“კომუნისტების დროიდან მოყოლებული რამდენი მთავრობა გამოვიცვალეთ და მაინც არაა ამ სოფლის საშველი. კიდევ ოცი მთავრობა რომ შეიცვალოს, არც ერთი არ იქნება ჩვენი პატრონი“, _ მსგავსი შინაარსის ფრაზებს ხშირად გაიგონებთ ადგილობრივებისგან, სოფლის ცენტრში რამდენიმე წუთით თუ გაჩერდებით.
საქმე ისაა, რომ ლანჩხუთში სოფელ ქვიანის ცენტრში მდებარე წყაროდან გამომავალი წყალი თავის დროზე საკმაოდ დიდი მილით ახლოს მდებარე ღელეში ჩაედინებოდა, თუმცა, უკვე კარგა ხანია ეს მილი დაზიანებულია, სოფლის ცენტრი, ფაქტობრივად, დაჭაობებულია და ანტისანიტარია სუფევს ირგვლივ.
“სადმე მიყრუებულ ადგილას რომ წახვიდე, იქაც კი არ იქნება სოფლის ცენტრი ასეთ მდგომარეობაში. წყალთან ხომ ვეღარ მიხვალ, ისეთი მდგომარეობაა და ვეღარც საექიმო უბნის ეზოში შეხვალ _ ტალახი და წყალია ყველგან. წყაროდან გამოსული წყალი ადრე ღელეში ჩადიოდა მილით, მაგრამ დაძველდა, გამოვიდა მწყობრიდან და ახლა პირდაპირ ქუჩაში იღვრება. ჰოდა, ვითხოვთ, ვისაც ევალება, მიაქციონ ყურადღება ამ საკითხს და მოაგვარონ ეს პრობლემა“, _ ამბობენ ადგილობრივები.
საკრებულოს ოპოზიციონერი წევრი გოჩა ჯანაშია, რომელიც თავადაც ამ სოფლის მკვიდრია, ამბობს, რომ “აუცილებლობას წარმოადგენს ახალი ღია კაპიტალური საწრეტი არხის მშენებლობა, რომელიც წყაროდან წამოსულ წყალს სოფლის ღელეში ჩაიტანს”.
“იყო დრო, სანამ ავტობანის ჯაპანა–ლანჩხუთის მონაკვეთი გაიხსნებოდა, სოფელ ქვიანის ცენტრს დიდი დატვირთვა გააჩნდა. აქ მდებარე წყაროს წყალი გამვლელ–გამომვლელთა ყურადღებას იქცევდა და საკმაოდ ბევრი ადამიანი ჩერდებოდა წყლის დასალევად და არსებულ ბაზარზე გამოტანილი ხილის დასაგემოვნებლად. თუმცა ეს ბოლო წლებია სოფლის ცენტრი უყურადღებოდ აღმოჩნდა, წყაროდან გამომავალი წყლის გამტარი დიდი მილიც მწყობრიდან ხშირად გამოდის და იქვე მდებარე ამბულატორიის შესასვლელს აჭაობებს. ფაქტია, რომ მისი გაწმენდა უკვე შეუძლებელია და აუცილებლობას წარმოადგენს ახალი ღია კაპიტალური საწრეტი არხის მშენებლობა, რომელიც წყაროდან წამოსულ წყალს სოფლის ღელეში ჩაიტანს. საუბარია, დაახლოებით, 50 მეტრის არხზე, რომლის გარეშე პრობლემა ვერ გადაწყდება.
ამასთან ქვიანის ცენტრში არის ძველი კულტურის სახლის შენობა, რომელიც უკვე კატასტროფულს ხდის არსებულ იერსახეს. ეს შენობა ავარიულია და საფრთხესაც უქმნის ადგილობრივ მოსახლეობას, იქვე სტადიონზე მოთამაშე ბავშვებს. ადრე იყო საუბრები, რომ ამ შენობის ადგილზე ეკლესია აღმართულიყო, მაგრამ მიზეზთა გამო ეს საუბრები, რეალობად ვერ იქცა და მოსახლეობა ითხოვს სოფლის ცენტრის კეთილმოწყობას და ამ ავარიული შენობის ადგილზე, ახალი ხელოვნურსაფარიანი სტადიონის მშენებლობას, რომლის წინ შესაძლებელია პატარა სკვერიც მოეწყოს და ზემოთ ნახსენები საწრეტი არხის გაყვანითა და უშუალოდ ისტორიული წყაროს მიმდებარე ტერიტორიის კეთილმოწყობით, სოფლის ცენტრსაც მიეხედება და ანტისანიტარიის კერაც აღმოიფხვრება“, _ ამბობს საკრებულოს წევრი.
პრობლემა რომ დროულ მოგვარებას საჭიროებს, ამას მმართველი გუნდის ადგილობრივი წარმომადგენლებიც გვიდასტურებენ. მათგან მიღებული ინფორმაციით, საქმის კურსშია ყველა, ვისაც პრობლემის მოგვარება ხელეწიფება და იმედიც დიდია, რომ უახლოეს ხანში გახდება შესაძლებელი მისი მოგვარება.
“უკვე მიდის პროექტზე მუშაობა, რომ კაპიტალურად გაკეთდეს ყველაფერი და წყაროდან გამოსული ნარეცხი წყალი ღელეში ჩავიდეს. აქ მილი იყო, რომელიც პერიოდულად იჭედებოდა და მე, პირადად, არაერთხელ მომიწია მისი გაწმენდა, თუმცა, ბოლოს ისეთი მდგომარეობა შეიქმნა, რომ შეუძლებელი გახდა მისი გაწმენდა. ამიტომ მიდის ახლა პროექტზე მუშაობა, რამდენიმე თვე დააგვიანდა სამუშაოების დაწყებას“, _ გვითხრა მერის წარმომადგენელმა გიგა დოლიძემ.
ავტორი
