„ნებისმიერი საეჭვო სიმპტომისას ბავშვი სახლში უნდა დარჩეს“ — ეპიდემიოლოგის რეკომენდაციები სასწავლო წლის დაწყებისას

ახალი სასწავლო წლის დაწყებასთან ერთად, სკოლებსა და ბაღებში რესპირატორული და ნაწლავური ინფექციების გავრცელების რისკი იმატებს. რას უნდა მიაქციონ ყურადღება პერსონალმა და მშობლებმა, როგორ ავიცილოთ თავიდან ინტოქსიკაციები, პარაზიტული დაავადებები და ტანადობის დარღვევები ბავშვებში — ამ და სხვა აქტუალურ საკითხებზე „გურია ნიუსს“ ეპიდემიოლოგი ელზა სიმონიშვილი  ესაუბრება.

_ახალი სასწავლო წლის დაწყებისას, ინფექციების გავრცელებისა და სხვადასხვა გართულებების თავიდან ასაცილებლად,  უმნიშვნელოვანესია როგორც ბავშვთა დაწესებულებების პერსონალის,ისე მშობლებისა და ბავშვების  მხრიდან გარკვეული სამედიცინო და ჰიგიენური რისკების გათვალისწინება.

ბავშვთა ასაკში ინფექციური და ვირუსული დაავადებების მხრივ არსებობს გარკვეული სამედიცინო რისკები

ასეთი ხშირი  რისკებია:

ჰაერ–წვეთოვანი ინფექციები:

ერთმანეთთან მჭიდრო კონტაქტის გამო იმატებს რესპირატორული ვირუსების ( გრიპი, გრიპისმაგვარი დაავადებების,), ასევე ბავშვთა ინფექციების (ჩუტყვავილა, წითელა, ქუნთრუშა და ასე შემდეგ) გავრცელების რისკი.

მწვავე ნაწლავური ინფექციები: პირადი ჰიგიენისა და საკვების უსაფრთხოების წესების დარღვევამ შესაძლოა გამოიწვიოს ფეკალურ–ორალური / კონტაქტური  გზით გადამდები დაავადებები: (ნაწლავური ინფექციები, ჰეპატიტი A, პარაზიტული დაავადებები)  ამისი მაგალითი სამწუხაროდ დღევანდელ რეალობაში გვაქვს საბავშვო ბაღების აღსაზრდელთა ინტოქსიკაციის შემთხვევები

ტანადობის დარღვევის რისკი: არასწორად შერჩეულმა მაგიდამ და სკამმა(მერხმა), ზედმეტად მძიმე ჩანთის ცალ მხარზე ტარებამ, ასევე გაკვეთილზე(ან სახლში) ჯდომისას სხეულის არასწორმა პოზიციამ შეიძლება გამოიწვიოს ხერხემლის გამრუდება, რაც მოზარდის ჯერ კიდევ ჩამოუყალიბებელი ჩონჩხისათვის დიდი პრობლემა გახდება.

ამ დაავადებათა აღმოცენების პრევენციისა და თავიდან აცილებისათვის

ბავშვთა დაწესებულებების პერსონალის ამოცანაა:

შენობის რეგულარული განიავება და სველი წესით დასუფთავება;

ზედაპირების დეზინფექცია: მერხების, კარის სახელურების, მოაჯირებისა და ტუალეტების რეგულარული დამუშავება სადეზინფექციო საშუალებებით.

პირადი ჰიგიენის უნარების განმტკიცება:ბავშვისთვის ხელის სწორად დაბანის, დაცემინების/ხველებისას იდაყვის აფარებისა და პირადი ნივთების (ჭიქა, პირსახოცი) განცალკევების სწავლება;

საპირფარეშოებსა და ბუფეტის შესასვლელთან თხევადი საპნის, ერთჯერადი ქაღალდის პირსახოცებისა და ანტიბაქტერიული ხსნარების მუდმივი მარაგის უზრუნველყოფა.

პედიკულოზის (ტილიანობა), ბღერის(სკაბიესი) პრევენციისთვის პირადი ჰიგიენის დაცვა და საკუთარი  სავარცხლის/შარფის, ქუდის, სპორტული ტანსაცმლის და ა.შ. გამოყენება

ბავშვის ჯანმრთელობის პირველადი ვიზუალური შეფასება დილით:  ავადმყოფობის ნიშნების მქონე ბავშვის დროული იზოლირება მშობლის მოსვლამდე.

გეგმური და სეზონური ვაქცინაცია:

ეროვნული აცრების კალენდრით გათვალისწინებული ვაქცინების სტატუსის გადამოწმება (მაგ. წითელა-წითურა-ყბაყურა, დიფთერია-ტეტანუსი);

სეზონური გრიპის ვაქცინაციის განხილვა პედიატრთან.

 რასაც ახორციელებს სასწავლო-სააღმზრდელო დაწესებულების სამედიცინო პერსონალი.

 მშობლების მხრიდან სკოლისა და ბაღის სრული ინფორმირება:

დაწესებულებისთვის ზუსტი სამედიცინო ინფორმაციის მიწოდება (ალერგიების, ქრონიკული დაავადებების, ჯანმრთელობის სხვა პრობლემების თაობაზე) ასეთის არსებობის შემთხვევაში.

მშობლებისა და ბავშვების რეკომენდაციები:

რესპირატორული ჰიგიენა: ბავშვს უნდა ასწავლოთ დაცემინება/ხველება იდაყვის ნაკეცში ან ერთჯერად ხელსახოცში (და არა ხელისგულში).

პირადი ნივთების განცალკევება:

ბავშვს არ უნდა ჰქონდეს ჩვევა, სხვას გაუზიაროს წყლის ბოთლი, ჭიქა, საკვები ჭურჭელი ან პირადი ნივთები.

ავადმყოფობისას სახლში დარჩენა: სიმპტომების გამოვლენისთანავე ბავშვის სახლში დატოვება და იზოლირება ინფექციური დაავადებების დროს ეპიდემიოლოგიური ჯაჭვის გაწყვეტის მთავარი პირობაა.

კიდევ ერთხელ მინდა შევახსენო მშობლებს, რომ ნებისმიერი საეჭვო სიმპტომის არსებობის შემთხვევაში, აღსაზრდელი სასწავლო დაწესებულებაში არ უნდა მიიყვანონ.

უპირველესად საჭიროა მშობელთა ინფორმირება იმის თაობაზე, რომ ნებისმიერი საეჭვო სიმპტომის შემთხვევაში აღსაზრდელი არ უნდა მივიყვანოთ სასწავლო დაწესებულებაში, ასეთ დროს უნდა მივმართოთ ოჯახის ექიმს/ პედიატრს ამა თუ იმ დაავადების გამოსარიცხად, ხოლო დადგენილი დიაგნოზის შემთხვევაში შესაბამისი მკურნალობის კურსის დასრულებას მკურნალი ექიმი დაადასტურებს სამედიცინო დოკუმენტაციით, რომლის წარდგენა საჭიროა აღსაზრდელის სასწავლო დაწესებულებაში გამოცხადებისას.

ბავშვთა ასაკში და ასევე ზოგადად საბავშვო დაწესებულებაში(მ/შ პერსონალში) , სხვადასხვა გადამდები დაავადებების პრევენციასა და გავრცელების აღმოფხვრაში უდიდესი წვლილი მიუძღვის დაწესებულებების სამედიცინო პერსონალს: ექიმსა და ექთანს, რომლებიც ბავშვთა დაწესებულებებში გვყავს წარმოდგენილი, რადგან  ბავშვების ჰიგიენური უნარები ადრეული ასაკიდან ყალიბდება და სწორედ ამ უნარების ჩამოყალიბებაში უნდა დაეხმაროს მათ სასწავლო დაწესებულებათა პერსონალი მედიკოსებთან და  მშობელთან ერთად.

ექიმი/ექთანი  მუდმივად უნდა აცნობდეს  პედ/პერსონალსა და ბავშვებს  ჰიგიენის წესებს, დაავადებათა გადადების გზებს, ამოწმებდეს პირად ჰიგიენასა და გარემოს ჰიგიენას, განსაკუთრებით – სველი წერტილებისა და კვების ბლოკის მდგომარეობას, რომლებიც ინფექციის პოტენციური რისკის შემცველი  ობიექტებია

გარდა ამისა,  მნიშვნელოვანია, სასწავლო პროცესის დაწყებამდე მცირე ასაკის ბავშვთა ჰიგიენური მდგომარეობის შემოწმება ყოველდღიურად–კანის საფარის, თავის თმიანი ნაწილის, ფრჩხილების, ყურის, პირის ღრუს სისტემატიური დათვალიერება, დაკვირვება აღსაზრდელთა და მოსწავლეთა სიმპტომებზე, საეჭვო შემთხვევებში აუცილებელია ასეთი ბავშვი გავატანოთ მშობელს, ან ვამყოფოთ დროებით იზოლირებულად

 ამ რეკომენდაციების გათვალისწინება თავიდან აგვაცილებს ბავშვთა დაწესებულებებში ინფექციური დაავადებების, ასევე ხერხემლისა და ძვალ -სახსროვანი სისტემის დარღვევების შემთხვევებს. გისურვებთ ჯანმრთელ და წარმატებულ სასწავლო წელს.