რადიო „პალიტრის“ გადაცემაში „თქვენი დრო“ სტრატეგიული კვლევების და განვითარების ცენტრის მომხმარებლის უფლებების დაცვის პროგრამის ხელმძღვანელმა ვახტანგ კობალაძემ განაცხადა, რომ ხორცისა და რძის პროდუქტებისგან ადამიანი შესაძლოა იმდენად მძიმედ მოიწამლოს, რომ ლეტალობა დადგეს. სწორედ ამიტომ, მნიშვნელოვანია, რომ მოქალაქემ რძის და ხორცის პროდუქტები სიფრთხილით შეარჩიოს.
როგორც მან აღნიშნა, თავი უნდა შევიკავოთ ისეთ ადგილებში შეძენისგან, სადაც არ არის სათანადო ჰიგიენური მოთხოვნები დაცული. ეს განსაკუთრებით ეხება მალფუჭებად პროდუქციას.
„ჩურჩხელა არ არის მაგალითად მალფუჭებადი, მაგრამ მისი გარეგანი დაბინძურება, შეხებით თუნდაც, რა პირობებში არის ხოლმე ჩამოკიდებული… არავის ვურჩევ ყიდვას – ღია ცის ქვეშ, მტვერში რომ არის ჩამოკიდებული. მალფუჭებადი პროდუქცია არის ძალიან საშიში – რძის ნაწარმი იქნება ეს, კვერცხი, ხორცი. გარდა იმისა, რომ შეიძლება გაფუჭდეს, საქონელი ხშირად არ არის დაკლული ვეტერინარული ზედამხედველობის ქვეშ, გარეთ იმიტომ ყიდიან, რომ არის შინაურ პირობებში დაკლული. არც ცხოველის ჯანმრთელობა ვიცით და არც მისი დაკვლის პირობები. თერმულ დამუშავებას რაც შეეხება, თერმულ დამუშავებამდე ხელით უნდა შევეხოთ იმ ხორცს, შეიძლება ჯილეხი გადაგვედოს და თერმული დამუშავებასაც გააჩნია“, – განაცხადა კობალაძემ.
ვრცლად: bpn.ge
