამოვიყვანე გარეთ. სანამდე გამოვიყვანდი, ის მას „ბალკა“ დაეცა. მეც დამეცა, მაგრამ იოლ ფორმაში გამოვედი. დედაჩემი შემდეგ ჩემს დასთან წავიყვანეთ გორში და იქ ოჯახში მკურნალობდნენ.
87 წლის დედასთან ვარ ახლა იმის მოლოდინში, იქნებ გამოიჩინონ ყურადღება და ამ ზამთარში ასე ნუ დაგვტოვებენ.
სამუშაოდაც ვერ დავდივარ, მოხელე კაცი ვარ. ადრე დედაჩემი მპატრონობდა და ახლა ყველაზე მეტად ჭირდება ჩემი დახმარება“, – გვითხრა ანდრო ანტონიანმა.
„გურია ნიუსი“ ოზურგეთის მუნიციპალიტეტის მერის წარმომადგენელს სოფელ თხინვალში ვალერიან ჩხაიძეს დაუკავშირდა.
ვალერიან ჩხაიძის თქმით, სოფელ თხინვალში მცხოვრები ანდრო ანტონიანის პრობლემის შესახებ საქმის კურსშია და ის სახელმწიფო პროგრამაში დიდი ხანია ჩაერთო.
„საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრომ 30 000 ლარი გამოყო და მან უნდა ნახოს საცხოვრებელი სახლი მაგ ფასში. ექვსი თვის მანძილზე ვერ მოხერხდა ახალი სახლის ყიდვა და მან ისევ თავიდან შეიტანა განცხადება პროგრამის გაგრძელებაში. ასევე ვიცი, რომ ქირავობის პროგრამაში არის ჩართული. ქირით უნდა გადავიდეს და ადგილობრივი ბიუჯეტიდან 300 ლარს გადაუხდიან.“ – გვითხრა ვალერიან ჩხაიძემ.
როგორც წერილში არის აღნიშნული, ანდრო ანტონიანი ქირით არ სარგებლობს. როგორც მან გვითხრა, მხოლოდ ორი თვით ისარგებლა მაგ პროგრამით და შემდეგ თანხის ჩარიცხვა არ მომხდარა. როგორც ჩვენ მიერ გადაღებული ფოტოებში ჩანს სიტუაცია მძიმეა და ამ ადამიანის პრობლემის მოგვარება დროულად უნდა მოხდეს.
„გურია ნიუსი“ ამ თემასთან დაკავშირებით მუშაობას აგრძელებს და ახალი დეტალების გასარკვევად ოზურგეთის მუნიციპალიტეტის პრესსამსახურს დაუკავშირდება.
ავტორი
