ლანჩხუთის საკრებულოს თავმჯდომარის ბესიკ ტაბიძის შვილი ვახტანგ ტაბიძე, რომელიც გასული წლის აგვისტოში ყაჩაღობის ფაქტზე დააკავეს, პატიმრობიდან, სპეციალური სამაჯურით, გათავისუფლდა. მას მომავალი წლის თებერვლამდე შიდა პატიმრობაში მოუწევს ყოფნა.
საკრებულოს თავმჯდომარის შვილის საპატიმროდან გათავისუფელების ფაქტს გურიაში ოპოზიციის ნაწილი განვლილ თვითმმართველობის არჩევნებს უკავშირებს. მათი არგუმენტით, მმართველმა ძალამ არჩევნებზე მოპოვებული ხმების სანაცვლოდ გაათავისუფლა საკრებულოს თავმჯდომარის შვილი პატიმრობიდან.
ამ შეფასებებთან დაკავშირებით „გურია ნიუსი“ კომენტარისთვის ბესიკ ტაბიძეს დაუკავშირდა, რომელიც მსგავსი ბრალდებების ავტორებს კანონში ჩახედვას და წაკითხვას ურჩევს.
„ვურჩევ კანონში ჩაიხედონ და დასკვნები მერე დადონ. ჩემს შვილს სამი წელი აქვს მისჯილი და კანონში წერია, რომ მესამედზე პატიმრობა შეიძლება შეიცვალოს შიდა პატიმრობით. ეს კანონში წერია და ჩვენ განსხვავებული ხალხი ხომ არ ვართ?! კანონითაა განსაზღვრული, რომ პატიმრობის მესამედი, როცა გავა, ვისაც ეს მუხლი აქვს მისჯილი, პატიმრობა შეიძლება შეეცვალოთ შიდაპატიმრობით. ამაზე კომენტარის გაკეთებაც კი არ ღირს, რა ხმის სანაცვლოდ, ბესო ტაბიძე სულ იყო ავტორიტეტი და მთელი ცხოვრება ავტორიტეტი ვიქნები. ესენი რაღაცას უკავშირებენ, აბსურდია, კანონში ჩაიხედონ და წაიკითხონ“, -ამბობს ტაბიძე.
ცნობისთვის, ვახტანგ ტაბიძე 2020 წლის 20 აგვისტოს დააკავეს. შინაგან საქმეთა სამინისტროს მაშინდელი განცხადებით, 19 აგვისტოს, ბრალდებული ბათუმში მდებარე ერთ-ერთ სავალუტო ჯიხურს ყაჩაღურად თავს დაესხა, ამავე სავალუტო ჯიხურის მფლობელს, ბლაგვი საგნის გამოყენებით დაზიანება მიაყენა, თუმცა თანხის წაღებას ვერ შეძლო, რის შემდეგაც შემთხვევის ადგილიდან მიიმალა. მომხდართან დაკავშირებით ბათუმის საქალაქო სასამართლომ ვახტანგ ტაბიძეს პატიმრობა შეუფარდა.
[sexy_author_bio]
