6 თებერვალს რესტორნები, ფიტნეს ცენტრები და საბავშვო ცენტრები მრავალდღიანი საპროტესტო აქციების შემდეგ, დაუმორჩილებლობაზე გადადიან და თვითნებურად გახსნას აპირებენ.
მათ გადაწყვეტილებას გამოეხმაურა საქართველოს ეკონომიკისა და მდგრადი განვითარების მინისტრი, ნათია თურნავა და განაცხადა, რომ დაუმორჩილებლობა, კანონის დარღვევა, კანონის, წესებისა და ეპიდემიოლოგიური წესების მიმართ დაუმორჩილებლობა არის მიუღებელი. ამას, რა თქმა უნდა, მოყვება მკაცრი რეაქცია.
„წინა ორშაბათს, ანუ 25 იანვარს გვქონდა საკმაოდ წარმომადგენლობითი შეხვედრა. ეკონომიკური გუნდი, ჩვენი მხრიდან მაია ცქიტიშვილის ხელმძღვანელობით, ჩემი კოლეგა ფინანსთა მინისტრი, ჯანდაცვის მინისტრი, ბატონი ამირან გამყრელიძე, ბიზნესომბუდსმენი, შევხვდით სარესტორნე ინდუსტრიას. იქ წარმოდგენილები იყვნენ როგორც რესტორატორთა ასოციაციების ხელმძღვანელები, ასევე ცალკეული რესტორნები. გვქონდა საკმაოდ დეტალური განხილვა, როდესაც ჩვენ გავაცანით მიდგომები და კრიტერიუმები, თუ რითი ვსაზღვრავთ ამა თუ იმ ბიზნესის გახსნას, მათ შორის სარესტორნო ინდუსტრიასთან მიმართებით. ასევე, ვიმსჯელეთ აჭარაში უკვე მომხდარ გახსნაზე, სადაც ღია სივრცეები პირველი თებერვლიდან უკვე არის დაშვებული“, – განაცხადა ნათია თურნავამ.
მისივე თქმით, მხარეებს შორის კომუნიკაციის ნაკლებობა ნამდვილად არ არსებობს.
„გარდა ამისა, ჩვენც, სამინისტროს, ტურიზმის ადმინისტრაციას პრაქტიკულად ყოველდღიურ რეჟიმში აქვთ კომუნიკაცია ხან ონლაინ, ხან ფიზიკური შეხვედრით ტურისტულ ინდუსტრიასთან, მათ შორის, რესტორნებთან. გასაგებია, იმის გამო, რომ რესტორნები მთელ საქართველოში ჯერჯერობით ვერ იხსნება, მათ აქვთ უკმაყოფილება, მაგრამ დაუმორჩილებლობა, კანონის დარღვევა, კანონის, წესებისა და ეპიდემიოლოგიური წესების მიმართ დაუმორჩილებლობა არის მიუღებელი. ამას, რა თქმა უნდა, მოჰყვება მკაცრი რეაქცია. მაგრამ, ვინაიდან ჩვენ, პრაქტიკულად, ყოველდღიურ რეჟიმში, პრემიერ-მინისტრთან ერთად, ეკონომიკურ გუნდთან ერთად ვიხილავთ, თუ როდის შეიძლება, ჩვენ, იგივე აჭარის მოდელი, სადაც ჯერ ღია სივრცეები გავხსენით, გადმოვიტანოთ დანარჩენ საქართველოზე და ვაკვირდებით ეპიდემიოლოგიურ ვითარებას, ვეძებთ გამოსავალს. აქედან გამომდინარე, ჩემი თხოვნა იქნება და იმედს გამოვთქვამ, რომ რესტორნები ასეთი არასწორი, არაკანონიერი ქმედებით, არ გაართულებენ დიალოგს ჩვენ შორის. ძალიან დიდი იმედი მაქვს, რომ გვექნება მათთან დაკავშირებით კონკრეტული გადაწყვეტილებები, რომლებზეც ყოველდღიურად ვმსჯელობთ, თუმცა, აი, ასეთი ქმედება, რომელიც დაკავშირებულია კანონის დარღვევასთან, დაუმორჩილებლობასთან, ძალიან გაართულებს დიალოგს და იმედს გამოვთქვამ, რომ ეს ასე არ მოხდება“, – აღნიშნა ნათია თურნავამ.
შრომის პირობების ინსპექტირების დეპარტამენტის უფროსის, ბექა ფერაძის განცხადებით, თვითნებურად გახსნის შემთხვევაში, რესტორნები დაჯარიმდებიან.
„ჩვენ აქტიურად ვართ ჩართული სხვადასხვა სექტორული მიმართულებით ბიზნესთან კომუნიკაციაში. მე პირადი სატელეფონო კომუნიკაცია მაქვს მათთან და იმედი მაქვს, რომ კვირის განმავლობაში კონსენსუსამდე მივალთ და ასეთი რადიკალური ზომები მიღებული არ იქნება მათი მხრიდან, ვინაიდან ამის საფუძველი არ არსებობს. თუ ამის უკიდურესი აუცილებლობა დადგება და იმედი მაქვს, რომ ამ დონეზე არ მივა ჩვენი ურთიერთობა, სანქციები, ბუნებრივია, იქნება გამოყენებული. ესაა 2 000 ლარი ფიზიკური პირის, ხოლო 10 000 ლარი იურიდიული პირის მიმართ, ხოლო განმეორება იწვევს სისხლის სამართლებრივ პასუხისმგებლობას, რაც ასევე იწვევს ობიექტის დალუქვას“,- აღნიშნა მან.
ფერაძის განცხადებით, თვითნებურად გახსნას ყველა რესტორანი არ გეგმავს და აბსოლუტური უმრავლესობა მთავრობის ეტაპობრივი გახსნის გეგმას მიჰყვება.
„ეს არის არა რესტორნების აბსოლუტური უმრავლესობა, არამედ გარკვეული ჯგუფი, რომელიც მსგავს მოთხოვნებს აყენებს. ჩვენ ბევრ რესტორანთან გვაქვს კომუნიკაცია, რომელიც გვეუბნება, რომ მათთვის დღეს არაა პრიორიტეტული სამუშაოების განხორციელების უფლების მიღება, რადგან სხვადასხვა მიმართულებით გარკვეული პრობლემები წარმოექმნებათ. რესტორნების აბსოლუტური უმრავლესობა სრულად იზიარებს მოთხოვნებს და მიჰყვება მთავრობის მიერ დაანონსებულ ეტაპობრივი გახსნის პროცესს, ამას სრული პასუხისმგებლობით ვამბობ. ამასთან, არის გარკვეული ჯგუფი, რომელიც ამბობს, რომ მათთვის ძალიან მნიშვნელოვანია გახსნა, ამიტომ ამ ორი ჯგუფის ინტერესები უნდა იყოს შეჯერებული. ჩვენ საჭიროების შემთხვევაში, კიდევ შევხვდებით მათ, გვექნება კომუნიკაცია და ამიტომ, მაქვს იმედი, რომ შაბათს მათი მხრიდან ასეთი რადიკალურ ღონისძიებები არ იქნება განხორციელებული“,-აღნიშნა ბექა ფერაძემ.
თავის მხრივ რესტორატორები ამბობენ, რომ რთული ფინანსური მდგომარეობა აქვთ.
რესტორატორთა ასოციაციის თავმჯდომარე შოთა ბურჯანაძემ “პალიტრანიუსის” ეთერში განაცხადა, რომ სექტორი თვითნებური გახსნის გადაწყვეტილებამდე აბსურდულმა რეალობამ მიიყვანა.
,,ეს გადაწყვეტილება მიღებულია აუცილებლობიდან გამომდინარე, სხვა შემთხვევაში არა თუ დარგი, მასში დასაქმებული ადამიანებიც კი ვეღარ იარსებებენ. ამ გადაწყვეტილებაში რესტორატორები ხედავენ გადარჩენას. ბატონმა ფერაძემ განაცხადა, რომ მას აქვს კონტაქტი რესტორნებთან და მათგან იცის, რომ არ იხსნებიან. ეს რას ნიშნავს. ზეწოლას ახორციელებს იურიდიულ პირებზე? მეორე საკითხია ქალბატონი თურნავას განცხადება, რომ მიიღებენ ზომებს“, – აღნიშნა ბურჯანაძემ.
მისივე თქმით, რეალობის აბსურდულობა გამოხატულია იმაში, რომ სასტუმროს რესტორნებით მოქალაქეები უპრობლემოდ სარგებლობენ, ხოლო ჩვეულებრივ კვების ობიექტებს ხელისუფლება ეპიდ გავრცელების წყაროდ მიიჩნევს.
ცნობისთვის, შეზღუდვების მოხსნის მოთხოვნით მთავრობის ადმინისტრაციასთან აქცია 30 იანვარს ჩატარდა. როგორც ორგანიზატორებმა თქვეს, იმ შემთხვევაში, თუ მთავრობა 1-ლი თებერვლიდან გახსნის გეგმას არ წარადგენდა, დაუმორჩილებლობას გამოაცხადებდნენ და მუშაობას განაახლებდენ. ასევე, 30 თებერვალს რესტორნებმა ბოიკოტი გამოაცხადეს და გატანის სერვისი გათიშეს.
