გამთენიისას 112-ში გამოძახება შევიდა ლოზუნგით „მშობიარობა“. ახალგაზრდა ქალი ოჯახის წევრებს მაღალმთიანი სოფლიდან ავტომანქანით მოჰყავდათ, როდესაც მას მუცლის მოვლითი ტკივილები გაუძლიერდა და სასწრაფო დახმარების გამოსაძახებლად გზიდან დარეკეს.
ჩოხატაურის რაიონული სამსახურის მე-3 ბრიგადის ექიმი თამარ ცინცაძე იხსენებს, რომ პაციენტის სასწრაფო დახმარების მანქანაში გადმოყვანისა და ჰოსპიტალიზაციის პროცესის დაწყებიდან მალევე მშობიარობა აქტიურ ფაზაში გადავიდა. პროცესმა სწრაფად და ფიზიოლოგიურად ჩაიარა. სასწრაფო დახმარების ბრიგადის წევრების დახმარებით ახალგაზრდა ქალმა ადგილზე იმშობიარა. დაიბადა ჯანმრთელი გოგონა. დედა და ახალშობილი სტაბილურ მდგომარეობაში ერთ-ერთ კლინიკაში გადაიყვანეს.
აღსანიშნავია, რომ აღნიშნული ბრიგადის წევრები თითქმის 15 წელია ერთ გუნდად მუშაობენ. თამარ ექიმი განსაკუთრებული სიამაყით აღნიშნავს, რომ მის გვერდით დგანან გამოცდილი და პროფესიონალი ექთანი და მაღალი პასუხისმგებლობის მქონე მძღოლი.
ახალნამშობიარები დედისა და ჩვილის კლინიკაში გადაყვანისას მძღოლი მოძრაობდა ზომიერი და უსაფრთხო სიჩქარით, რაც ასეთ ვითარებაში განსაკუთრებით მნიშვნელოვანია. სიმბოლურია ისიც, რომ იმავე დროს, როდესაც ექიმი თამარ ცინცაძე ახალ სიცოცხლეს იღებდა, მისი ოჯახის წევრიც მშობიარობდა. ეს ისტორია კიდევ ერთხელ გვახსენებს, რომ სასწრაფო სამედიცინო დახმარების თითოეული გამოძახების მიღმა დგას არა მხოლოდ პროფესიული ვალდებულება, არამედ ადამიანური პასუხისმგებლობა და თანაგრძნობა. მაშინ, როდესაც დრო გადამწყვეტია და გარემო პირობები რთული, სწორედ გამოცდილება, მრავალწლიანი გუნდური მუშაობა და კოორდინირებული მოქმედება ხდება უსაფრთხოებისა და წარმატებული შედეგის საფუძველი. გზაზე, გამთენიისას დაბადებული კიდევ ერთი სიცოცხლე არის იმის დადასტურება, რომ გადაუდებელი სამედიცინო დახმარების სისტემა მზად არის ეფექტიანი რეაგირებისთვის ქვეყნის ნებისმიერ წერტილში, მათ შორის მაღალმთიან რეგიონებში და საზოგადოების ნდობას ყოველდღიური პროფესიონალიზმით ამართლებს.
ექიმი თამარ ცინცაძე
ექთანი მედეა ჩხაიძე
მძღოლი ზაზა ბერაია
ინფორმაციას ფეისბუქგვერდი “შენი სიცოცხლის გადასარჩენად” ავრცელებს.
