გუშინ, გამოცემამ Goal.com. საინტერესო ინფორმაცია გაავრცელა. „ნაპოლის“ პრეზიდენტი აურელიო დე ლაურენტისი მზადაა იტალიელ სპეციალისტს ანტონიო კონტეს შესთავაზოს კონტრაქტი წელიწადში 8 მილიონი ევროს ოდენობით, რათა ის თავისი გუნდის ჩაბარებაზე დაითანხმოს.
დე ლაურენტისს მიაჩნია, რომ კონტე ის სპეციალისტია, რომელსაც შეუძლია „ნაპოლი“ იტალიის ჩემპიონატში წამყვან პოზიციაზე დააბრუნოს. ნეაპოლური კლუბის მფლობელი მზადაა 54 წლის სპეციალისტს შესთავაზოს ფართო უფლებამოსილებები კლუბის სატრანსფერო პოლიტიკის მართვისა და ახალი სპორტული დირექტორის დანიშვნაში.
კონტეს ბოლო სამუშაო ადგილი „ტოტენჰემი,“ გახლდათ, რომელსაც ის 2021 წლის ნოემბრიდან 2023 წლის მარტამდე წვრთნიდა.
ასევე ცნობილი გახდა, რომ დე ლაურენტისი მომდევნო სეზონისთვის ახალ სპორტულ დირექტორსაც ეძებს.
გასულ ზაფხულს ეს თანამდებობა კრისტიანო ჯუნტოლიმ დატოვა, რომელიც „იუვენტუსში“ გადავიდა, ხოლო დე ლაურენტისმა ის მაურო მელუზოთი შეცვალა. ამ ნაბიჯმა არ გაამართლა, რაც მოულოდნელობა არ ყოფილა – მელუზოს არასდროს ჰქონია გამორჩეული სახელი და კარიერა იტალიურ ფეხბურთში.
იტალიური მასმედიის მტკიცებით რომ „ნაპოლის“ მფლობელი „იუვენტუსში“ მომუშავე 35 წლის ჯოვანი მანას შეუთანხმდა. მხარეები უკვე მორიგდნენ და თუ რაიმე გაუთვალისწინებელი არ მოხდა, მანა „ნაპოლის“ სპორტული დირექტორი გახდება.
ჯოვანი მანა 2019 წლიდან მუშაობს „იუვენტუსში“, სადაც ჯერ 23-წლამდე გუნდს ხელმძღვანელობდა, ბოლო დროს კი, მთავარი გუნდის უფროსი იყო.
„ნაპოლის“ ფეხბურთელი ხვიჩა კვარაცხელია კი გუნდთან ერთად მუშაობას ისევ ვერ ახერხებს.
გუშინ, ქართველმა ფეხბურთელმა ამჯერად შეძლო მოედანზე ვარჯიში, მაგრამ ისევ ინდივიდუალურად.
ხვიჩამ ტრავმა საქართველოსა და საბერძნეთის ნაკრებთა მატჩში მიიღო, რის გამოც „ატალანტასთან“ შეხვედრა გამოტოვა. ჯერჯერობით უცნობია, მოახერხებს თუ არა, მომდევნო ტურში „მონცასთან“ მოედანზე გასვლას.
მიმდინარე სეზონში ხვიჩა კვარაცხელიამ „ნაპოლის“ მაისურით ყველა ტურნირზე 38 შეხვედრაში 10 გოლი გაიტანა, 5 საგოლე პასი გააკეთა და ორჯერ პენალტი მოიპოვა.
ცნობილი გახდა, რომ “ნაპოლიმ” “გალათასარაის” ცენტრალურ მცველთან, ვიქტორ ნილსონთან, პირადი კონტრაქტის დეტალები შეათანხმა.
დანიელმა მცველმა თურქულ გუნდს უკვე აცნობა, რომ ზაფხულში ქალაქ ნეაპოლში გადასვლა სურს.
“გალათასარაი” 25 წლის ფეხბურთელის სანაცვლოდ 15 მილიონ ევროს ითხოვს, თუმცა “ნაპოლის” მოთამაშის სანაცვლოდ ჯერჯერობით ოფიციალური წინადადება არ გაუკეთებია.
საქართველოს ეროვნული გუნდი სადებიუტო ევროპის ჩემპიონატზე პირველ შეხვედრას 18 ივნისს, თურქეთის ნაკრების წინააღმდეგ,დორტმუნდის “ვესტფალენშტადიონზე” გამართავს. ჩვენი ნაკრები F ჯგუფში მოხვდა, სადაც მეტოქეებად ასევე ჩეხეთი და პორტუგალია ეყოლება.
თურქული საფეხბურთო გადაცემა „Box to Box“-ის ბოლო გამოშვებაში, ჟურნალისტმა ოზგურ ბუზბაშმა ევრო 2024-ის F ჯგუფი და თავისი გუნდის შანსები განიხილა. მისი თქმით, საქართველო ძალიან საშიში და რთული მეტოქეა.
“საქართველოსი მეშინია, რთული მეტოქეა. ამ გუნდების წინააღმდეგ შანსი არ გვაქვს. ჩეხეთის ნაკრებში ბევრი ფეხბურთელი პრაღის „სპარტადან“ თამაშობს. ვიცით, რომ პორტუგალია ძლიერი მეტოქეა. იმედი მაქვს, ჩვენი ეროვნული გუნდი ამ შედეგებიდან რამეს ისწავლის”, – აღნიშნა თურქმა წამყვანმა.
ევროპის ჩემპიონატზე 24 გუნდი 6 ჯგუფში არის გადანაწილებული. მერვედფინალის საგზურს შესაბამის ჯგუფში პირველ და მეორე ადგილზე გასული გუნდების გარდა, ოთხი საუკეთესო მესამეადგილოსანიც მიიღებს.
თურქეთთან მატჩის შემდეგ საქართველო 22 ივნისს ჩეხეთს შეხვდება, ბოლოს კი, 26 ივნისს, ჯგუფის და ტურნირის ერთ-ერთ ფავორიტს, პორტუგალიას დაუპირისპირდება.
ავტორი
