ოზურგეთის საოლქო საარჩევნო კომისიაში „ქართული ოცნების“ წარმომადგენლად ავთანდილ მექვაბიშვილია დანიშნული. მექვაბიშვილი, რომელიც 2012 წლამდე „ქართული ოცნების“ დამარცხებისთვის ყველაფერს აკეთებდა, „ნაციონალური მოძრაობის“ რაიონული ორგანიზაციის ხელმძღვანელიც კი იყო და რომლის შესახებ „გურია ნიუსის“ არქივში არაერთი მასალა მოიპოვება.
გაზეთი გურია ნიუსი” 11.11.2009 წელი; ნაწყვეტი სტატიიდან _ “რა კმარა დღევანდელ საქართველოში”
რესპონდენტი _ ოზურგეთის მუნიციპალიტეტის გამგებელი ავთანდილ მექვაბიშვილი.
“თქვენ მოგებული არჩევნებით გიცნობენ… როგორც რევოლუციამდე, ისე, მას შემდეგ (მექვაბიშვილი ბოლო დროს გამართული თითქმის ყველა არჩევნების დროს საოლქო საარჩევნო კომისიის თავმჯდომარე იყო).
_ რა შუაშია არჩევნები?! კაცი თუ ხარ, არჩევნებზეც მაგარი უნდა იყო, ცხოვრებაშიც და ყველგან _ სადაც ხარ. კაცი ხარ და მაგარი ხარ ყველგან. წაქცეული კი ყველგან წაქცეულია.
_ ერთხელ, ენერგოკომპანიის ჩოხატაურის ფილიალის ხელმძღვანელმა გვითხრა _ მკვდრებს ფულს არ ვახდევინებ, თანხას ვწერ მათ სახელზეო… სამწუხაროდ, ეს ის მიცვალებულებია, რომელიც ხელისუფლებას არა და არ ყოფნის საარჩევნო სიებში… ეს არ კმარა?
_ როგორ გეკადრებათ?! მიცვალებული მაშინ არის საარჩევნო სიაში, თუ ის ახალი გარდაცვლილია. სიებში ბოლო ჩასწორება არჩევნებამდე ათი დღით ადრე ხდება.
_ ათი წელია მამაჩემი მკვდარია და ყველა არჩევნებზე სიაშია…
_ზღაპარია _ ასეთ ადამიანებს ვერ ნახავთ. ეს ოპოზიციის სისულელეა. არჩევნების გაკეთება თუ გინდა, მე მკითხე და გეტყვი _ სხვანაირად კეთდება და არა “მკვდარი სულებით“.
_ როგორ კეთდება?
_ მე კი არ ვაკეთებ. ვიცი, რომ კეთდება. უამრავი “კარუსელი ვიცი“.
_ თქვენ რომ იცით, ის მითხარით…
_ მე არჩევნებს ყოველთვის პატიოსნად ვატარებდი, 50 მეთოდი ვიცი არჩევნების მოსაგებად. მე ვერავინ გამიყალბებს არჩევნებს.
_ გამოდის, რომ ოზურგეთში მოგებულია არჩევნები…
_ მაგაზე არ არის. ეს მეთოდები რომ გამოვიყენო კი, მაგრამ სახელი აქვს ”ნაციონალურ მოძრაობას” ისეთი, რომლის თავმჯდომარეც მე გახლავართ რაიონში, იმდენი საქმე აქვს გაკეთებული, რომ ისედაც მოიგებს. რომელი “კარუსელი” სჭირდება ჩვენს ოპოზიციას? უკარუსელოდ დავდებ გულაღმა. ერთ ხმას არ გავაქანებ, არანაირი მკვდარი სული, ისე მოვუგებ არჩევნებს. უბრალოდ, მივალ ხალხთან, დაველაპარაკები და ამ არჩევნებს მოვუგებ დიდი უმრავლესობით.
_ დაპირებები გამოგრჩათ…
_ დაპირებები რატომ? გზა არ გაკეთდა თუ კვალი? კანალიზაცია თუ წყალი? ახლა კიდევ წამოვა ინფრასტრუქტურა. ოპოზიციას დავდებ გულაღმა.“
ბიძინა ივანიშვილის პოლიტიკაში მოსვლამდე რამდენიმე დღით ადრე, მექვაბიშვილი “გურია ნიუსთან” ღიად საუბრობდა იმ პროექტებზე, რასაც ივანიშვილის დაფინანსებული საქველმოქმედო ორგანიზაცია “ატუ” ოზურგეთში ახორციელებდა; ივანიშვილის პოლიტიკაში მოსვლის შემდეგ კი კითხვაზე, რა პროექტები აქვს ივანიშვილის კომპანიას გაკეთებული ოზურგეთში, ასე პასუხობდა: „ბოდიშს გიხდით, მიღებაზე ვარ და არ მცალია’.
2014 წლის ოქტომბერში უკვე ახალი ხელისუფლების „ნავში“ გადამჯდარი მექვაბიშვილი ივანიშვილის მიერ გაკეთებულ პროექტებზე ისევ ღიად საუბრობდა და ამბობდა, რომ ყოფილ პრემიერ მინისტრს ოზურგეთისთვის ძალიან ბევრი აქვს გაკეთებული:
_ მახსოვს, ადრე მკითხეთ და მე გიპასუხეთ. გეწერათ კიდეც, რა პროექტები გახორციელა. მაშინაც ბევრი გამომრჩა…
_ თუმცა, ეს იყო ივანიშვილის პოლიტიკაში მოსვლამდე… როდესაც იგი პოლიტიკაში გამოჩნდა, ამ თემაზე აღარ საუბრობდით.
_ ერთხელ მკითხეთ და არ მეცალა. დასაწერი რაც იყო, გეწერათ, _ ამბობს მექვაბიშვილი.
მისივე თქმით, ყველა ის ადამიანი, რომელიც პოლიტიკაში გამოცდილია, არჩევნების მოგების მეთოდებს ფლობს და ამაში გასაკვირი არაფერია:
_ ხალხთან საუბარი, შეხვედრა უნდა შეგეძლოს. ესაა და ეს.
კითხვაზე, დღეს შეძლებს თუ არა დადოს “გულაღმა ოპოზიცია”, ანუ ის ადამიანები, რომლებსაც ჯერ კიდევ 3 წლის წინ გვერდით ედგა, არ პასუხობს და ამბობს, რომ ეს არ არის ჭკვიანური შეკითხვა:
_ მე თქვენგან უფრო სერიოზულ კითხვებს ველოდები. ეს არ არის სერიოზული შეკითხვა.
_ რატომ ,ბატონო ავთანდილ? 5 წლის წინ ამბობდით, რომ ოპოზიციას გულაღმა დადებდით. ანუ, იმ ადამიანებს, რომლებთან ერთადაც დღეს მუშაობთ. საინტერესოა, დღეს თუ შეგიძლიათ იგივეს გაკეთება _ ანუ დადებთ თუ არა “გულაღმა” იმ ადამიანებს, რომლებიც ჯერ კიდევ 3 წლის წინ თქვენი გუნდის წევრები იყვნენ?
_ დღეს მცხეთობაა (საუბარი ჩაწერილია 2014 წლის 14 ოქტომბერს). გილოცავთ და ასეთ დღეს მაინც ნუ დასვამთ ასეთ შეკითხვებს… ბოდიში, არ მცალია, დაკავებული ვარ, _ საუბრის გაგრძელება აღარ ისურვა მექვაბიშვილმა.
თუმცა, ყველაფერი ამით არ დასრულებულა _ ავთანდილ მექვაბიშვილი დღეს ბრალს აქეთ გვიყენებს და ამბობს, რომ ჩვენ ვიტყუებით:
_ ბატონო ავთანდილ, როგორც ვიცით, ოზურგეთის საოლქო საარჩევნო კომისიაში „ქართულ ოცნებას“ წარმოადგენთ. როგორც ამბობდით, „ოცნების“ გულაღმა დადებაში იყავით გამოცდილი და ახლა რა უნდა გააკეთოთ?
_ თქვენ მაგას ყველაფერს იტყუებით. ეს უფრო ადრინდელ ოპოზიციაზე იყო ნათქვამი. ჩვეულებრივ ასეთ რაღაცეებს გადააკეთებთ ხოლმე და იტყუებით.
_ ჩვენ ვიტყუებით თუ თქვენ?
_ „ოცნების“ გულაღმა დადებაზე თქვენც მუშაობდით და „ნაციონალებთან“ შენ იყავი შეკრული. დიახ, თქვენ და ახლაც მათ დავალებას ასრულებთ. კარგად იყავით და თუ რამე გნებავთ წერილობით მომართეთ, _ გვითხრა მექვაბიშვილმა და ტელეფონი გაგვითიშა.
სტატია ქვეყნდება პროექტის “გაცნობიერებული არჩევანი _ დემოკრატიის ფუნდამენტი” ფარგლებში.
ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს ფონდ “ღია საზოგადოება _ საქართველოს” პოზიციას. შესაბამისად, ფონდი არ არის პასუხისმგებელი მასალის შინაარსზე.
