საქართველოს სკოლებში ახალი სასწავლო წელი დაიწყო. გამონაკლისი ამ მხრივ არც ლანჩხუთია. თუმცა, როგორც ფაქტები ცხადჰყოფს, მუნიციპალიტეტის 24 საჯარო სასწავლო დაწესებულებიდან, ზოგიერთი სკოლის მასწავლებლები და მოსწავლეები კვლავინდებურად სხვადასხვა სკოლებში არიან შეხიზნულები და მეორე ცვლის რეჟიმში აგრძელებენ სასწავლო პროცესს. ზოგ შემთხვევაში, ასეთი მიგრაცია წლებია გრძელდება, რადგან მიზეზთა გამო, ამა თუ იმ სკოლის სარეაბილიტაციო პერიოდი, ან ახალი სკოლის მშენებლობის დაწყების პროცესი იწელება.
ახალი სასწავლო წლის დასაწყისში განათლების სამინისტრომ გაავრცელა ინფორმაცია, რომ სასკოლო ინფრასტრუქტურის გაუმჯობესების მიზნით, საქართველოში მშენებლობა-რეაბილიტაციის მასშტაბური პროექტი მიმდინარეობს.
“მნიშვნელოვანია, რომ მიმდინარე წლის სექტემბერ-ოქტომბერში 60 საჯარო სკოლის სრული რეაბილიტაცია დასრულდება, ხოლო წლის ბოლომდე კიდევ 100-მდე საჯარო სკოლის მშენებლობა-სრული რეაბილიტაცია.
აღნიშნული ინფრასტრუქტურული პროექტების გახორციელების შედეგად 28 147 მოსწავლე სწავლას განახლებულ, საერთაშორისო სტანდარტების შესაბამის, გარემოში გააგრძელებს”, _ ვკითხულობთ უწყების მიერ გავრცელებულ ინფორმაციაში.
იმ 60 სკოლის ჩამონათვალში, სადაც, დაპირების მიხედვით, მშენებლობა-სრული რეაბილიტაციის პროცესი სექტემბერ-ოქტომბერში უნდა დასრულდეს ლანჩხუთის ორი სკოლა _ ქალაქ ლანჩხუთი #1 და სოფელ ღრმაღელის საჯარო სკოლებიცაა.
ჰოდა, სანამ მშენებლობა-რეაბილიტაციის სამუშაოები ფინიშზე გავა, მანამდე ახალი სასწავლო პროცესის ონლაინ რეჟიმში დაიწყო ქალაქის პირველმა საჯარო სკოლამ, რომლის კონტიგენტი მუნიციპალიტეტში ყველაზე დიდია (616 მოსწავლე).
ამ სკოლის რეაბილიტაციის სამუშაოები გასულ წელს დაიწყო, რის გამოც გასულ სასწავლო წელს ამ სკოლის პედაგოგებსა და მოსწავლეებს, ერთბაშად ორ სკოლაში _ მესამე საჯარო სკოლასა და სასულიერო გიმნაზიაში უწევდათ სასწავლო პროცესის მეორე ცვლაში გაგრძელება.
პირველი საჯარო სკოლის რეაბილიტაციის სამუშაოებს სამშენებლო კომპანია “საბა კონსტრაქშენი” ახორციელებს და სამუშაოების დაწყებისთანავე ითქვა, რომ 2024 წლის 10 ოქტომბრამდე სკოლის შენობა სასწავლო პროცესისთვის სრულ მზადყოფნაში იქნება.
როგორც ლანჩხუთის საგანმანათლებლო რესურსცენტრის ხელმძღვანელი, ნინო ჩიტაძე ამჯერად ამბობს, ქალაქის პირველ საჯარო სკოლაში ძირითადი სამშენებლო სამუშაოები უკვე დასრულებულია და პირველსკოლელები მშობლიურ, თან განახლებულ, სკოლას ოქტომბრიდან დაუბრუნდებიან.
რაც შეეხება სოფელ ღმაღელის სკოლის საკითხს, ლანჩხუთის რესურსცენტრის ხელმძღვანელის ინფორმაციით, აქ 2024-2025 სასწავლო წლის დაწყება შვიდი ოქტომბრიდან იგეგმება.
“გაცდენილი სასწავლო დრო კი შაბათ–კვირის ხარჯზე ანაზღაურდება“, _ ამბობს ჩიტაძე.
ღრმაღელის სკოლა, სადაც სამუშაოები დასკვნით ეტაპზეა
სამწუხაროდ, მესამე სასწავლო წელია, გამოკეტილია სოფელ შუხუთის საჯარო სკოლის კარი და აქაურ კოლექტივს კვლავაც ნიგოითის საჯარო სკოლაში, მეორე ცვლაში უწევს სასწავლო პროცესის გაგრძელება.
ეს ყველაფერი კი, მოსწავლეთა მშობლების გულისწყრომას იწვევს. მათი თქმით, არსებული მდგომარეობით ბავშვები ზარალდებიან, რადგან ვეღარ ახერხებენ სხვა აქტივობებზე სიარულს და ვერც საგნებში სათანადო მეცადინეობას.
“ასე წლობით გაწელილი ტენდერი რა უბედურებაა, ვერ ვხვდები, რას ემსახურება ასეთი გულგრილობა?” _ ეს კითხვა ჯერ კიდევ გასული, 2023-2024 სასწავლო წლის დასაწყისში დასვეს შუხუთის სკოლის მოსწავლეთა მშობლებმა, თუმცა, პასუხი აქამდე არ მიუღიათ.
როგორც ნინო ჩიტაძესთან სატელეფონო საუბრისას გავარკვიეთ, სარეაბილიტაციო სამუშაოების გასახორციელებლად ტენდერი მალე გამოცხადდება, თუმცა, კონკრეტულ დროზე იგი ვერაფერს ამბობს.
ცნობისთვის, შუხუთის სკოლაში სარეაბილიტაციო სამუშაოების პირველი ეტაპის განხორციელება გასული წლის მიწურულს დაიწყო და მაშინ შენობის სახურავი გამოიცვალა.
დროში საკმაოდ გაწელილი აღმოჩნდა სოფელ ჯურუყვეთის #1 საჯარო სკოლის რეაბილიტაციის საკითხი. ის, რომ ამ სკოლის შენობა რეაბილიტაციას საჭიროებდა, ჯერ კიდევ 2022 წლის გაზაფხულისთვის გახდა ცნობილი. თუმცა, ამ დროის განმავლობაში მხოლოდ ის მოხერხდა, რომ ლევან სამხარაულის სახელობის ექსპერტიზის ეროვნულმა ბიურომ დადო დასკვნა, რომლითაც ლანჩხუთის მუნიციპალიტეტის სოფელ ჯურუყვეთის #1 საჯარო სკოლის (ეს სკოლა, ტერიტორიულად, ჯურუყვეთის ადმინისტრაციულ ერთეულში, სოფელ ეწერში მდებარეობს) ტექნიკური მდგომარეობა არადამაკმაყოფილებლად შეფასდა.
თითქმის წელიწადნახევრიანი ლოდინის შემდეგ ძველი შენობის დემონტაჟი კი განხორციელდა, მაგრამ საქმე ამის იქეთ წინ აღარ წაწეულა და ამ დრომდე არავინ იცის როდის ექნება სოფელს ახალი სკოლა. რესურსცენტრის ხელმძღვანელთან საუბრის შედეგად მხოლოდ ის გავარკვიეთ, რომ სამუშაოების დასაწყებად მალე ტენდერის გამოცხადება იგეგმება.
რახან შექმნილი დისკომფორტი დროში საკმაოდ გაწელილი აღმოჩნდა, ზოგმა, ვისთვისაც მეორე ცვლაში სიარული მოუქნელი აღმოჩნდა, სხვა სკოლაში ამჯობინა გადასვლა.
უკვე მეორე სასწავლო წელს ხვდება ხიზნობაში სოფელ ნინოშვილის საჯარო სკოლა. საქმე ისაა, რომ გასული წლის რვა სექტემბერს გურიაში მომხდარი დამანგრეველი სტიქიის შემდეგ, გეოლოგების პირველადი დასკვნით, ნინოშვილის საჯარო სკოლა მოსწავლეების მისაღებად საფრთხის შემცველად ჩაითვალა, რის გამოც ნინოშვილში მცხოვრებ ბავშვთა გადამისამართება, ჯურუყვეთის მეორე საჯარო სკოლაში მოხდა.
ნინოშვილის სკოლა
მაშინდელი სტიქიისას მეწყერი წარმოიშვა ნინოშვილის საჯარო სკოლის მიმდებარე ტერიტორიაზე, რის გამოც სამხარაულის ექსპერტიზის ბიურომ დადო დასკვნა, რომ აქ ბავშვების სწავლება არ შეიძლებოდა.
“ცალსახად სკოლის შენობა მდგრადია და უსაფრთხო. საქმე ისაა, რომ სკოლის მიმდებარე ტერიტორია, კონკრეტულად სკოლის უკანა ეზოა მეწყრული, რაც დამატებით კვლევებს საჭიროებს“, _ ამბობს ნინო ჩიტაძე.
ავტორი
