ოზურგეთის მუნიციპალიტეტის მერიის ა(ა)იპ კლუბ “მერცხალის” გენერალური დირექტორი მურთაზ აბაშიძე, რომელიც ხანგრძლივი დავის და უზენაესი სასამართლოს მიერ გამამართლებელი განაჩენის შემდეგაც, მხოლოდ ადგილობრივი თვითმმართველობის არჩევნების შემდეგ დაბრუნდა აღნიშნულ თანამდებობაზე, დღეს მაინც უკმაყოფილოა სტადიონზე არსებული ვითარებით და ამბობს, რომ აქ “ორხელისუფლებიანობაა”.
მურთაზ აბაშიძე ხაზს უსვამს იმ ფაქტს, რომ “მერცხალს” გენერალური დირექტორის გარდა, დირექტორიც ჰყავს _ ამ თანამდებობაზე მამუკა გოგუაძეა დანიშნული, რომელიც ამ ა(ა)იპ-ს წინა წლებშიც ხელმძღვანელობდა:
_ სულ ა(ა)იპ-ში 25 თანამშრომელია. ჯერჯერობით, გუნდის მთავარი მწვრთნელი დანიშნული არ არის. სტადიონზე ან უნდა ითამაშო, ან ფიზიკურად უნდა იშრომო. დღეს არის დაბრკოლება _ არაა ერთსულოვნება; ორხელისუფლებიანობაა, ასე ვთქვათ. გუნდში სიტუაცია დასალაგებელია _ კაბინეტში დასაჯდომად არავის უნდა ეცალოს და ტყუილად ხელფასს არავინ უნდა იღებდეს. აქ არის რამდენიმე თანამშრომელი, რომლებიც, ძირითადად, არ დადიან, თუმცა, ხელფასს მაინც იღებენ. ამ თვეში ასეთი ხალხი ხელფასს ვერ მიიღებს, _ ამბობს აბაშიძე “გურია ნიუსთან” საუბრისას.
მისივე თქმით, წინა წლებში ჩადენილი დანაშაულის გამო ვიღაცამ პასუხი უნდა აგოს:
_ მე გუნდში სამი კაცი მოვიყვანე მხოლოდ. ჯერ არ არიან დანიშნული. არადა, უზარმაზარი საქმე გააკეთეს. მარტო ნაგავი გავიტანეთ სამ კვირაში იმდენი, სამი წელი რომ არ გატანილა… 30-ტონიანი ტაბლო გაიყიდა, ტრიბუნა დაჩეხეს, რომელიც ამორტიზებული არ იყო… ამაზე პასუხი არავინ უნდა აგოს? _ სიბრაზეს ვერ მალავს აბაშიძე და აღნიშნავს, რომ “ჯიბეებში ხელებჩაწყობილი ხალხის ადგილი არაა სტადიონზე”:
_ მე ვერ ვუძლებ, როცა თუნდაც ელემენტარული უწესრიგობა არის სადმე. კაბინეტში არ უნდა იჯდეს დირექტორი. დილიდან, როცა შემოვალ, კუთხე-კუნჭულს ვათვალიერებ. ასანთის ყუთიც რომ ეგდოს სადმე, ვიხრები და ვიღებ… თუ ვინმეს ცილს ვწამებ და ვტყუი, პასუხი მაგებინონ. ჯიბეებში ხელებჩაწყობილი ხალხის ადგილი არაა სტადიონზე. დირექტორთან, მამუკა გოგუაძესთან მე არაფერი მაქვს სადავო, მაგრამ კაბინეტში ჯდომა ან სტადიონზე მოსვლა და წასვლა არაა საქმე, _ ამბობს აბაშიძე.
ა(ა)იპ ოზურგეთის “მერცხალის” დირექტორი მამუკა გოგუაძე ამბობს, რომ “ორხელისუფლებიანობის” საბაბი სტადიონზე არ არსებობს:
_ მე არ ვარ კონფლიქტური პიროვნება. მურთაზ აბაშიძე არის გენერალური დირექტორი. აქ არის საჭირო ელემენტარული რამ _ წესდების ცოდნა. მას ევალება კონტროლი ანუ ჩვენ, ყველა და ყველაფერი მან უნდა აკონტროლოს. ზოგადი საუბარი არ შეიძლება _ თუ რამ არ მოსწონს ან რაღაც არ კეთდება ისე, როგორც საჭიროა, ვიღაც თუ დაუმსახურებლად იღებს ხელფასს, უნდა თქვას კონკრეტულად, ვინ არის ის! მისი მოვალეობა ხომ კონტროლია? არაა საჭირო ყოველდღიური დავა. ჩვენი შვილები მეგობრები არიან… პრობლემები ბევრია, ასევე, ბევრია გასაკეთებელი საქმე, რაც მშვიდად და პასუხისმგებლობით უნდა გაკეთდეს. ვფიქრობ, გასაყოფი არაფერი გვაქვს და შეთანხმებით ყველაფერი გაკეთდება. ვიმეორებ, არ ვარ კონფლიქტური პიროვნება და მუდამ შემიძლია კომპრომისზე წასვლა, გაგება და საქმის სასიკეთოდ შემობრუნება… ნამდვილად იშრომეს და ბევრი ნაგავი გაიტანეს. ვინც იშრომა, რასაკვირველია, ხელფასი უნდა მიიღოს, _ ამბობს მამუკა გოგუაძე.
მისივე თქმით, ნაგავი სტადიონიდან ყოველთვის გაქონდათ. ასევე, იწმინდებოდა და სუფთავდებოდა ბალახის საფარი, შემოგარენი.
აღსანიშნავია, რომ ჩვენი იქ ყოფნის დროს სტადიონზე ოზურგეთის მუნიციპალიტეტის ვიცე-მერი ალეკო სურგულაძე მოვიდა და საგანგებო თათბირიც ჩაატარა. სურგულაძემ ე. წ. მხარეებს მიმართა, რომ ის სიტუაციის დალაგების მომხრეა და ემოციურ, დაძაბულ ფორმატში სასაუბროდ აქ არავის გამოადგებოდა:
_ როგორც ადამიანებს ჩვევიათ, ისე უნდა დავალაგოთ სიტუაცია. ჩვენ ყველას გვაქვს უდიდესი პასუხისმგებლობა, როგორც ერთმანეთის, ისე ოზურგეთელების, სრულიად ქვეყნის წინაშე. დავსხდეთ ერთად, მოვილაპარაკოთ. ფეხბურთელებს უნდა დაენიშნოთ ხელფასი. ბევრ რამეზე არის საზრუნავი. სტადიონის გაყიდვაზე არა, მაგრამ გუნდის გაყიდვაზე ნამდვილად არის საუბარი, რაც აუცილებლად შედეგზე ორიენტირებული იქნება. თქვენც სანერვიულო ჩამოგშორდებათ და საქმეც წინ წაიწევს, _ თქვა სურგულაძემ, თუმცა, მისი სიტყვები სიტუაციის დასაწყნარებლად საკმარისი არ აღმოჩნდა. უფრო მეტიც, აბაშიძესა და გოგუაძეს შორის სიტყვიერ შეურაცხყოფასაც კი ჰქონდა ადგილი.
_ მურთაზ, დაანებე ამ პოლიტიკას თავი და ვიმუშაოთ. სხვა კანონია ახლა, სხვა წესდება, _ მიმართა აღელვებულ აბაშიძეს გოგუაძემ.
_ ა, ახლა სხვა კანონია? შენს დროს რა კანონი იყო? _ ამ კითხვის საპასუხოდ აბაშიძეს გოგუაძემ უთხრა, რომ “ურევდა”:
_ შენითაა არეული ეს ყველაფერი… _ რეპლიკა უპასუხოდ არ დაუტოვებია მურთაზ აბაშიძეს.
ვიცე-მერმა ალეკო სურგულაძემ მათ კვლავ სიმშვიდისკენ მოუწოდა:
_ მე აქ იმისთვის არ ვარ, რომ საქმე ვარჩიო და მსგავს პოლემიკას ვუსმინო. მურთაზ, შენს გულწრფელობასა და ფეხბურთისადმი დამოკიდებულებაში ეჭვი არ შეგვაქვს, შევხვდეთ უახლოეს პერიოდში და მოვილაპარაკოთ. ადგილობრივი ხელისუფლებისგან არის ამის ნება. დაძაბული და კონფლიქტური სიტუაცია შემდეგ გუნდზეც გადავა. ჩვენ უნდა შევძლოთ და ნამდვილად შეგვიძლია, მოვილაპარაკოთ, ვიყოთ ერთსულოვნები, რომ საქმე გაკეთდეს, _ მიმართა სურგულაძემ აბაშიძეს და გოგუაძეს, რაზეც თანხმობა მიიღო.
“გურია ნიუსის” კითხვაზე, როგორ აპირებს მდგომარეობის გამოსწორებას, ემოციური ფონის განტვირთვას და იყიდება თუ არა ნამდვილად საფეხბურთო გუნდი “მერცხალი”, ვიცე-მერმა ასეთი პასუხი გაგვცა:
_ თითქმის, ყველა ოჯახსა და სამსახურშიც კი არის ხოლმე კონფლიქტური სიტუაციები. ასეთ დროს ძლიერი ხელი და გონებაა საჭირო. მე ვფიქრობ, შევძლებთ ვითარების ნორმალურ ჩარჩოში მოქცევას. მალე შევხვდები აბაშიძეს და გოგუაძეს, მოვილაპარაკებთ, რა გვინდა, როგორ უნდა ვაკეთოთ საერთო საქმე, რასაც ჩვენგან საზოგადოება ითხოვს. რაც შეეხება “მერცხალის” გაყიდვას, ამაზე ნამდვილად არის საუბარი. ინიცირება გაკეთებულია _ ველოდებით თანხმობას. მერე საქმე გადავა იურიდიულ და სამართლებრივ სივრცეში და იქნება აუქციონი. მაქვს იმედი, რომ ყველაფერი კარგად იქნება, _ გვითხრა სურგულაძემ.
