“აქეთ ფაროსანამ შეგვჭამა, იქით _ დათვმა”

54 წლის ილია მარკოიძე ოზურგეთის მუნიციპალიტეტის სოფელ მთისპირში,  ე.წ. “უკანავას“ დასახლებაში დედასთან და მეუღლესთან ერთად ცხოვრობს.

როგორც ის “გურია ნიუსთან“ საუბრისას ამბობს, სოფელ მთისპირიდან მის სახლამდე რამდენიმე კილომეტრია გასასვლელი ფეხით. მის შემდეგ კი არავინ ცხოვრობს. მარკოიძის თქმით, ტყესთან ახლოს გაუსაძლისი პირობებია, რადგან ტყეში დათვები მომრავლდნენ.

 ჩვენი რესპონდენტის თქმით, დათვმა მას შინაური ცხოველები დაუგლიჯა და თვითონაც დაგლიჯა.  

„სახლში მე, მეუღლე და დედაჩემი ვცხოვრობთ. მე 54 წლის ვარ, ჩემი მეუღლე 46 წლისაა. სიმსივნე აქვს, მეორე სტადიაში. წლების წინ სოციალურ დახმარებას ვიღებდი, მაგრამ მას შემდეგ, რაც სააკაშვილის მთავრობა შეიცვალა, მომიხსნეს და აღარ დაუნიშნავთ. სადაზღვევო პოლისით მაინც ვსარგებლობდით. ახლაც თბილისში ვართ, საავადმყოფოში“.

როგორც ილია მარკოიძე ამბობს, ჯანმრთელობის პრობლემები მასაც აქვს.

„მე თვითონ 5 ოპერაცია მაქვს გაკეთებული ორ წელიწადში, ფილტვებზე. კენჭი აღმომაჩნდა, მერე თირკმელიც ამომიღეს. ძალიან რთულ მდგომარეობაში ვართ ყოველმხრივ. აქეთ ფაროსანამ შეგვჭამა, იქეთ _ დათვმა. იმდენი დათვია, რომ გარეთ ვერ გამოხვალ. ამის გამო საქონელი სულ გავყიდე. დათვი ხან ძროხას გვიჭამს და ხან ჩვენ გვჭამს. მე ფეხი მომაჭამა. ჩემმა მეუღლემ ყველას მიმართა დასახმარებლად, მე სიარული არ შემიძლია, _ ამბობს ილია მარკოიძე.

“გურია ნიუსმა“ კომენტარი სთხოვა სოფელ მთისპირის დეპუტატს ლადო ჩავლეშვილს, რომელმაც დაადასტურა ინფორმაცია, იმის შესახებ, რომ მარკოიძეებს ოჯახში ნამდვილად აქვთ ჯანმრთელობის პრობლემები:

_ სოციალურმა სამსახურმა უნდა გადაწყვიტოს, დაენიშნება თუ არა მათ სოციალური დახმარება, ჩვენ რაც შეგვეხება, მუნიციპალიტეტმა 500-ლარიანი დახმარება გაუწია ამ ბოლო დროს. ბოლო დღეებში როცა მოგვმართეს, ჩვენ მაქსიმალურად გავუკეთეთ, სხვა დანარჩენს რაც შეეხება, როგორც მე მაქვს ინფორმაცია, ჯანდაცვის სამინისტრომ უარი უთხრა იმ ოპერაციის დაფინანსებაზე, რაც მათ სჭირდებათ. მე ვთხოვ, როგორც იქნება შესაძლებელი, დაეხმარონ, _ ამბობს ჩავლეშვილი. მისივე თქმით, ოჯახს ჰყავს რამდენიმე ოჯახი ფუტკარი, რაც პრობლემას შექმნის სოციალურის დასანიშნად:

_ ორი ორხიდიანი მანქანა ოჯახის წევრზეა გაფორმებული, თხილი და ყანა აქვთ. სახლში  მეტალოპლასტმასის ფანჯრები აქვთ ჩასმული. რა გითხრათ, აბა… თუმცა, ჯანმრთელობის პრობლემები ნამდვილად აქვთ, _ ამბობს დეპუტატი.

სოციალური მომსახურების სააგენტოში კი აცხადებენ, რომ მარკოიძეების ოჯახს განცხადებით მათთვის არ მიუმართავთ:

_ აღნიშნულ ოჯახს არასდროს ჰქონია სოციალური, ფულადი დახმარება. მათ აქვთ უფლება, მოგვმართონ განცხადებით, რის შემდეგაც მოხდება ოჯახის გადამოწმება.