ლანჩხუთის საკრებულოს სხდომაზე ერთ-ერთ საკითხად მუნიციპალიტეტის 2021 წლის ბიუჯეტში ცვლილების შეტანის თაობაზე იმსჯელეს. საკითხთან დაკავშირებით დეტალური განმარტებები მერიის საფინანსო-საბიუჯეტო სამსახურის უფროსმა როლანდ ლაშხიამ გააკეთა და განმარტა, რომ ინფრასტრუქტურული პროექტების გასახორციელებლად, მთავრობის განკარგულების საფუძველზე, ლანჩხუთის მუნიციპალიტეტს დამატებით თანხები გამოეყო.
მერიის საფინანსო-საბიუჯეტო სამსახურის განმარტებების მიხედვით, ნიგვზიანის ადმინისტრაციულ ერთეულში, შიდა სასოფლო გზების რეაბილიტაციისთვის 508579 ლარის ღირებულების პროექტი განხორციელდება, რისთვისაც მთავრობის მიერ გამოყოფილი თანხიდან 483150 ლარი მიიმართება, მუნიციპალიტეტის თანადაფინანსების წილი კი, 25 429 ლარია.
ასევე, შიდა გზების პრობლემის მოგვარებას მოხმარდება, მუნიციპალიტეტის სხვადასხვა ადმინისტრაციულ ერთეულებში, მთავრობის მიერ გამოყოფილი თანხიდან 2100 000 ლარი. ამ შემთხვევაში პროექტის ჯამური ღირებულება 2210 527 ლარითაა განსაზღვრული და თანადაფინანსებისთვის მუნიციპალიტეტს 110527 ლარი მობილიზება მართებს.
ლაშხიასვე მოხსენებით, ზემონახსენები ბიუჯეტში ცვლილება მრავალბინიანი სახლების სახურავების რეაბილიტაციისთვის განკუთვნილი თანხის 45 416 ლარით შემცირებას, ხოლო საჯარო სკოლების მოსწავლეთა ტრანსპორტირების ხარჯების 20 898 ლარით გაზრდას ითვალისწინებს.
როგორც საკითხის მომხსენებლის მხრიდან გაჟღერდა, მერიაში შესული წინადადებების განხილვის შედეგად, მიზანშეწონილად ჩაითვალა, რომ სხვადასხვა ინფრასტრუქტურული პროექტების გასახორციელებლად მუნიციპალიტეტის ადმინისტრაციულ ერთეულებში გარკვეული ოდენობის თანხები მიიმართოს ბიუჯეტიდან. კერძოდ: ღრმაღელის ადმინისტრაციულ ერთეულში მემორიალის რეაბილიტაციისთვის 8000 ლარის გაიხარჯება; სუფსის ადმინისტრაციულ ერთეულში წყალმომარაგების რეაბილიტაციისთვის 20 ათასი ლარი მიიმართება; 10 ათასი ლარი ერგო ჯურუყვეთის ადმინისტრაციულ ერთეულს და ის ხიდის რეაბილიტაციისთვისაა განკუთვნილი; ლესის ადმინისტრაციულ ერთეულში კი 24 ათასი ლარით წყალმომარაგების ქსელის რეაბილიტაციაა გათვალისწინებული, ხოლო ღობის მოსაწყობად 10400 ლარი; 5000 ათასი ლარით დაფინანსდება გვიმბალაურის ადმინისტრაციულ ერთეულში სკვერის მოწყობა; წყლის სისტემის ქსელის რეაბილიტაციისთვის 12 ათასი ლარი, ხოლო სკვერის მოსაწყობად 10 ათასი ლარი უნდა გაიხარჯოს შუხუთის ადმინისტრაციულ ერთეულში; რაც შეეხება ნიგოითის ადმინისტრაციულ ერთეულს, აქ მემორიალის რეაბილიტაციისთვის 31000 ლარის ღირებულების სამუშაოები უნდა შესრულდეს; აცანაში ადმინისტრაციული ეზოს ღობის მოსაწყობად 50 ათასი ლარია გათვალისწინებული; მამათში კი წყალმომარაგების ქსელის რეაბილიტაციას 15 ათასი ლარი უნდა მოხმარდეს; რაც შეეხება ქალაქს, მერიის მიერ წარმოდგენილი განმარტებების მიხედვით, აქ გვარჯალაძის ქუჩაზე, მრავალბინიანი სახლების ეზოში სტადიონის რეაბილიტაციისთვის 20 ათასი ლარია გათვალისწინებული; 5 ათასი ლარით დაფინანსდება ებრალიძის ქუჩაზე მდებარე მრავალბინიანი სახლის სადარბაზოს შეკეთება; ჟორდანიას ქუჩაზე სოციალური სამსახურის მიმდებარედ გზის რეაბილიტაციისა და თამარ მეფის ქუჩის ორმოვანი შეკეთებისთვის 171000 ლარი გაიხარჯება; ჩხაიძის ქუჩაზე მინი-სტადიონის რეაბილიტაცია იგეგმება და საამისოდ ბიუჯეტი 28 ათასი ლარს გაიღებს; მხარეთმცოდნეობის მუზეუმის მიმდებარე ტერიტორიაზე სკვერის გასაახლებლად 10 ათასი ლარია განკუთვნილი. მუნიციპალიტეტის ადმინისტრაციული შენობის სახურავის შეკეთებისთვის კი 95 ათასი ლარის დახარჯვა იგეგმება.
ლაშხიას თქმით, 22 ათასი ლარის ეკონომია, რომელიც მუნიციპალიტეტმა სტიქიის შედეგად მიყენებული ზიანის სალიკვიდაციოდ გამოყოფილი თანხიდან გაწია, აცანის ადმინისტრაციულ ერთეულში მ. ჩხაიძის სახლის სარეაბილიტაციოდ მიიმართება, რომელიც, როგორც ითქვა, ასევე, სტიქიის შედეგად დაზიანდა.
საფინანსო სამსახურის მიერ გაკეთებული განმარტებებით, იზრდება კეთილმოწყობის სამსახურის დაფინანსება 125000 ლარით. აღნიშნული თანხიდან ოფისის ხარჯები 18 ათასი ლარით იზრდება, შტატგარეშე თანამშრომელთა ანაზღაურება კი _ 5000 ლარით. 70 ათასი ლარით იზრდება ტრანსპორტის ხარჯი, სხვა საქონელი და მომსახურების მუხლი კი _ 7000 ლარით. ასევე, იზრდება წყლის სისტემის ექსპლუატაციის სხვა საქონელი და მომსახურების მუხლის დაფინანსება 25 ათასი ლარით.
22 ათასი ლარით იზრდება ჯანდაცვის ცენტრის შრომის ანაზღაურების ფონდი სხვა საქონელი და მომსახურების შემცირების ხარჯზე.
მერიის ერთჯერადი დახმარების პროგრამა 12 ათასი ლარით იზრდება აუტისტური სპექტრის მქონე ბავშვთა სარეაბილიტაციო კურსის დაფინანსების შემცირების ხარჯზე.
სპორტული ცენტრის შტატგარეშე თანამშრომელთა დაფინანსების შემცირებით, 7500 ლარით იზრდება საფეხბურთო სკოლის შტატგარეშე მომუშავეთა ანაზღაურება.
საკითხის მომხსენებლის თქმითვე, ბიუჯეტში ხარჯების ზრდის შესაბამისად, დაფინანსების უზრუნველყოფის მიზნით, არაფინანსური აქტივების კლების ხარჯზე იზრდება შემოსავალი 165000 ლარით, ჯარიმები და საურავების ზრდის გეგმის ზრდის ხარჯზე _ 488084 ლარით, ბიუჯეტის თავისუფალი ნაშთიდან კი _ 150000 ლარით.
სხდომაზე მყოფმა მუნიციპალიტეტის პირველმა პირმა, ალექსანდრე სარიშვილმა საფინანსო სამსახურის უფროსის მოხსენებას ბიუჯეტში დაგეგმილ ცვლილებებთან დაკავშირებით დაამატა, რომ კარგი იქნება თუ ქალ ფეხბურთელთა ოფისის მოსაწესრიგებლად დამატებით თანხები იქნება გათვალისწინებული.
„ჩვენ ქალ ფეხბურთელებს არ აქვთ ოფისი, არ გააჩნიათ არაფერი, ყოფილი სტამბის შენობაში არის ფართი და მისი რეაბილიტაციისთვის თანხებიც რომ დავამატოთ“, _ თქვა სარიშვილმა.
ლაშხიას მხრიდან გაკეთებულ განმარტებებზე ბიუჯეტში გასახორციელებლ ცვლილებებთან დაკავშირებით, კითხვები და გარკვეული შენიშვნები დეპუტატებმაც გააჟღერეს. ყველაზე მწვავე კი ჩიბათის მაჟორიტარი გიორგი ჩახვაძე იყო, რადგან თანხა, რომელიც ადგილობრივი ბიუჯეტიდან ინფრასტრუქტურული პროექტების დასაფინანსებლად ადმინისტრაციულ ერთეულებზე გადანაწილდა, ჩიბათს არ ერგო.
„აქ ითქვა, რომ მერიაში შესული წინადადებების განხილვის შედეგად, სხვადასხვა ინფრასტრუქტურული პროექტების გასახორციელებლად ადგილობრივი შემოსავლებიდან ადმინისტრაციულ ერთეულებში თანხები გამოიყო. ზოგან _ ღობე, ზოგან _ წყალი და ზოგანაც სტადიონი კეთდება. ხუთი წელია, ვითხოვ, იქნებ დამასრულებინოთ სტადიონის მშენებლობა. დავანებოთ ამ სტადიონს თავი, ხალხმა ყანები ვერ დათესა იმის გამო, რომ ორი ათასი ლარის „კბილიანი მავთული“ იყო საჭირო. ნახევარი ჩიბათის საყანე ფართობები დაუთესავია. წყლის სისტემას რაც შეეხება, მაღაზიებში ნისიებზე დავდიოდი, რომ მოსახლეობასთან ერთად, საკუთარი ძალებით, რაღაც მოგვეწესრიგებინა. ასე ასაგდები თუა ჩიბათი, ბოდიშს გიხდით, პატივცემულო მერო, საკრებულოს თავმჯდომარევ და ასე შემდეგ. უბრალოდ, ვითხოვ, ორი ათას ლარს, ხალხმა საყანე ფართობები რომ დათესოს. ხუთი წელია მინი-სტადიონის დასრულებას ვითხოვ და აგერ გადავხედე და სამი სტადიონი კეთდება. ყველა სხდომაზე ამაზე ვსაუბრობ და ჩემს საუბარს აზრი თუ არ აქ, რა მინდა მაშინ?! წყლის სისტემაც მოუწესრიგებელია. სოფელ ჭალაზე არც წყალია, არც _ გზა. სადღაც ჩიბათის საკითხებიც უნდა გაგეთვალისწინებინათ“, _ თქვა სოფლის მაჟორიტარმა.
ჩახვაძის ამ გულისწყრომას გაგებით შეხვდნენ საყვედურის ადრესატები, თუმცა, ერთადერთი საყანე ფართობების შეღობვის თემასთან დაკავშირებით ვერ გაიზიარა მისი პოზიცია მერმა. მისი თქმით, საყანე ფართობიც კერძოა და საქონელზეც, რომელიც ამ ტერიტორიაზე შედის, მესაკუთრემ უნდა იზრუნოს.
„კი, ბატონო, არ ვიქნები წინააღმდეგი, თუ თქვენი გადაწყვეტილება იქნება, რომ ნუ გავაკეთებთ გზებს, სტადიონებს, სკვერებს და გადავღობოთ ყველაფერი. იყვნენ მოსულები სხვადასხვა სოფლიდან იმავე პრობლემებით. თუკი თქვენი გადაწყვეტილება იქნება, კი. ბატონო…“ _ თქვა ალექსანდრე სარიშვილმა.
საკითხთან დაკავშირებით მცირეხნიანი დებატების შემდეგ ჯერი კენჭისყრაზე მიდგა და ბიუჯეტში დაგეგმილ ცვლილებას 27 დეპუტატმა დაუჭირა მხარი.
ავტორი: სოფო წილოსანი
