აგვისტოს ომის მონაწილე მამუკა ბაჯელიძე ოზურგეთის მუნიციპალიტეტის სოფელ ნატანებში ცხოვრობს მეუღლესთან და ორ შვილთან ერთად. მძიმე სოციალურ პირობებში მცხოვრები ოჯახის არც ერთ წევრს სტაბილური სამუშაო არ აქვთ და არც არანაირი დახმარება ეძლევათ. ბაჯელიძეების პრობლემებს ამ დღეებში კიდევ ერთი პრობლემა დაემატა _ ძროხა და ხბო ნადირმა შეუჭამა.
“ამ დილით მეზობლის ძროხა და ხბო მკვდარი, მტაცებლისგან დაჭმული ვიპოვეთ. ასე თუ შემოგვეჩვია მგელი იქნება თუ ტურა, არ ვიცი, რა იქნება _ ისედაც ძლივს გააქვს თავი ხალხს”, _ გვითხრა სოფელ ნატანებში მცხოვრებმა სოსო ბოლქვაძემ.
მამუკა ბაჯელიძე მეუღლესთან და შვილებთან ერთად ცხოვრობს.
“ამჟამად სახლში ოთხი სული ვცხოვრობთ _ მე, ჩემი მეუღლე და ორი ქალიშვილი. ერთი შვილი 7 წლისაა, მეორე კი _ 4-ის. არანაირი დახმარება ჩვენ არ გვაქვს. სოციალური სააგენტოდან მაღალი ქულები მოგვივიდა, არადა, თქვენც კარგად ხედავთ, რა პირობებში ვცხოვრობთ.
ამ ეტაპზე შეკვეთილში ვმუშაობ, კვირაში ოთხი დღე და ოჯახს ამით ვარჩენ. ამ დღეებში ძროხა და ხბო შეგვიჭამა ნადირმა. ეს დიდი დანაკარგია ჩვენისთანა მძიმე პირობებში მცხოვრები ოჯახებისთვის. ამ პატარა ქოხში ვცხოვრობთ ოთხი ადამიანი. ვაპირებ ადგილობრივ ხელისუფლებას მივმართო დახმარებისთვის. დავიწყეთ ახალი სახლის მშენებლობა, მაგრამ ფული არ გვეყო და შევაჩერეთ.
დიდი ნაკვეთი არ გვაქვს და ზედ გაშენებული ციტრუსი დიდად მოსავლიანი არ არის. ბოლო დროს ფაროსანამაც დიდი ზარალი მოგვაყენა.
არ გვაქვს სოციალური დახმარება. მე 2008 წლის აგვისტოს ომის მონაწილე ვარ, თუმცა, ეს არავინ გაითვალისწინა. ომის ვეტერანს არანაირი დახმარება არ მეძლევა _ შეღავათები ხომ მაინც შეიძლება მქონდეს კომუნალურ გადასახადებზე?!” _ გვითხრა მამუკა ბაჯელიძემ.
მან ჩვენთან საუბრის დროს აგვისტოს ომის ამბები გაიხსენა:
“სკოლის დასრულების შემდეგ საკონტრაქტო ჯარში ვმსახურობდი. 2008 წელს ომში ვიყავი, ჯერ გორში და შემდეგ კი _ ცხინვალის მისადგომებთან. მძიმეა ჩემთვის იმ დღეების გახსენება. ჩემი თვალით ვნახე გაუბედურებული ჩემი თანამოქალაქეები, დაბომბილი ადგილები და მოკლული ბიჭები. აქვე ვიტყვი, რომ ომი დაიწყო რუსეთმა და ამაზე ზედმეტი კითხვები არ უნდა არსებობდეს”.
სანათე ბაჯელიძე, მამუკა ბაჯელიძის მეუღლე: “სკოლა დავამთავრე, შემდეგ სამედიცინო კოლეჯში ვსწავლობდი ოზურგეთში. მუშაობით არასდროს მიმუშავია. კოლეჯში სწავლის დასრულების შემდეგ გავთხოვდი და 8 წელია, საოჯახო საქმეებით ვარ დაკავებული”.
“გურია ნიუსი” ბაჯელიძეების თაობაზე სოციალური მომსახურების სააგენტოს დაუკავშირდა. როგორც გურიის სოციალური მომსახურების სამხარეო ცენტრში გვითხრეს, ბაჯელიძეებს ბოლო პერიოდში არ მიუმართავს სააგენტოსთვის: “მომართვის შემთხვევაში მოხდება სოციალური, ეკონომიკური მდგომარეობის შესწავლა და ოჯახს მიენიჭება სარეიტინგო ქულა”, _ გვითხრეს სააგენტოში.
ოზურგეთის მუნიციპალიტეტის მერის წარმომადგენელი სოფელ ნატანებში ნაირა კვაჭაძე ჩვენთან საუბრის დროს ამბობს, რომ ამ ეტაპზე, წერილობით მხოლოდ ნატანებში მცხოვრები გოგი თხილაიშვილის წერილი შევიდა, რომელსაც რამდენიმე დღის წინ, სავარაუდოდ, მგელმა ძროხა შეუჭამა და ამის შესახებ ინფორმაცია უკვე მიაწოდა ადგილობრივ ხელისუფლებას:
“ვიცი, რომ მამუკა ბაჯელიძესაც მსგავსი პრობლემა აქვს. ველოდებით მის განცხადებას და აუცილებლად ჩავაყენებთ საქმის კურსში ოზურგეთის მუნიციპალიტეტის მერს”, _ გვითხრა ნაირა კვაჭაძემ.
ოზურგეთის მუნიციპალიტეტის მერიის სოციალური და ჯანდაცვის საკითხთა სამსახურის იმჟამინდელი უფროსის, თამარ დუმბაძის თქმით, მამუკა ბაჯელიძეს, ჯერჯერობით, დახმარების თხოვნით არ მიუმართავთ ადგილობრივი ხელისუფლებისთვის.
