ლანჩხუთის მუნიციპალიტეტის 2026 წლის ბიუჯეტი, რომლის დეფიციტი თითქმის 5,5 მილიონ ლარს შეადგენდა (შემოსავლების სახით განსაზღვრული იყო 22 მილიონ 56 ათასი ლარით, ხოლო მუნიციპალიტეტის საპროგნოზო ხარჯები 27 მილიონ 541 ათასი ლარს შეადგენდა), საკრებულოს უმრავლესობამ გასული წლის ბოლოს ერთსულოვნად დაამტკიცა.
მუნიციპალიტეტის მერია, საკრებულოში პროექტის განხილვის პროცესში ირწმუნებოდა, რომ ფინანსთა სამინისტროში დაგეგმილი შეხვედრის შემდგომ ეს საკითხი გადაიჭრება და დეფიციტიც აღმოიფხვრებოდა.
როგორც ირკვევა, იანვარში საქართველოს ფინანსთა სამინისტროს საბიუჯეტო დეპარტამენტის სპეციალისტებთან ზემოთ ნახსენები შეხვედრა შედგა, სადაც მუნიციპალიტეტის 2026 წლის ბიუჯეტის პარამეტრები განიხილეს და ბიუჯეტის დაკორექტირების გადაწყვეტილებაც მიიღეს, რასაც საკრებულოს უმრავლესობამ მხარდაჭერა გამოუცხადა და ბიუჯეტით აღებული დაკორექტირებულ ვალდებულებები დაამტკიცა.
განმარტებითი ბარათის მიხედვით, რომელიც მერიის საფინანსო სამსახურმა ადგილობრივ წარმომადგენლობით ორგანოს წარუდგინა, 11 900 ლარით შემცირდა საკრებულოს საქონელი და მომსახურების მუხლის დაფინანსება, მერიის შრომის ანაზღაურების მუხლის დაფინანსება შემცირდა 228 700 ლარით.
როგორც გაირკვა, 2026 წლის ბიუჯეტში მერიის თანამშრომლებზე ხელფასი 13 თვეზე იყო გაწერილი და კორექტირების შედეგად, სწორედ ეს მეცამეტე ხელფასისთვის განკუთვნილი თანხა ამოიღეს ბიუჯეტიდან.
გარდა ზემოთ ნახსენებისა, შემცირდა: გზების კაპიტალური შეკეთების დაფინანსება 68 400 ლარით; გზების მიმდინარე შეკეთების დაფინანსება _ 50 000 ლარით; წყლის სისტემის რეაბილიტაციის სამუშაოების დაფინანსება _ 100 000 ლარით; გარე განათების ქსელის ექსპლოატაციის საქონელი და მომსახურების მუხლი _ 20 000 ლარით; გარე განათების მოხმარებული ელენერგიის ხარჯის დაფინანსება _ 50 000 ლარით; საზოგადოებრივი სივრცეების მოწყობა რეაბილიტაციის ექსპლოატაციის დაფინანსება _ 50 000 ლარით.
შემცირებულია ასევე სადღესასწაულო ღონისძიებების დაფინანსება _ 80 000 ლარით, მათ შორის საქონელი და მომსახურების მუხლი 60 000 ლარით, არაფინანსური აქტივების ზრდის მუხლი _ 20 000 ლარით; ეკონომიკური გაძლიერების მხარდაჭერის პროგრამის დაფინანსება 100 000 ლარით,
დასუფთავების და ნარჩენების გატანის ღონისძიებებისთვის განკუთვნილი დაფინანსება _ 123 300 ლარით შემცირდა, ხოლო სპორტული ცენტრის ხელშეწყობის ღონისძიებების დაფინანსება 29 400 ლარით, მათ შორის საქონელი და მომსახურების მუხლის _ 26 800 ლარი, შრომის ანაზღაურების მუხლი კი _ 2600 ლარით.
საფეხბურთო სკოლის ხელშეწყობის დაფინანსება 25 500 ლარით შემცირდა, კულტურის დაწესებულებათა გაერთიანების ხელშეწყობის ღონისძიებების დაფინანსება _ 87 000 ლარით, მათ შორის საქონელი და მომსახურების მუხლი 69 900 ლარით, შრომის ანაზღაურების მუხლი კი 17 100 ლარით.
შ.შ.მ პირთა დახმარების პროგრამისთვის განკუთვნილი თანხა 11000 ლარით შემცირდა, ხოლო მრავალშვილიანი ოჯახების დახმარების პროგრამა 15 000 ლარით.
მერიის განმარტებით, სკოლამდელი დაწესებულების ფუნქციონირების შრომის ანაზღაურების მუხლის 468 640 ლარით შემცირების ხარჯზე 188 700 ლარით შემცირდა ამ დაწესებულების წლიური დაფინანსება, ხოლო დარჩენილი 279 940 ლარით გაიზარდა საქონელი და მომსახურების მუხლის დაფინანსება.
გარდა განხორციელებული ამ შემცირებებისა, 150 ლარამდე გაიზარდა ლანჩხუთის ბიუჯეტის სარეზერვო ფონდი, რომელიც აქამდე 80 000 ლარით იყო განსაზღვრული.
ავტორი
