ბოდბელი მთავარეპისკოპოსის, მეუფე იაკობის თქმით, არასწორი იყო კონსტიტუციაში იმის ჩაწერა, რომ საქართველო ევროკავშირსა და ნატო–ში ინტეგრაციისთვის ისწრაფვის.
„რა გვინდა და რისთვის ვიღვწით. ცოტა ხნის წინ იყო, 2020 წლის არჩევნებიდან. მე მაშინაც ვამბობდი და დღესაც ვამბობ – არასწორი იყო, რომ კონსტიტუციაში ძალით, ჩაგაწერინებენ რაღაცას, უნდა ფიქრობდე, რომ წინ რაღაც აქვთ.
ნატო და ევროკავშირი ჩავწერეთ და ჩვენი ქვეყანა მართლაც მისდევდა. ჩვენ ხომ გვახასიათებს სიტყვა _ უცხო. საუცხოო ჩვენთვის ყველაზე საუკეთესოა. სხვებისთვის უცხო ნიშნავს უცხოს. ჩვენთვის კი საუცხოოა.
რა მივიღეთ? 2020 წლის არჩევნები იყო, 2024 წლის იყო თუ რა იყო, აი, იმ ადამიანებს, ვისაც საქართველოსთვის სიკეთე გვინდა, გაძაღლებული გვაქვს ცხოვრება. შეხედეთ, ხან ვინ, რას გვასწავლის ჭკუას, ხან ვინ რას გვასწავლის, მაგრამ ვინ გასწავლის, იმას თვითონ ხომ უნდა ჰქონდეს? მე უცხოელებზე არ ვიძახი, ჩვენებზე ვიძახი. ადამიანი რაღაცას ხომ უნდა ფიქრობდე, თუ რა გვინდა, ერს რა უნდა. რას ვერჩით ერთმანეთს, რა გვინდა? არჩევნების თემა ვერ განვითარდა და წამოვიდა ახალი თემა „არაბიზაცია“.
თუ რამე ყოფილა საქართველოს ბოლო წლების ისტორიაში, ეკლესია ყოველთვის იქ იდგა, სადაც უნდა მდგარიყო. დღეს ადამიანთა გარკვეული რაოდენობა ფიქრობს, რომ საფრთხის წინაშეა საქართველო, გვემუქრება არაბიზაცია, ზოგს რუსეთი აშინებს, ზოგს _ ევროპა.
თითოეულმა ჩვენგანმა რომ ვიცოდეთ, საქართველოს საწინააღმდეგო რამე კეთდება, აქამდე გამოვიდოდით. არ ვართ ისე, რომ ხელისუფლებას წავუყრუოთ ან რომელიმე ხელისუფალს თავი დავუხაროთ.
ჩავრთე ტელევიზორი და გაჰკიოდნენ, სად არის საპატრიარქოო. საპატრიარქო არის დაწესებულება, სადაც პატრიარქი თავის სამსახურებს განაგებს და ეკლესიაც არის იქ, სადაც უნდა იყოს.
თუ საშიშროება ყოფილა, აბა გადახედეთ და რომელ პროცესში არ ვიყავით ჩართული. დღეს ვინც აქტიურობენ, მაშინ სად იყვნენ?“ _ თქვა მეუფე იაკობმა.
