ჩოხატაურის მუნიციპალიტეტის მერიამ ა(ა)იპ-ების რეორგანიზაციის პროცესი დაასრულა. როგორც “გურია ნიუსი” წერდა, მოქმედი 14 ა(ა)იპ-ის ნაცვლად, 9 იფუნქციონირებს.
ცვლილების თანახმად, გაერთიანდა კომპლექსური სასპორტო სკოლა და სპორტის განვითარების ცენტრი, რომელსაც სპორტისა და სპორტულ ღონისძიებათა ორგანიზების ცენტრი დაერქვა.
“გურია ნიუსის” ინფორმაციით, ამ ცენტრს სასპორტო სკოლის ყოფილი დირექტორი თამაზ ძნელაძე უხელმძღვანელებს. რაც შეეხება სპორტის განვითარების ცენტრის ხელმძღვანელს ზურაბ ჯინჭარაძეს, ჩვენი ინფორმაციით იგი გაერთიანებული ორგანიზაციის ერთ-ერთ განყოფილებას ჩაიბარებს.
რეორგანიზაცია ასევე შეეხო სამუსიკო სკოლას, სამხატვრო სკოლას და მოსწავლე-ახალგაზრდობის სახლს _ სამივე ა(ა)იპ-ის გაერთიანების შედეგად ა(ა)იპ სახელოვნებო სკოლების გაერთიანება დაფუძნდა, რომელსაც სამუსიკო სკოლის დირექტორი ქეთევან გიორგაძე უხელმძღვანელებს.
საბიბლიოთეკო გაერთიანების, სამუზეუმო გაერთიანების და თანამედროვე სახვითი ხელოვნების გალერეის გაერთიანების შედეგად შექმნილ ახალ ორგანიზაციას არაფორმალური განათლებისა და კულტურული მემკვიდრეობის დაცვის ცენტრი ერქმევა და “გურია ნიუსის” მიერ ექსკლუზიურად მოპოვებული ინფორმაციის თანახმად, მისი ხელმძღვანელი ახალი სახე _ მარი შოშაშვილი იქნება.
მარი შოშაშვილმა 2001 წელს დაამთავრა ბერშუეთის საჯარო სკოლა (გორის რაიონი, ამჟამად ბუფერული ზონა). იმავე წელს ჩაირიცხა გორის სახელმწიფო უნივერსიტეტში და 2006 წელს დაამთავრა ჰუმანიტარულ მეცნიერებათა ფაკულტეტი.
სპეციალობით ფილოლოგია _ გერმანული ენისა და ლიტერატურის სპეციალისტი. აქვს მაგისტრის ხარისხი.
2012 წლიდან ამ დრომდე, #1 საჯარო სკოლის მანდატურად მუშაობდა; ჰყავს მეუღლე _ ბესიკ მეფარიშვილი და ორი შვილი.
_ ძალიან მოულოდნელი შემოთავაზება იყო ჩემთვის, თუმცა, დიდი გამოწვევაც. სიმართლე გითხრათ, ვნერვიულობ _ დიდი პასუხისმგებლობაა. იმედი მაქვს, რომ წარმატებული ხელმძღვანელი ვიქნები. გპირდებით, რომ ცდას არ დავაკლებ და ჩემს გამოცდილებას მაქსიმალურად გამოვიყენებ, _ აღნიშნა ჩვენთან საუბრისას მარი შოშაშვილმა.
როგორც გავარკვიეთ, შოშაშვილს მენეჯერულ სფეროში გამოცდილება საკმაოდ დიდი აქვს _ მის სახელზე #1 საჯარო სკოლაში გახორციელებული არა ერთი წარმატებული პროექტია. სკოლის დირექტორის, ეთერ წილოსანის თქმით, მარი შოშაშვილის წასვლა სკოლისთვის დანაკლისია:
_ ვერ გეტყვით, რომ ეს ჩვენთვის, სკოლისთვის კარგი ამბავია, რადგან მარის წასვლა ძალიან დასანანია ჩვენთვის. თუმცა, ამავე დროს მოხარული ვარ, რომ ნიჭიერი, პასუხისმგებლიანი და პროფესიონალი ახალგაზრდა შეამჩნიეს და მნიშვნელოვანი სფერო ჩააბარეს, _ აღნიშნა ჩვენთან საუბრისას წილოსანმა.
როგორ შეირჩა ახალი ა(ა)ი-პის ხელმძღვანელები, ამ თემაზე მუნიციპალიტეტის მერიასა და საკრებულოში არ საუბრობენ და მხოლოდ იმას ამბობენ, რომ დეტალები მას შემდეგ გახდება ცნობილი, რაც ახალი ა(ა)იპ-ების ხელმძღვანელებს ოფიციალურად წარადგენენ.
ოფიციალური წარდგენის კონკრეტულ თარიღს მერიაში არ გვისახელებენ. ამბობენ მხოლოდ იმას, რომ რეორგანიზაციას და ახალი ხელმძღვანელების დანიშვნასთან ერთად, შემცირებებიც გახორციელდება. თუმცა, რა ნიშნით და რა პრინციპით გაუშვებენ სახლში თანამშრომლებს, ამაზე საუბარი ჯერ არავის სურს.
ჩვენი ინფორმაციით, შემცირება გაერთიანებული ა(ა)იპ-ებიდან ძირითადად ადმინისტრაციულ ნაწილს შეეხება, რომელშიც დირექტორის მოადგილეები, ბუღალტრები, შესყიდვების სპეციალისტები, იურისტები, მედიასთან ურთიერთობების სპეციალისტები და საქმის მწარმოებლები შედიან.
“გურია ნიუსის” მონაცემებით, ეს რიცხვი 50-ს აღემატება, თუმცა, როგორც აღვნიშნეთ, ამ თემაზე მერიაში კომენტარი არ კეთდება.
ამ დროისთვის, ასევე, უცნობია, რა თანხა დაიზოგება მუნიციპალიტეტის ბიუჯეტიდან რეორგანიზაციის შედეგად. როგორც მერიაში გვითხრეს, კონკრეტული ციფრი მას შემდეგ გახდება ცნობილი, რაც ბიუჯეტი საკრებულოში შევა, თუმცა, დაახლოებითი მონაცემით, ეს თანხა 150 000 ლარს აღწევს.
გარდა ამისა, ჩვენთვის ასევე ცნობილი ხდება, რომ შემცირებები იმ ა(ა)იპ-ებშიცაა მოსალოდნელი, რომლებსაც რეორგანიზაცია არ შეხებიათ.
ჩოხატაურის მუნიციპალიტეტის მერის, ირაკლი კუჭავას მიერ ცოტა ხნის წინ გაკეთებულ განცხადებას თუ დავეყრდნობით, სახლში წასვლა “უსაქმურებს” მოუწევთ. თუმცა, ამ “უსაქმურების” ჩამონათვალი ამ დრომდე უცნობია და ასევე პასუხგაუცემელია კითხვა _ რატომ ვინახავდით ჩვენი გადასახადებიდან წლების განმავლობაში ადამიანებს, რომლებიც არაფერს აკეთებდნენ.
_ ძალიან მალე ყველაფერი ცნობილი გახდება. სამსახურებს პროფესიონალები შეინარჩუნებენ, _ აღნიშნავენ ჩოხატაურის მერიაში და კატეგორიულად გამორიცხავენ გავრცელებულ ინფორმაციას იმის შესახებ, რომ შემცირებები პოლიტიკური ნიშნით გახორციელდება.
კიდევ ერთი დეტალი, რაც ამ თემაზე მუშაობისას გავარკვიეთ ისაა, რომ ა(ა)იპ-ებში ხელფასების ზრდაც იგეგმება, რომელიც გასულ წელს შეამცირეს.
ხელფასების ზრდა, როგორც გაერთიანებულ, ასევე რეორგანიზაციის გარეშე დარჩენილ ა(ა)იპ-ებშიც მოხდება. ჩვენი ინფორმაციით, ანაზღაურება საბავშვო ბაღების პედაგოგებსაც გაეზრდება, თუმცა, მერიაში კონკრეტული მონაცემები ჯერ არ იციან.
ოფიციალური ინფორმაციის თანახმად, ამ დროისთვის ჩოხატაურის მუნიციპალიტეტის მერიის დაქვემდებარებაში მყოფ ა(ა)-იპ-ებში 602 ადამიანია დასაქმებული და მათ ხელფასებზე გასულ წელს 2 მილიონ 146 ათას 700 ლარი დაიხარჯა.
