„ნაპოლის“ მთავარმა მწვრთნელმა ვალტერ მაძარიმ „რეალთან“ მარცხის (2:4) შემდეგ შემდეგი კომენტარი გააკეთა:
„თამაშით კმაყოფილი ვარ, რაღაც მომენტში ვიფიქრე, რომ 2:2-ის შემდეგ მესამე გოლსაც გავიტანდით. ზოგადად კმაყოფილი ვარ ბიჭების თამაშით, ასევე იმის გათვალისწინებით, თუ რა გარემოსა და სტადიონზე ვითამაშეთ. შესაძლოა, უფრო ყურადღებით უნდა ვყოფილიყავით, რადგან „რეალი“ კონტრშეტევებზე მომაკვდინებელია. დასანანი მარცხია, რადგან ვფიქრობ, მოგება შეგვეძლო.
დანარჩენზე ცოტა რამის თქმა შემიძლია, რადგან მატჩი სწორი მენტალიტეტით ვითამაშეთ, თითქმის ყოველთვის ცოცხლები ვიყავით და მეტოქეს პრობლემები შევუქმენით. ანგისას გოლის დღევანდელი ზეიმი ადასტურებს იმ კარგ განცდებს, რაც ამ გუნდის მიმართ მაქვს და მჯერა, რომ ამ სულისკვეთებით კარგი საქმეების გაკეთება შეგვიძლია. დღესაც სწორი სულისკვეთებით ვითამაშეთ, რეაგირება მოვახდინეთ და ეს ძალიან დამამშვიდებელი ფაქტია. ძალიან მაღალი დონის მეტოქე გვყავდა და ეს გასათვალისწინებელია. დიახ, ოსიმენი მხოლოდ მეორე ტაიმს რომ ითამაშებდა, თავიდანვე შეთანხმებული იყო. ის ტრავმიდან ახლახან დაბრუნდა და არ გვინდა, ძალიან დაიტვირთოს”,– განაცხადა ვალტერ მაძარიმ.
იტალიურმა მედიამ ხვიჩა კვარაცხელიას მადრიდული თამაში შემდეგნაირად შეაფასა:
Corriere Della Sera 6.5 ქულა: „მან დაიწყო პირველი საგოლე შეტევა და არასდროს ჩერდება. ყოველთვის სახიფათო იყო“.
Eurosport 6.5 ქულა: „დი ლორენცოზე პასმა ჩოლიტო სიმეონეს გოლამდე მიგვიყვანა. ის „ნაპოლის“ შეტევაში ყოველთვის მთავარი წერტილია, მაგრამ ცუდად წარმართა კონტრშეტევა 2:2-ზე“.
Oa Sport 6 ქულა: „ანგარიში მისი ჩაწოდებით გაიხსნა. მეორე ტაიმში ცოტა არ იყოს, ფუჭი მოქმედებები ჰქონდა და შესანიშნავი კონტრშეტევა გააფუჭა. ბოლოს დაღლილი ჩანდა“.
Tuttomercatoweb 5.5 ქულა: „ქართველი ტუზი მეტაფორულად ჯადოქარია, რომლისგან ყოველთვის ელოდებიან, რომ ქუდიდან კურდღელს ამოიღებს, მაგრამ დი ლორენცოზე პარაშუტის გარდა, ძალიან იშვიათად ბრწყინავდა. ეს რიუდიგერის დამსახურებაცაა, რომელმაც ის თავისი გამოცდილებით შეაჩერა. 52-ე წუთზე გაანადგურა პოტენციური 3:2, როდესაც კონტრშეტევაზე არასწორი არჩევანი გააკეთა. ეს კვარა „რეალის“ დონის არ იყო“.
Calciomercato 6 ქულა: „დი ლორენცოს შორეულ ძელთან შესანიშნავი პასი გაუკეთა, მაგრამ რამდენიმე პოტენციურად ძალიან კარგი სიტუაცია არაზუსტი მოქმედებით გააფუჭა“.
ცნობილი გახდა, რომ „ტორინოს“ ქართველი მცველი საბა საზონოვი საწვრთნელ პროცესს დაუბრუნდა. წინა კვირაში მას ცხვირზე ოპერაციის გაკეთება მოუწია, რის გამოც გარკვეული პერიოდი გაუცდა.
იტალიური მედიის მტკიცებით, „ატალანტასთან“ უახლოესი შეხვედრისთვის ქართველი მზად იქნება, თუმცა დამცავი ნიღბით შეძლებს თამაშს.
მიმდინარე სეზონში საბა საზონოვმა „ტორინოს“ ღირსება მხოლოდ სამ შეხვედრაში დაიცვა.
„მილანს“ კი მთავარ მწვრთნელად ანდრეი შევჩენკო შესთავაზეს. მილანურ კლუბს ბოლო დროა წარუმატებელი შედეგები აქვს, რის გამოც ამჟამინდელ მთავარ მწვრთნელ სტეფანო პიოლის მომავალი კითხვის ნიშნის ქვეშ დადგა.
“მილანის“ ხელმძღვანელობას შევჩენკოს დანიშვნა სეზონის ბოლომდე რამდენიმე შუამავალმა შესთავაზა, მაგრამ გუნდში უკრაინელის ვარიანტზე ჯერ არ ფიქრობენ.
ანდრეი შევჩენკო სამწვრთნელო კარიერაში ბოლოს „ჯენოას“ ავარჯიშებდა, მანამდე კი უკრაინის ნაკრების მწვრთნელი იყო, რომელიც 2021 წელს ევროპის ჩემპიონატის მეოთხედფინალში გაიყვანა.
ქართველებისათვის კარგად ნაცნობი რუდი გარსია, რომელიც ცოტა ხნის წინ „ნაპოლიდან“ გაათავისუფლეს, შესაძლოა, ფრანგული „ნანტის“ მწვრთნელად დაინიშნოს.
ფრანგული მედიის ცნობით, ფრანგი სპეციალისტი „ნანტის“ თავკაცის პოსტზე აქტიურად განიხილება. ამ გუნდიდან პიერ არისტუ დაითხოვეს, რომლის შეცვლის მთავარი კანდიდატი ჟოკლინ გურვენეკია, მაგრამ სიაშია რუდი გარსიაც, რომელიც ამჟამად უმუშევარია.
ავტორი
