დღეს „დემირელის“ კოლეჯის მოსწავლეების მშობლებმა განათლების და მეცნიერების სამინისტროსთან კოლეჯის დახურვა გააპროტესტეს.
აქციის დროს მათ განათლებისა და მეცნიერების მინისტრის მოადგილე, ლია გიგაური შეხვდა.
შეხვედრის დასრულების შემდეგ ერთ-ერთმა მშობელმა, ლალი ყარაულაშვილმა ჟურნალისტებთან განაცხადა, განათლების სამინისტრომ მათ ბავშვების სხვა სკოლებში გადაყვანა შესთავაზა.
„განათლების სამინისტრომ პედკოლექტივის და ბავშვების სხვა სკოლებში გადაყვანა შემოგვთავაზა, სადაც „დემირელის“ კოლეჯის მსგავსი პირობები იქნებოდა მაგრამ ჩვენ ალტერნატივას ვერ ვხედავთ. მე დავაყენე საკითხი, რომ რადგან „დემირელის“ კოლეჯი დაყადაღებულია, თუ გამოვისყიდით ან რომელიმე ფიზიკური პირი მოინდომებს მის ყიდვას, ამ შემთხვევაში სკოლამ ჩვეულებრივ გააგრძელოს ფუნქციონირება. ავტორიზაციისთვის 5 თვეა დარჩენილი და ამ 5 თვის ვადაში თუ კოლეჯი გაივლის ავტორიზაციას უკვე ახალი სახელით გააგრძელებს ფუნქციონირებას“, _ ამბობს ყარაულაშვილი.
მან ასევე აღნიშნა, რომ ამ დროისთვის კოლეჯის შესყიდვით არავინ არის დაინტერესებული, თუმცა, „დემირელის“ კოლეჯის გადარჩენის სურვილი, შესაძლოა, სხივმა გამოთქვას, რადგან კოლეჯის ირგვლივ განვითარებულ მოვლენებს განიცდის.
მისივე თქმით, „დემირელის“ კოლეჯში მის იდეას და ასევე, განათლების სამინისტროს შეთავაზებებს განიხილავენ.
როგორც ჟურნალისტებთან განათლების და მეცნიერების სამინისტროს პრესსამსახურის უფროსმა ნატა ასათიანმა განაცხადა, ამ დროისთვის „დემირელის“ კოლეჯის მოსწავლეების მიღების სურვილი 6 კერძო სკოლას აქვს.
„როგორს საჯარო, ასევე, კერძო სკოლები მზად არიან, რომ „დემირელის“ კოლეჯის ნებისმიერი მოსწავლე მიიღონ. დღევანდელ შეხვედრაზეც გავაჟღერეთ კიდევ 1 დეტალი, რომ ჩვენ სწორედ მოსწავლეების, მასწავლებლების და მშობლების ინტერესებიდან გამომდინარე ვთავაზობთ მათ რომელიმე სკოლაში გადასვლას, რომ არ მოხდეს კლასის დაშლა, თუ ეს მათი სურვილიც იქნება. 6-მა კერძო სკოლამ გამოთქვა მათი მიღების სურვილი და ესენია : „შავნაბადა“, „აიეჯისი“, „მწიგნობართუხუცესი“, „ალბიონი“, „ჰელიოსი“ და ამერიკული კოლეჯი „პროგრესი“. ჩვენ ვაწარმოებთ მათთან მოლაპარაკებებს. ამ კოლეჯების მზაობის შესახებ უკვე „დემირელის“ კოლეჯის ადმინისტრაციასაც ეცნობება და იმედი მაქვს, რომ მალე მოსწავლეების, მათი მშობლების და მასწავლებლების ინტერესებიდან გამომდინარე მიიღებენ გადაწყვეტილებებს. რაც შეეხება სხივს, მას ჩვენთვის არ მოუმართავს, მაგრამ ნებისმიერ მშობელს სურვილის ქონის შემთხვევაში შეუძლია თავისი შვილი იმ სკოლაში გადაიყვანოს სადაც სურს.
15 სექტემბერს რადგან სასწავლო წელი იწყება, ვფიქრობ, ეს ყველაზე ოპტიმალური ვარიანტია და ჩვენ ვთავაზობთ, რომ ყველა მოსწავლე და მასწავლებელი, უკლებლივ სრული კორპუსი გადავიდეს ჩამოთვლილ კერძო სკოლებიდან ერთ-ერთში და გააგრძელონ სწავლა შეუფერხებლად“, _ განაცხადა ასათიანმა.
ამავე თემაზე:
“დემირელის კოლეჯი საუკეთესოა და მაინცდამაინც ამ საუკეთესოს ერჩიან”
“დემირელის კოლეჯის დახურვა პოლიტიკური დევნაა” _ აქცია განათლების სამინისტროსთან
