“გთხოვთ, დეტალურად მოგვაწოდოთ ინფორმაცია, 2025 წლის 9 სექტემბრის მონაცემებით, გურიის მასშტაბით, სად შენდება საბავშვო ბაღი და საჯარო სკოლა. ასევე, იმ სამშენებლო კომპანიების სახელები, რომლებიც აწარმოებენ სამუშაოებს.
ასევე, ოზურგეთის მუნიციპალიტეტის ქვემო, ზემო ნატანების და ანასეულის საჯარო სკოლების მშენებლობა წლებია, დაანონსდა. 2025 წლის 26 ივლისს მუნიციპალური განვითარების ფონდის აღმასრულებელი დირექტორი, ბექა ურუშაძე მინისტრთან ერთად იმყოფებოდა სოფელ ნატანებში. სახელმწიფო უწყებების მიერ გავრცელებულ ინფორმაციაში არ არის აღნიშნული, როდის დასრულდება მშენებლობა და დაიწყება სასწავლო პროცესი ქვემო ნატანების საჯარო სკოლაში.
გთხოვთ, მოგვწეროთ, რომელი კომპანია/კომპანიებია ტენდერში გამარჯვებული“, _ ასეთი შინაარსის წერილი “გურია ნიუსმა” საქართველოს მუნიციპალური განვითარების ფონდს 9 სექტემბერს მისწერა, პასუხი 29 სექტემბერს მოგვწერეს და პასუხის ერთი ნაწილი მკითხველს უკვე გავაცანით.
საქართველოს მუნიციპალური განვითარების ფონდიდან მიღებული პასუხიდან ირკვევა, რომ გურიის რეგიონში ამ ეტაპზე, ჯამში, 17 სკოლისა და საბავშვო ბაღის მშენებლობა და რეაბილიტაცია მიმდინარეობს. მიღებული წერილში არ არის პასუხი, როდის დასრულდება სამუშაოები:
“ჩოხატაურის #1 საბავშვო ბაღის და ჩოხატაურის #1 ბაგა–ბაღის რეაბილიტაცია (რეტენდერი) _ ამხანაგობა “მეგა ჰაუსი“; ლანჩხუთი _ სოფ. ჩიბათის, ეწერის, ჯურუყვეთის და შრომისუბანის საბავშვო ბაღების რეაბილიტაცია (ბაღი) _ შპს “ჯავა“; ოზურგეთის მუნიციპალიტეტის დაბა ნარუჯის საჯარო სკოლის რეაბილიტაცია, შპს “ქრიათივ იმფრეშენს კავკასუს“; ქ. ოზურგეთის #3 საბავშვო ბაღების რეაბილიტაცია _ შპს “ჯავა“, სოფელ ნატანების საბავშვო ბაღის რეაბილიტაცია, ამხანაგობა “ნიუ კონსტრაქშენ“, ქვემო ნატანების საჯარო სკოლის რეაბილიტაცია _ შპს “ჯორჯიანს კონსტრაქშენ კომპანი“.
პროექტირება _ სოფ. გულიანში 50 ბავშვზე გათვლილი საბავშვო ბაღის პროექტირება/მშენებლობა, ამხანაგობა “პლაზმა – 2023″; სოფ. ძიმითში, სოფ. მთისპირში, სოფ. მაკვანეთში და სოფ. ბოხვაურში 50 ბავშვზე გათვლილი საბავშვო ბაღის პროექტირება/მშენებლობა _ შპს “სქაიჰაუსი“,
სოფ. კონჭკათის საბავშვო ბაღის პროექტირება/მშენებლობა _ ამხანაგობა “თ.ბ.კაპიტალი, LIVE DESIGN”.
ჩოხატაურის მუნიციპალიტეტის სოფ. შუაფარცხმის საჯარო სკოლის პროექტირება/მშენებლობა _ შპს “მგდ” _ მშენებლობა–სამუშაოები დაიწყო 2024 წლის პირველ კვარტალში.
რეაბილიტაციის პროცესში გამოვლინდა რიგი გარემოებები, რის გამოც პროექტში გახორციელდა გარკვეული ცვლილებები, კერძოდ: შენობაში სადემონტაჟო სამუშაოებისას გამოვლინდა კონსტრუქციული პრობლემები, რომლებმაც საჭირო გახადა კონსტრუქციული გადაწყვეტების გადამუშავება და შესაბამისი დოკუმენტაციის მომზადება; ადგილობრივი მუნიციპალიტეტისა და განათლების სამინისტროს მიმართვის საფუძველზე პროექტში დამატებით გათვალისწინებულ იქნა შენობაში ინტეგრირებული თეატრის დარბაზის რეაბილიტაცია და აღჭურვა (თეატრის დარბაზის კონსტრუქციული გამაგრება უკვე შესრულებულია, ხოლო საპროექტო დოკუმენტაცია აღჭურვისა და სრული განახლებისთვის დასრულების ეტაპზეა);საძირკვლის სამუშაოებისას სარდაფის სივრცეში წყლის მოცილების სერიოზული პრობლემა გამოვლინდა, რის გამოც მომზადდა დრენაჟის პროექტი, რომელიც თავდაპირველ პროექტში გათვალისწინებული არ იყო. ზემოაღნიშნული გაუთვალისწინებელი, ობიექტური გარემოებებიდან გამომდინარე პროექტის დასრულების ვადა გადაიწია. სამუშაოების დასრულება დაგეგმილია 2026 წლის 01 აგვისტოსთვის“, _ აღნიშნულია გამოგზავნილ წერილში.
გურიის რეგიონში მხოლოდ საქართველოს მუნიციპალური განვითარების ფონდს არ აქვს დაწყებული და დაუსრულებელი პროექტები.
“გურია ნიუსი” ბაღების და სკოლის დაუსრულებელი მშენებლობის შესახებ, ადგილობრივი თვითმმართველობის ექსპერტის, ამირან გიგინეიშვილის კომენტარს გთავაზობთ:
“ჩემს, ჯურუყვეთის ადმინისტრაციულ ერთეულში, ჯურუყვეთის #1 საჯარო სკოლა 2022 წელს გააჩერეს შენობის ავარიულობის მოტივით. 2023 წელს პირწმინდად დაანგრიეს შენობა. ახლა ღობეც აღარაა. არც ახლის აშენების ეტყობა რამე იქაურობას. არადა, ახლა 2025 წელია. მეორე წელია დაანგრიეს ეწერის საბავშვო ბაღი. დაანგრიეს 2017 წელს აშენებული ჯურუყვეთის ბაღიც. სრული უპასუხისმგებლობა მომავალი თაობის, ქვეყნის მომავლის მიმართ. ადმინისტრაციულ ერთეულში მხოლოდ ერთი, ჯურუყვეთის არასრული #2 სკოლა მოქმედებს. მე-9 კლასიდან ბავშვები სხვა სოფლების სკოლებში დადიან უკვე წლებია. სკოლამდელი აღზრდა საერთოდ მოშლილია. ეს რეალობაა.
ხელისუფლებას უნდა ჰქონდეს ერთწლიანი, საშუალო ვადიანი და გრძელვადიანი სტრატეგიული გეგმები, სადაც უმნიშვნელოვანესია პრიორიტეტების განსაზღვრა და მათი უპირობო გახორციელება. ეტყობა ხელისუფლებისთვის მომავალი თაობის აღზრდა და განვითარება პრიორიტეტი არ არის“.
სამოქალაქო განათლების პედაგოგი, ნინო ვაშალომიძე “გურია ნიუსთან” საუბრის დროს ამბობს, რომ აუცილებელია, ბავშვმა განათლება მოწესრიგებულ სასკოლო შენობაში მიიღოს:
“მოწესრიგებული სასკოლო ინფრასტრუქტურა ცალსახად დადებითად ისახება მოსწავლის სწავლის ხარისხზე. მოწესრიგებული გარემო სტიმულია მოსწავლისთვის, რომ კარგად ისწავლოს. ვფიქრობ, ბავშვს არ უნდა ეზარებოდეს სკოლაში მოსვლა პედაგოგის, მოუწესრიგებელი გარემოსა და თანატოლის გამო. თუ ეს სამივე კომპონენტი წესრიგშია, სწავლის ხარისხი იდეალური, სასწავლო პროცესი კი სასიამოვნო ხდება“.
“გურია ნიუსი” ამ ეტაპზე სხვადასხვა უწყებიდანაც ელოდება სკოლებისა და საბავშვო ბაღების მშენებლობა-რეაბილიტაციის შესახებ კითხვებზე პასუხს, რომელსაც ჩვენს მკითხველს ეტაპობრივად მივაწოდებთ.
ავტორი
