დღეს, ოზურგეთში 2008 წლის აგვისტოს ომის მე-11 წლისთავთან დაკავშირებით, ადგილობრივი ხელისუფლების წარმომადგენლები, რუსეთ-საქართველოს ომში დაღუპული ყველა ოზურგეთელი ჯარისკაცის საფლავთან მივიდნენ და მათ ხსოვნას პატივი მიაგეს.
მსვლელობა ქალაქის ცენტრიდან დაიწყო. სახელმწიფო რწმუნებული გურიის მხარეში ზურაბ ნასარაია, გუბერნატორის მოადგილემ გია ებრალიძე, ოზურგეთის მუნიციპალიტეტის მერი, კონსტანტინე შარაშენიძე, მერის მოადგილე, ირაკლი სირაძემ, საკრებულოს თავმჯდომარე, დავით დარჩია ჯერ საბრძოლო დიდების მემორიალთან მივიდნენ, სადაც ხელისუფლების წარმომადგენლებს ომის მონაწილე ვეტერანები დახვდნენ. იქვე გვირგვინით შეამკეს ეროვნული გმირის ზაზა დამენიას საფლავი.
ვეტერანები, რომლებმაც არაერთი ჭრილობა წამოიღეს ომიდან, თუმცა ახლა მხოლოდ დაღუპულ სამხედროებზე სწუხან და გულისტკივილით იხსენებენ დაღუპულ თანამებრძოლებს.
გურამ ასათიანი, ოზურგეთელი ომის ვეტერანი: მტერს არ ვუსურვებ, რაც ჩვენ ვნახეთ. 2008 წლის 7 აგვისტოს სამსახურში გამოგვიძახეს. 8 აგვისტოს , დილით ადრე რაჭაში ვიყავით უკვე, იქედან კვაისაში გადავედით. ცეცხლი უცებ გაგვიხსნეს. თურმე იქვე იყვნენ ჩასაფრებულები. რაც შეგვეძლო, ვიბრძოლეთ, მერე უკან დავიხიეთ. თვალწინ დაგვეხოცა მებრძოლები… ერთ-ერთ ყველაზე ცხელ წერტილში ვიყავით. მერე გორისაკენ წამოვედით… მიჭირს საუბარი. თუ ქვეყანას დავჭირდი, კვლავ ვიომებ, მაგრამ მინდა ამიერიდან მაინც ყველა დავა და კონფლიქტი მშვიდობიანი გზით გადაწყდეს…
ზური ურუშაძე, ომის ვეტერანი, 79 წლის: აფხაზეთის და ცხინვალის ომების მონაწილე ვარ. სულ წინა ხაზზე ვიბრძოდი. ბაბუშერაში თავში დავიჭერი და კონტუზია მივიღე. მძიმე ოპერაცია გავიკეთე. ცხინვალის ომი რომ დაიწყო, უკვე გამოჯანმრთელებული ვიყავი და არ დავფიქრებულვარ, ისე წავედი. რაღაც სასწაულით გადავრჩი. 11 აგვისტოს უკან რომ გამოგვაბრუნეს, ხაშურამდე ფეხით ვიარეთ… სიკვდილზე უარესი იყო ეს ჩემთვის. საშინელი განცდა მქონდა… ყოველ წელს დავდივარ გმირების საფლავზე. თავს ვხრი მათი სულების წინაშე… მინდა, უკანასკნელი იყოს ასეთი რამ ჩვენი ქვეყნის ისტორიაში…
_ რა უნდა ვთქვათ? უმძიმესი სტრესია ჩვენთვის იმ დღეების გახსენება. გვინდა, ჩვენს მომავალ ახალგაზრდობას ვუსურვოთ, სამშობლო თავდავიწყებით ჰყვარებოდეთ და არ ენახოთ ის, რაც ჩვენ ვნახეთ. ჰქონოდეთ იმის გონება და შესაძლებლობა, ყველა სადავო საკითხი, ყველა კონფლიქტი მშვიდობიანი გზით გადაეწყვიტოთ და ისე გაემთლიანებინოთ ქვეყანა, _ გვეუბნებიან აგვისტოს ომის მონაწილე ვეტერანები გელა ტეფნაძე, ზურა კურტანიძე, მიხეილ ჩხაიძე…
აგვისტოს ომის, 21 წლის გმირის ზაურ თენიეშვილის საფლავი ხელისუფლების წარმომადგენლებმა გვირგვინები შეამკეს.
გვირგვინებით შეამკეს, ასევე, ქალაქ ოზურგეთში თამაზ ნიკიტინის და სოფელ გურიანთაში, თემურ ჭიტაძის საფლავი.
_ მე-11 წელია, ჩვენ პატივს მივაგებთ აგვისტოს ომის გმირებს. ჩვენ მხოლოდ ის შეგვიძლია, ნუგეში ვცეთ მათ მშობლებს, ოჯახებს. არ მოვაკლოთ ყურადღება. თითოეული გმირის ოჯახი მერიისგან მიიღებს დახმარებას, 500-500 ლარის ოდენობით. მთავარი საქმე მათ გააკეთეს _ შეეწირნენ სამშობლოს და ჩვენი ვალია, მათი ხსოვნის უკვდავყოფა, _ გვითხრა ოზურგეთის მუნიციპალიტეტის მერის მოადგილემ ირაკლი სირაძემ.
გუბერნატორის მოადგილემ გია ებრალიძემ თემურ ჭიტაძის საფლავთან ყოფნისას, სადაც თანამებრძოლებმა ახალი დროშა აღმართეს, თქვა, რომ სანუგეშოა და საამაყო ის, რომ ცვენი გმირები სამშობლოს დამოუკიდებლობას შეეწირნენ. თორემ შვილის წასვლას რომ მშობელი მოესწრება, ტრაგედიაა ეს და რა უნდა ვთქვათ?
გმირების საფლავები ყვავილებით შეამკეს და მათ ხსოვნას პატივი მიაგეს შშმ პირებმა.
_ ჩვენი ორგანიზაციის წარმომადგენლები ყოველ წელს დავდივართ აგვისტოს ომის გმირების საფლავების შესამკობლად. პატივს მივაგებთ მათ ხსოვნას. მათი დაკარგვა უდიდესი დანაკლისია ჩვენი ქვეყნის მომავლისთვის. ჩვენი ვალია და ვთვლით თავს მოვალედ, რომ მუდამ გვახსოვდეს ისინი და არამარტო დღეს, სხვა დღეებშიც მოვიდეთ მათთან, გავიხსენოთ და მადლობა ვუთხრათ სამშობლოს სამსახურისთვის. ჩვენ ეს ყველამ ერთად უნდა გავაკეთოთ, _ გვითხრა საქველმოქმედო ასოციაცია „გურიას“ წარმომადგენელმა თამუნა ლურსმანაშვილმა.
