ლანჩხუთის მერისთვის ხმის მიწვდენას სოფელ ხორეთიდან ითხოვენ. როგორც ირკვევა, აქაურებს გზისა და სანიაღვრე არხების პრობლემა აწუხებთ.
“იწერება, რომ ლანჩხუთის ხელმძღვანელობამ ესა და ეს გადაწყვეტილება მიიღოო… მე გწერთ სოფელ ხორეთის მკვიდრი, რომელიც ვერ ვხედავ ხელმძღვანელობის ყურადღებას… მხოლოდ არჩევნების წინ დაგვილაგეს ბეტონის ფილები, ვითომ გზის შესაკეთებლად, სადაც ფეხითაც ძნელია გადაადგილება. ნაარჩევნებს კი, იმის მაგივრად, რომ მოეწესრიგებინათ აქაურობა, აალაგეს და გააქრეს ეს სანიაღვრე არხისთვის განკუთვნილი ფილები… არც უკითხავთ, როგორ დადიხართ აქო… არჩევნების წინ თავად სარიშვილმა ნახა ეს ადგილი და დაათვალიერა რამხელა თხრილია აქ. არადა, ფაქტობრივად, თავადაც ჩვენი სოფლის მკვიდრია.
გთხოვთ, დაგვეხმაროთ _ იქნებ, ამ წერილმა რაიმე შედეგი გამოიღოს. უკვე ავტომობილზე აღარაა საუბარი, ფეხითაც გვიჭირს ეზოში შესვლა. სირცხვილია… სულ რაღაც ექვსი მეტრის სიგრძეზეა საუბარი“, _ ამბობს ხორეთის მკვიდრი ირმა ფოცხიშვილი და ადგილობრივი ხელისუფლებისგან გზისა და სანიაღვრე არხის პრობლემის მოწესრიგებას ითხოვს, რომ საკუთარ ეზოში ნორმალურად შესვლის შესაძლებლობა ჰქონდეს.
“გურია ნიუსი” ხორეთში სოფლის შიდა გზის პრობლემის საკითხთან დაკავშირებით სიტუაციაში გასარკვევად საკრებულოს ოპოზიციონერ წევს ირაკლი მარშანიშვილს დაუკავშირდა, რომელიც თავადაც ამ თემის მკვიდრია.
მარშანიშვილის თქმით, ზოგადად, ჩოჩხათის ადმინისტრაციულ ერთეულში, რომლის ერთ-ერთ სოფელსაც ხორეთი წარმოადგენს, უგზოობა ერთ-ერთი მთავარი პრობლემაა:
“აქ გზა არსად არაა და ხალხიც ძალიან გაღიზიანებულია ამის გამო. ვაპირებდი კიდეც, საკრებულოს სხდომაზე სოფლის პროგრამებთან დაკავშირებით მესაუბრა, მაგრამ ახლა დედაქალაქში მიმდინარე პროცესების გამო ოპოზიცია ბოიკოტის რეჟიმში ვართ და როგორც კი საშუალება მომეცემა, ამასთან დაკავშირებით აუცილებლად გავაკეთებ განცხადებას საკრებულოს სხდომაზე. მერწმუნეთ, ბევრი აღმოჩნდება მისთვის არასასიამოვნო მდგომარეობაში.
რაც შეეხება გზის იმ მონაკვეთს, რომელზეც არის ამ შემთხვევაში საუბარი და კონკრეტულად, იქ სანიაღვრე არხებისთვის განკუთვნილი სამშენებლო მასალის მიტანას, გეტყვით, რომ ეს მასალა ნამდვილად არ ყოფილა განკუთვნილი ფოცხიშვილების ეზოს მიმდებარედ ინფრასტრუქტურული სამუშაოების გასახორციელებლად. როგორც მე მაქვს ინფორმაცია, უამინდობის გამო, აქ მოხდა დროებით ამ მასალის განთავსება, მოგვიანებით კი მოხდა მისი გადატანა იმ ადგილას, სადაც თავიდანვე იყო გათვალისწინებული, ამავე უბნის სხვა ნაწილში“, _ გვითხრა მარშანიშვილმა.
მისივე ინფორმაციით, პრობლემებია სოფლების: ხორეთისა და მოედნის დამაკავშირებელ გზაზე, სადაც გასულ წელს წყალმა ხიდი წაიღო და ჯერაც არავის გაუკეთებია.
“გურია ნიუსი” შეეცადა ხორეთის მკვიდრის ხმა და მის მიერ გაჟღერებული პრობლემა ლანჩხუთის მერამდეც მიეტანა და ალექსანდრე სარიშვილს პირადად სთხოვა განმარტება ზემოთ ნახსენებ პრობლემასთან დაკავშირებით _ მერი დაგვპირდა, რომ მოკლე ხანში გაერკვევა პრობლემაში და შესაძლებლობის ფარგლები, შეეცდება მის დროულ მოგვარებას.
