სტუდია „მონიტორი“, „მთის ამბები“, „მედიის განვითარების ფონდი“, EECMD _ ამ ორგანიზაციების ოფისთან ამ დილით პლაკატებით იყო გაკრული. პლაკატებზე ორგანიზაციის ხელმძღვანელები აგენტებად და ქვეყნის მოღალატეებად არიან გამოცხადებულები.
ბოლო დღეებში სიძულვილის ენა და ოპოზიციურად განწყობილი ადამიანების ცემის არა ერთი ფაქტი ვიხილეთ. დილით, შინაგან საქმეთა მინისტრმა, ვახტანგ გომელაურმა თქვა, რომ ოპოზიციურად განწყობილ მოქალაქეებზე თავდასხმის ყველა ფაქტთან დაკავშირებით გამოძიება დაიწყო:
„გამოძიება გუშინ მყისიერად დავიწყეთ ყველა ფაქტზე, რაც მოხდა და მივყვებით გამოძიებას. ვნახავთ, რა იყო, რა მოხდა, ვინ დაესხა თავს. არ შემიძლია პირდაპირ ვილაპარაკო, ან ეს მოხდა, ან ის. თავდასხმა მოხდა; სამწუხაროდ, ადამიანებმა მიიღეს დაზიანებები, დაწყებულია გამოძიება.
რა თქმა უნდა, არავის მოსწონს ძალადობა _ არც პოლიციელზე, არც ოპოზიციონერზე, არც მოქალაქეებზე, რომელსაც მომიტინგეები ახორციელებდნენ; არც ჟურნალისტებზე. გამოძიება დავიწყეთ“, _ თქვა ვახტანგ გომელაურმა.
პოლიტოლოგი არჩილ გამზარდია „გურია ნიუსთან“ საუბრის დროს ამბობს, რომ მსგავსი ფაქტებით სახელმწიფო ცდილობს ის ადამიანები დააშინოს, რომლებიც თავისი საქმიანობით აქტიურები არიან:
„მნიშვნელოვანია, რომ შერჩეულნი არიან ის ადამიანები, რომლებიც თავის დროზე სახელმწიფო რეპრესიებში ხვდებოდნენ.
კარგად ვიცნობ გელა მთივლიშვილს, ნინო ზურიაშვილს… ისინი წინა ხელისუფლების დროსაც საგამოძიებო ჟურნალისტიკით იყვნენ დაკავებულები და მათ დიდი წვლილი მიუძღვით რეჟიმების შერყევაში.
მსგავსი შერჩევა მე შემთხვევითი არ მგონია _ ზუსტად იმ ადამიანებს ებრძვიან, რომლებსაც დიდი გამოცდილება აქვთ და თავისი საქმის პროფესიონალები არიან. კარგად გვახსოვს, აჭარაში რეგიონული მედიის წარმომადგენლებს რომ შეხვდა შალვა პაპუაშვილი _ მან და თავისმა გუნდმა კარგად დაინახეს, რომ სრულიად სხვა რანგის ჟურნალისტიკასთან ჰქონდა შეხვედრა, სრულიად სხვა შინაარსის, გამოცდილების, კვალიფიკაციის პირებთან მოუწიათ შეჯახება.
ამიტომ ახლა მეტი არაფერი დარჩენია ხელისუფლებას და პირველ რიგში ეს ადამიანები უნდა გააშავონ და დააშინონ.
ყველანაირი ტიპის თავდასხმის რეჟიმზეა გადასული ხელისუფლება: პირდაპირი დისკრედიტაციის, პირდაპირი ფიზიკური ანგარიშსწორების, პირდაპირი მუქარის და ა. შ. ადამიანებს დასდევენ იმისთვის, რომ განსხვავებულმა აზრმა არ იარსებოს ამ ქვეყანაში; ვინც აკრიტიკებს ხელისუფლებას, ყველას იარლიყს აწებებენ“.
არჩილ გამზარდიას თქმით, ეს არის ტოტალიტარული სახელმწიფოს დამახასიათებელი ნიშნები და ასე ყოფაში ცხოვრება წარმოუდგენელია:
„ყველაფერი, რასაც ბოლო დროს ვხედავთ, არის გამიზნული პროცესი _ ერთი მხრივ, დაისადგუროს შიშის ფაქტორმა, მეორე _ უსუსურობის ფაქტორმა და მესამე _ დაიწყოს მოქალაქეების ერთი ნაწილის პირდაპირი ნადირობა მეორე ნაწილზე. ხელისუფლება ერთვება ამ ყველაფერში პირდაპირ და ირიბიდაც. საკმაოდ მძიმე მოცულობაა _ ეს არის ტოტალიტარული სახელმწიფოს პირობები, რომელიც აქტიურ ტემპით დაიწყო“, _ გვითხრა არჩილ გამზარდიამ.
დაწყებულია თუ არა პლაკატების საქმეზე გამოძიება შინაგან საქმეთა სამინისტროს ამის შესახებ განცხადება არ გაუვრცელებია, პარალელურად კი იზრდება იმ ორგანიზაციების რიცხვის, რომელებსაც მოღალატეებად აცხადებენ და მათ ოფისთან შესაბამისწარწერებიან ასობით პლაკატებს აკრავენ.
ავტორი
